AMOS 9 - Biblía Axweesantá Hhohho' ar Mungú 2004

Sakwasleemár Mungú

¹ AAKOÓ MUNGÚ una ár aa sihhiít bihhaá kitángw ilahhooa kawa hanmaamisi, iri báy, «Uheemaá doó Mungú kudá' taa qaalín slahheek ay dír ihhafiirír do' i diingit. Uheemiiká' giqaweek ay dír ni huuhu'una' gawaá sagér muu sleémeero. Kudá' naa meetiye' diisíng wa alé, aníng in alhhe'eés ar paánga. Tam oo goów i kaahh, tam oo kotsqoót i kaahh.

² «Inooín tam i /eetiia baraá gi'i, aníng in baraadá' wa duúx, inooín tam i tsa/ana'a gawaá doori, aníng ngin gawaadá' wa aweeriís.

³ Inooín tam ta nahhmituú aya gawaá tsitsantá tloomár Karmeli, in gawaadá' wa kwarkwaár, tam naa nahhaatiyé' baraá iltá tlawi as ngiwa araaká, dayshamo un ya/aáw amoodá' i ale as ngiwa baraadá' wa /ur/uri.

⁴ Inooín tam bar kira tláy nee wakuuser'ín kiri loohatís, aníng paánga an ya/aáw amoodá' i ale, inooín kiri tsuu/. Aníng inooín in harmagaáhh ngiwa hhaamiis, ala gár hhoo' dir'ín i tleehharo a sla'aaká.»

⁵ Aakoó MUNGÚ Aleesleemusmo, kudá' yaamu gi kwatiít, niri weeqiyá', nee kudá' sleémeero baraadá' hootá' nay tsuunqumiisiyá', yaamu niri sluufiyá' niri /aaruyá' adór ma'aá yaaér Nili ar yaamaá Misri.

⁶ AAKOÓ MUNGÚ dír hotaawós gaa tleéhh gawaá doori, yaamu giri harweér ar doori. Inós an kudá' ma'aá baraá tlawi gi ateét giri ku'uus baraá yaamaá kaahará', inós umuuwós ku bay AAKOÓ MUNGÚ.

⁷ AAKOÓ MUNGÚ i kaahi, «Xáy, kuungá' múk Israeli, dimbé iqo deéro nee múk Kushi? Múk Filisti una duúx baraá yaamaá Kaftori wa ale, nee múk Aramu baraá Kirír wa ale. Ahaá aníng xoorór Israeli ngaa duuxikáhe baraá yaamaá Misrír wa ale?

⁸ Qaytsiít, ilaá Aakoó MUNGÚ waawuti'iimár tlakweemaá tlehhahhiit ngin ga/ayá', ngiri hhitiím nee ngay diyaá/ gawaá daanduú yaamuwo. Ala doó Yakobo u ak suquwaaká. Anuú AAKOÓ MUNGÚ tí ngina oó'.»

⁹ «Qaytsiít, aníng hara'aya a oó' múk Israeli kuwa haritleesi baraá xoordu sleémeerowo ar adoodá' angaáno kur haritlemamiisi ar iimpe, as kudá' ganaa'a'aaká ngiwa ohiim.

¹⁰ Múk tlakweemaá koóm baraá muk'eene kun tsuu/ ar paánga, kudá' kaahá', ‹Atén gár tlaakw ar ti slaw i káhh tam ar niiná.› »

Múk Israeli ku diihhooár i ki/is

¹¹ «Baalaarihe aníng doó Daudi kudá' aa huu' u tleéhh, nee koo/idá' aa hhitirut an tleéhh, aníng sluhhaywós kudá' aa huhu'un u sihhtís, gixsadá' an malé tleéhh ngay adoodár aángií ki/ís.

¹² Daqaní múk Israeli panayduú múk Edomu guri baal, tam nee xoordu sleémeero kudá' taa umuueénár ateét sleeme. Anuú AAKOÓ MUNGÚ kudá' muruuwí gu tlehhiít tí aga oó'.»

¹³ AAKOÓ MUNGÚ i kaahi, «Qaytsité', qooma ni hardát ar heé doósl kuwa ar ba/i nee heé bu'uúm, nee heé sabiíbuú tsoo/iít heé dahaasiím gu aleesláy, tlom'i difaáír tsuu' ngi duuxiyá', gongooama difaái ngi duuxiyá'.

¹⁴ Aníng muk'eé' kudá' aáng taa loohatís ngun ki/ís baraá yaamuuín, inooín gixsaduín kudá' taa geexáy ngin tleehhiyá' ngiri hootiyá', sabiíbu ngu dahaasiyá' baraá qamuuín, nee difaáir'ín ngiri wahaná'. Inooín qamu ngin dahaasiyá' ngiri balángw wa /ayiyá'.

¹⁵ Aníng i qaás baraá yaamuuín i ale, ala hingeesaro ki aleeslayká baraá yaamuudá' naa dir'ín i haniisi. Anuú AAKOÓ MUNGÚ, Munguúwók, tí aga oó'.»