AXWEESANOÓ SAGALOOA 11 - Biblía Axweesantá Hhohho' ar Mungú 2004

¹ Qoomoó al/ayma AAKOÓ MUNGÚ gu waak, Ala qoomoó alqoóm inós gu sla'atamís.

² Qoomár daara/aangw bar naa dáh baraawaslaay sleeme nin dah, Ala heé taa niinawees i sagalooár kón.

³ Heé hota ganaá' kun geerahaar nee gan'amuuwós, Ala al/aymusmo ku qwaarees nee al/aymaarós.

⁴ Daqaari'iima hee gu gaa wa bu'uká qoomár qwanaywo, Ala hotaá ganaa'á' hee ngu tu/iyá' dír gwa'araro.

⁵ Hotaá ganaa'á' awa heé lo'o wásl loohirós ngi qwatsiyá'; Ala múk tlákw ta huu' asma tlakweemaaín.

⁶ Heé ganaá' ku tuu/ nee hotaawós kudá' ganaa'á', Ala múk tlaahhír qamiím ku ohín nee ilatleerir'ín.

⁷ Heé tlaákw bira gwaá' harahhifoorós sleeme in qwát, Harahhifór heé Mungú gu ilaiwawa/aaká in qwát sleeme.

⁸ Heé hota ganaá' baraá slahh'amko kun tuu/. Heé tlaákw afkós guri /aay.

⁹ Heé Mungú gu ilaiwawa/aaká inslaawaywós gun qwaarees ar afkós, Ala heé hota ganaá' xu'utirós gun tú/.

¹⁰ Múk hotaaín ganaa'á' bira diihhe'eés gixsa in qwalá/, nee qoomár múk tlákw bira qwaár muu in tseeamín ar bara/.

¹¹ Tsuuqaá heé hotaawós ganaa'á' i slay, gixsa ngi iiatleeresiyá', ala gixsa in qwát as afér múk tlákw.

¹² Heé inslaawmoowós gu biibisiím fuquraangós i kaahh, Ala heé muruú tsatsahhaám in dirós i xasliit.

¹³ Heé takaahi gar hi'iimiít i naaqór duxún. Ala heé qeeruuwós inkihhím i muruú lu/uu/ún.

¹⁴ Geerahar'uuma bir káhh xooro i qwát. Ala dír hara'ayuusér yaariir iwa deér amohhooa i deer sleeme.

¹⁵ Heé dugno gwa qaas daanduú dahaymoó wa ale naxooro ga xuxuu', ala heé muruuwí oo dugeeni qamiingw gu ahhiít ku amohhoó'.

¹⁶ /Ameenír hhoo' ilaiwa/ame ga sleér, nee hhawaatuú ilakaahaár i daqaari'iit ló'wa alé.

¹⁷ Heé gurhhoó' a kilós tina sa hhooáy, Ala heé xaraásl tin kilós slahh'eemiis.

¹⁸ Heé tlaákw baraá tlakweemaawo slaasláwár kumiit ga slayká; Ala heé hotaawós ganaa'á' slaasláwár ló' ga sláy.

¹⁹ Heé gan'amu tlehhtuuwo baloó mune siasiaaká in slafaafín, Ala heé baraá tlakweemaá wa kumamiít i gwaa'.

²⁰ Heé saga gawít ku waak nee AAKOÓ MUNGÚ, Ala inós ku qwal/atamis nee mukdá' hhooeemaá tlehhiít.

²¹ Looeemaawo heé tlaákw muxtaaro ku pa/asiiká. Ala mukdá' hota ganaá' i /úy.

²² /Ameenír hhoohhoo' bar ka sagawasl, a adór sixmoó sahaábu oo gawaá duungaá baynamií dirií'.

²³ Heé hotaawós ganaa'á' gár i slai a hhooa. Ala harahhifór heé tlaákw a xarasleema.

²⁴ Heé gurhhoó' muruuwós hanmisuuwo, daqaari'iimarós in ak doogiín. Ala /akusmo in ak narkuut.

²⁵ Heé gurhhoó' i diihhe'ees. Heé hee gwaa wahaas ma'aywo, inós sleeme ku wahaas.

²⁶ Heé balángw lu/u/uúm ku lu'us nee muu. Ala heé gu weermiís ku tsuuq.

²⁷ Heé hhooeemaá leelehhiít ar ilakaahara A amohhooa gan leelehhiit, Ala heé muruú tlákw gu mitsiím gu sláy.

²⁸ Heé daqaari'iimarós ga harahhiíf i huu', Ala heé hotaawós ganaa'á' i slu/ubiibín adór gitsór naa/.

²⁹ Heé múk do'ós baramaanuús tawo ga aal. Nee heé daktani iri lawali'iit dír heé sagaloó'.

³⁰ Hotaá ganaa'á' a mamaá xa'anoó slafiingw. Heé sagaloó' ga aleesláy muu nguwa afa/asli.

³¹ Bar heé hotaawós ganaa'á' bu'utu gun sláy baraá yaamú wa alé, áx alók a adoomá dír heé tlakweemaá tlehhaahhiita nee aa dee/anuuti.