AXWEESANOÓ SAGALOOA 12 - Biblía Axweesantá Hhohho' ar Mungú 2004

¹ Heé naanaqa ga slaá' a tsaahha gan slaa', Ala heé iigahhaata gaa sii' a daktani.

² Heé hhoó' hhooeema gi sláy dír AAKOO MUNGUHE. Ala heé inslaway tlákw ku sakwasleemuut nee Mungú.

³ Hee i gawduyká ar tlakweema tlehhit, Ala heé hota ganaá' ku baloó diingisiiká.

⁴ /Ameenír sagaloo' a slamángw hhawaatuuwós ir daara/an. Ala /ameenír gu mureekeemiis a adór inkaahhoó a tsutsuu' dirose.

⁵ Inslawoó heé hota ganaá' i ganaa', Ala gurbu'úngw heé tlaákw a al/ayma.

⁶ Múk tlákw gár ta axwemaamisi a adór tseerdaá muu kir ku'uusi, Ala axweesanoó múk hotaaín ganaa'á' muu gu tuu/.

⁷ Múk tlákw in qwaar sleeme ku baloó ariiká. Ala múk hota ganaá' maray'ín nin kumaamitiyá'.

⁸ Hee kun xirfayees ar qoomoó fuquraangós, Ala heé saga gawít kun waaqaa'.

⁹ Heé tsiní a kudá' ti ninaweemiís oo muruú /aymár koóm, ta heedá' ti kilós xirfayeemisa oo hoót ar pasli.

¹⁰ Heé hotaawós ganaá'á tam slafíngw hikwaawós gun gár i xuu'. Ala gurtleemuú heé tlaákw a xarasleema.

¹¹ Dooslusmoó ilakaahaár kuuntirós ga dalaa/ balaango, Ala heé muruú tawo gu eeharaahár i fuqurángw konká.

¹² Heé tlaákw gár inós wa hariimaaká gan ilatleeruus, Ala heé ganaá' ku baloó dinqisiiká.

¹³ Tlakusmo kun oh nee axweesanoó afkós, Ala heé hota ganaá' in kotsqoot baraá slahh'amuuwo.

¹⁴ Hee hhooeemaá bu'uutá' gin sláy ar axweesanoó afkós, nee kun buu' ar qoomoó gadiyér dabaawós.

¹⁵ Heé daktani ngiwa xui umuú gaaro ar i tlehhiiti i ganá', Ala heé sagaloó' i gurbu'úngw axamiis.

¹⁶ Heé daktani bir haylór lehhiit ku geehhoó'. Ala heé sagaloó' /ooslisliingw gu waaqaqaa'.

¹⁷ Heé looeemaá axweemamiís lamabu'úngw ló' gun kah, Ala lamabu'usmoó lamusmo gár i kaahi a al/ayma.

¹⁸ /Ayma'aá slamhhamis i múk tlaaqaná' adór tsataay. Ala axweesanoó heé sagaloó' hee gu slaqwa hhooár i huuw.

¹⁹ Axweesantá ló' i baloó qwatká. Ala axweesanoó lama oo qoomár niina.

²⁰ Al/ayma i baraá munér múk tlakweemaá eeharaahár, Ala múk muruú ganaá' gu qoomeemeés ta qwalalaa/.

²¹ Heé hota ganaá' gár tlaakw gu sleeraaká. Ala múk tlákw slahh'amu gi halelee'.

²² AAKOÓ MUNGÚ heé lamusmo gu waak. Ala mukdá' sleémeero oo inkihhimúr hoót gun saqwalalaa/.

²³ Heé sagaloó', sagalooarós gan baraá duxúr uhis. Ala daktani daktu'uumarós gan dindirmár uhís.

²⁴ Heé ilakaahaár gadiyeede i waawuti'ín, Ala heé tli/usmo i lawaali'iit.

²⁵ Heé xuruumiít baraá muunaáwose i huu', Ala /aymuú tsuú' gun qwal/atis.

²⁶ Heé hota ganaá' hee gu tuu/ baraá qwanaywo, Ala múk tlákw loohir'ín gi húp baraá qwanaay.

²⁷ Tli/usmo sluqoorós ga huurinká. Ala heé ilakaahaár daqaari'iimár hho' ga sláy.

²⁸ Baraá lohdaá ganaa'a'a slafiingw i deer. Ala loohír tlakweema hee gun qwaarés.