AXWEESANOÓ SAGALOOA 1 - Biblía Axweesantá Hhohho' ar Mungú 2004

KITAÁBUÚ GEERA Sagalooa ka afhhamít

¹ Kaangwí an axweesanoó sagalooa oo Solomon garmoó Daudi, waawutmoó múk Israeli.

² As muu sagalooa nee naanaqa ngiwa slay, nee axweesanoó xu'uti nguwa tsaahhiya'.

³ Nee kiwa intsaahhatisi sagalooaro, nee gan'amuuwo nee sakwasleemár ganaa'a nee daanqasaro.

⁴ As múk xu'uti wásl fuquraangw nguwa slay, nee masoomo iwa magaahhi nee xu'uti ngiwa slay.

⁵ Heé sagalooár koóm ngi axaasi, nee nguwa sagalooár i dok, nee oo xu'utír koóm iwa hardihi dír gurbu'utá gu fuqurángw i haniis.

⁶ As kahhó' axweesanoó sagalooa kuwa xui, nee oo slaqsi'i, nee axweesanoó múk sageloén nee siníkar'ine.

⁷ AAKOÓ MUNGÚ kuwa ilaiwawa/i an iimu/úngw xu'uti. Ala múk daktana sagalooa nee naanaqto ngi waaqaaqaiyá'.

Gurbu'úngw masoomba

⁸ Garmaaeé', gár baabuúwók i kaahi iiárií i qaaseek, tam dabér aayiírók ma siaar.

⁹ Asma muruuwí i adór slamángw sagók tleehhiit, nee adór himtuú gawaá istók.

¹⁰ Garmaaeé', múk tlakweemaá tlehhaahhiít bur afa /aslín, kuúng ma ya/amaar.

¹¹ Bir kaahiya', «Góh ti alkoomaán a giirór awaán as tseerdu kiwa ku'uusaan, heé dakuúsár koomaaká kuwa hariawaan tam gaa i kahha.

¹² Kiri slafiingw gu/aán adór gi'í wá ale, sleémeero in qwaareesaán, adór múk aa /eet baraá /aanta.

¹³ Daqaní daqaari'iimár afhhamít a slawaán, nee marayrén ngay niiqimaán haasaange.

¹⁴ Qwaláng dirén ti haragwaa'aán, daqaní umuú gaaro an eemaán.»

¹⁵ Garmaaeé', baraá loohiro miti alkoomara' nee inooín, yaaeerók ilaa/eek miwa daqeér baraá lohuuín.

¹⁶ Asma ya'aaín i gaansliná' baraá tlakweema, inooín i kararasliyá' as tseere kawa ku'uusi.

¹⁷ Naqfí qoomár barka qamín tsir/o birngi ga/eér. daqaní gár kasa qaás a tawo.

¹⁸ Ala mukwí a tseerduín gin gigdín, nee hhintleemooín ngin haramamahhamitiyá'.

¹⁹ Adoorí an adór lohaá múk daqari'iimár ilatleeruús i dirii'iya'. Slafingw'ín kudá' i kona' ngun qwaareesiyá'.

Sagalooa i ateetiín

²⁰ Sagalooa i ateetiín baraá lohduú wa alé, dír waaraangiro in tseeamiín.

²¹ Dír boo/oó muu i dirii'i iqo axwés, tam dír afkú gixsaro i axwés.

²² «Aá múk iimi boó/, iimiboo/arhúng tisíng ka sla'aa'aanda' ay xaylá? Nee múk waaqaqaá' ay xaylá waaqaaqa' ku sla'aa'an, nee daktana ay xaylá xu'uti ngi ahhahhitiya'?

²³ Warqawé' as nuwa gurbuú'. Daqaní án kuungá' nu fuqurangw'eéní haniís. Axweesante'eé' kari tsahhá'.

²⁴ Án kuungá' nuna ateetiím ooimaro tari sié'. Nuri dabár ateetiím sleeme, ala heé qaytsimiít i kaahh.

²⁵ Ala kuungá' gurbu'ungw'eé' una waaqaé' nee naanaqangw'eé' ugwa gaárí xui'iiká.

²⁶ Deelór slahh'amu bura sleeré' aníng an gwaá' qaseengo, bál bar de'e naa eér nuri niqmís.

²⁷ Deelór de'ér bambaao burunda eér, nee slahh'amuhúng birinda hardáh adór bambaao, gusisiingw nee slahh'amu burna i hardihiyé',

²⁸ baalaadae aníng in atetá', ala a ooimaaká. Iri leelehhitá' ar ilakaahara, ala i aanda'aaká.

²⁹ Asma kuungá' xu'uti ana ahhé', slám AAKOÓ MUNGÚ kuwa ilaiwawa/a' aga tsawdi'iiká.

³⁰ Gurbu'ungw'eé' ugwa ya/aandi'iiká. Naanaqangw'eé' sleémeero kuri waaqaé'.

³¹ As adoorí mamaá gadiyérhúng i /agá', gur'erhúng iri tlaanduumít as al/aymarhúng.

³² Asma muu bira sií' baraá iimibo/ár wa alé an gár gi tsuu/, nee daktana bar daktu'uumar'ín ngaa algeemayé' gi hhaamís.

³³ Ala umuúqo heé aníng i iiárií qamiima ku diihhoó', inós iri yaandahhe'ees tam gár gu dae tsaat i káhh.»