AXWEESANOÓ SAGALOOA 10 - Biblía Axweesantá Hhohho' ar Mungú 2004

KITAÁBUÚ TSÁR Axweesanoó sagalooa oo Solomon

¹ Axweesanaywuú sagalooa oo Solomon. Garmoó sagalooár koóm baabuúwós gu qwal/atimis, ala garmoó daktani aayoorós gan gurhaamírár gaas.

² Daqaari'iimár taa sleér ar /ayta hee gu gaa wa bu'ká, Ala gan'amu hee gu tuu/ baraá gwa'araro.

³ AAKOÓ MUNGÚ heé gan'amuú koóm gu baraá qwárkwí mayká iwa gwaai; Ala ilaatleerír heé tlaákw gan amór saáwí kwaahh.

⁴ Heé sololoó' gadiyeede i narkuut. Ala heé ilakaahaár i daqaari'iit.

⁵ Garmoó sagaloó' qoomár fiiqituuwo in burumburín; Ala sangareusmo qoomár fiiqituuwo, nu mureekees.

⁶ Heé ganaá' tsuuqa gi sláy, ala afkú heé tlaákw gár gwaa hatsis a afaatli/a.

⁷ Múk gan'amuú koóm bur inslasleér a tsuuqa, ala umuú heé tlaákw a adór gár aa dix.

⁸ Heé sagaloó' baraawose hara'aya ga axamiis, ala daktantá axweesani yaariir i hhitirút.

⁹ Heé tsaamúr hoót ku saxamaár, ala heé tatamba tlákw ku geehhoó'.

¹⁰ Heé kutliím ar ilaawós slahh'amu ngu huuw; Ala daktantá axweesani yaariir i hhitirút.

¹¹ Afkú heé ganaá' a kutltá slafiingw, ala afkú heé tlaákw gár gwaa hatsis a afaatli/a.

¹² Aahhi i foluú huwaahúp, ala sla'aari tlakweema sleémeero gin lú/.

¹³ Múk tsaahhár koóm axweesany'ín oo sagalooa; Ala daanduú heé ia' wásl gár iwa harin a hhara.

¹⁴ Heé sagalooár koóm xu'uti gan amohhe'eemiis, ala daktana bir axwés qwanaay naa tseewúy.

¹⁵ Dír daqaarmoowo, daqaari'iimarós a adór gixsár /uuruú koom, ala qwanoó narkutmo gár gu huuw a narkuuwós.

¹⁶ Bu'utuú heé ganaá' a slafiingw, ala slaasláwár heé tlakusmo aqo tlakweema.

¹⁷ Heé intsaahhatisár axamiís i baraá loohír slafiingw, ala heé gurbu'utá siasií' aa qwaár.

¹⁸ Heé aahhirós gaa luu/ a hhaahhafusmo, heé daanduú heé axweés a daktani.

¹⁹ Dír axweesanoó yaariír iwa deér tlakweema i kahhiaaká, ala heé afkós gwaa har'oh i daharuú kón.

²⁰ Tsifrángw heé ganaá' a adór peésár hhohho', inslawoó heé tlaákw a adór gár tawo.

²¹ Axweesanoó heé ganaa' múk yaariír gu /iis, ala daktana in qátl as tsaahha wasle.

²² Tsuuqaá AAKOÓ MUNGÚ i daqaari'iimár huwahuwiyá', nee gár tlii/ ngi tsuuqaá al haniisiiká.

²³ Dír daktanto tlakweema tlehhit a adór neeto, ala dír heé tsaahhár kooma sagalooa i sla'atimís.

²⁴ Gadaádá' heé tlaákw i da'ayumiti gu sleér, heé ganaá' gadaádá' i slai ka haniis.

²⁵ Bambaao bira waaráhh heé tlaákw in qwaar, ala heé ganaá' in kumaamiit ay kureeraá kureér.

²⁶ Adór saaxí baraá afko i diri', nee adór quui ila' ngir /aa/amamis, an adór tli/usmo dír múk gwaa gadiyeédií saayini.

²⁷ Slafíngw heé AAKOÓ MUNGÚ ilaiwawaá/ ku tleerees, ala hotaá heé tlaákw ki hartsaat.

²⁸ Heé ganaá' harahhifoorós gu hardahás baraá qwala/, Ala heé tlaákw harahhifoorós gu gaa wa bu'uká.

²⁹ AAKOÓ MUNGÚ a koo/ír gawit ar heé ganaá' i gogoowi, Ala múk tlakweemaá tlehhaahhiít gu hhaamiís.

³⁰ Heé gan'amuú koóm ku baloó hingeesiiká ay kureerisleém, Ala múk tlákw i hootiiká baraá yaamuwo.

³¹ Afkú heé ganaá' gár i kaahi a sagalooa, Ala axweesanoó saga gawda kun amoosíng i sii'.

³² Múk ganaá' gár axweesanto hariim ga xuu', ala afér múk tlákw gár i axwes a axweesanoó lama.