AMOS 8 - Biblía Axweesantá Hhohho' ar Mungú 2004

Iigu'utuú tsiyáhh: Lakwaantír mamaá koom

¹ Aakoó MUNGÚ ina iigu'utúy laqán. Aníng niri qaytsiít, lakwaantír mamaá koom awa naa hamaariye' ngiri ár.

² AAKO aníng iri báy, «Ámos, gár taa aán?» Aníng niri oó', «Gár naa ár a lakwaantír mamaá naa hamaariye' gi koom.» AAKOÓ MUNGÚ iri báy, «Alhhe'eesoó muk'eé' oo Israeli naa hardáh, aníng tlakweemaaín i malé gurtlawaaká.

³ Baalaadá' bira xeér, daa'ángw Doó Mungú a tsuunqumis. Anuú Aakoó MUNGÚ tí aga oó'. Tuaá yaariir nay tlufaafuiyá' umuú diiro, kiri qawti kwakwaahh.»

Hhaamisár múk Israeli

⁴ Axáy, iia qaasaak, kuungásingá' múk liitlakwén ngu baramaanuusá' nee narkuutér faakár wa sla'á'.

⁵ Slám a malé kata', «Slahhángw /abén xaylá u oohaán as balangwrén kuwa iimu/umaan weeramisuuwo? Nee deelór Sabaáto i fak a xaylá as balangwrén kuwa weeramisuú awaan? Xooslmoduú qoomeemes kuri afa fiitsaán as peésár yaariir kawa slawaan, muu un al/agiimaán ar qoomoó lama.

⁶ As daqaní atén múk narkuute kurí tlaxwaán ar peésa, nee múk aleeleém kuri tlaxuumaán ar tlaxór ya/ata', nee angaáno kuri muundoó al weerisaán.»

⁷ AAKOÓ MUNGÚ lo'o gaa huúw as daara/ángw Yakobo, i kaahi, «Tiqá' Yakobo aa tleéhh dir'eene i baloó qwatká.

⁸ Gawaá adoorihe yaamu niri daaraxatiyá', nee kudá' baraadá' hootá' niri tsuunqumisiyá'. Nin tsa/aná' nay aweeriyá' adór ma'aá yaaér Nili ir hatsina' niri /aaruyá'.»

⁹ Aakoó MUNGÚ i kaahi, «Baala ni xeér ar aníng tsee/amá nguwa looár lahhoó' ii dahaas, yaamu giwti giri tuuntúk tlaatla/ángw ale.

¹⁰ Aníng deelorhúng ar ur an warqeés tawa deelór tsuunqumis, nee daa'angwhúng sleémeero oo bara/ tari /aa/e, kuungá' sleémeero guniyadu kiri tsitá' as gurhaami, nee sagerhúng kari deqwá' adór xwayliitér /aa/amiim as garmoó aayoorose wák ina kahhuút, nee deelór alhhe'eesaay tay slahh'amuú úr.»

¹¹ Aakoó MUNGÚ i kaahi, «Qaytsiít, baala ni xeér ar giyeé ngiwa tlees baraá yaamuwo, ala a giyér muruú /aymarooká, laqaá ar waxér ma'aá wahangooká, ala a giyér axweesantá AAKOÓ MUNGÚ kawa dakuusi axaasaro.

¹² Muu iri toonganuus tlawtaqá wa tleemu ay taqá', tari /iikú wa tláy ay da/aáw, tari ti'ii'ín amorqá' nee taqae as axweesantá AAKOÓ MUNGÚ kawa leelehhiiti ala ngi slay'aaká.

¹³ «Baalaadae masoombár slaqo hho' ar daaqaay nee dasuwo tari /araarán as waxe.

¹⁴ Kudá' lo'o ngaa /ayiye' ar umuú munguúín kudá' ta bay Ashima, oo gixsár Samaria, iwa kaahiya', ‹Ar adoodá' munguú Dani ir daadeér,› nee ‹Ar adoodá' munguú Ber-sheba ir daadeér,› mukwí i huuhu'ún, iri baloó sihhiitiiká.»