AXWEESANOÓ SAGALOOA 13 - Biblía Axweesantá Hhohho' ar Mungú 2004

¹ Garmoó sagaloó' gurbu'úngw baabuúwós gu axamiis, Ala garmoó gu niqiím naanaqa ga axamisiiká.

² Heé hhoó' baraá axweesanaywós oo hhoe, hhooeema gi sláy, Ala ilatleerír al/aymusmo a xarasleema.

³ Heé afkós gwaa harmagaahh slafiingós gu ba/amis, Ala heé afkós gwaa algeemay i qwaar.

⁴ Tli/usmo gaa gan mak ilis ala ga slayká, Ala heé ilakaahaár i daqaari'iit.

⁵ Heé hota ganaá' lama gan aahh. Ala heé tlaákw tlehhmi'iiwós a barawaslaay nee mureewaslaay.

⁶ Heé hota ganaá' kun de'én nee gan'amuuwós heé tlaákw kun daahh nee tlakweemaawós.

⁷ Heeko daqaari'iima gan leeleehh ar umuúqo ado, ala ga slayká, kooko bir axwees gár i kon i káhh, ala inós a daqaarmo.

⁸ Daqaarmo slafiingós gun tuu/ ar muruudá' i kon, Ala narkutmo gár gu de'e tlaaq i káhh.

⁹ Heé hota ganaá' a adór tsaa'astá oh, Ala tlakusmo a adór gufuú quú'.

¹⁰ Sagagawda i tlampa'amisuú huwahuuw, Ala sagalooa i dinkwa nee gurbu'uungw axamis.

¹¹ Daqaari'iima bara sleér ar wa'aá wák i gaanslár fák, Ala heé ga ikwakwaáhh burumburingo ga niiq.

¹² Gár taa harahhíf bira tlík i slahh'eemís. Ala gár ta sla' bara sleér a adór xa'aanoó slafiingw.

¹³ Umuúqo heé axweesantá waaqaqaá' ti kilós hhitín. Ala umuúqo heé hara'aya ga ilaiwawaá/ qeemu gu sláy.

¹⁴ Heé sagaloó' intsaahhasarós a adór kutlaá ma'aá slafiingw, As kahhó' hee iwa kotsqoti dír /akwseeyír gwa'araro.

¹⁵ Heé inslawaay hhó' ku waatlakwees, Ala loohír múk inkihhimu wásl a hhituru'uumar'ín.

¹⁶ Heé daharuú koóm baraá umuú gaaro in gadiyuus ar xu'uti; Ala daktani daktu'umarós gan alki/ít.

¹⁷ Ya/abusmoó tlaákw muu gun baraá slahh'amuú i dahaas, Ala ya/abusmoó inkihhím amohhooa ga huuw.

¹⁸ Heé intsaahhatisa ga sla'aaká kun oh nee narakw nee waasla'amu, Ala heé gurbu'uungw gu alqaytsimiít ku ilaiwawaa/.

¹⁹ Gár ta sla' bara sleér i tsú' bara muunahe, Ala dír daktanaro tlakweema kiwa may, a gár ta waki.

²⁰ Heé hi'iimamiít nee múk sagelooén, sagalooa ga sláy, Ala mulqumoó heé daktani slahh'amu gu sláy.

²¹ Gitse/aá tlaakwá' heé tlakweemaá tlehhaahhiít ngun eeharahariyá', Ala heé hota ganaá' qeemuú muruú hhó' gu sláy.

²² Heé hhoó' aali gan haniis dír nángw naangós, Ala daqaari'iimár heé tlaákw kaa amohhe'eés as múk hota ganaá'.

²³ Qaymór narkutmo balángw yaariír gun hamaarés, Ala in bahh hhitiruut as /ayta.

²⁴ Heé na/aay slahhto gu sla'aaká na/aydá' gu slaiiká, Ala kudá' qwatsiingo gu slaá' gun harmagaahh.

²⁵ Heé hota ganaá' muruú /aymár afkós gu buú' gu sláy, Ala guruú heé tlaákw i tsii/ qwarko.