AMOS 7 - Biblía Axweesantá Hhohho' ar Mungú 2004

Iigu'utuú sakwasleema, iigu'tuú geera: Ingigi

¹ Aakoó MUNGÚ ina iigu'utií laqán. Aníng niri qaytsiít, AAKOÓ MUNGÚ una ár i daqtá ingigitá tlehhiit qoomár gitso iwa harma/aama/, tidá' muu aa tsaát as hikwaá doó waawutmo. Qoomaadá' an tidá' gitso iwa malé harma/aama/.

² Baraá iigu'utueene ingigi ana ár, umuú gár qantsare gana /ák ar sa baraá yaamií diriia. Aníng nari oó', «Aá Aáko MUNGÚ, na'ás án kuúng u harhhehhe'eés, mukók gurtlaweek, adór xwaylár Yakobo ir hot a adoomá? Inooín a na/aá ninakw.»

³ Aakoó MUNGÚ guruuwós iri tláy, iri oó', «Adoorí i tleehharutká.»

Iigu'utuú tsár: Asla

⁴ Aakoó MUNGÚ ina malé iigu'utúy laqán. Aníng niri qaytsiít, AAKOÓ MUNGÚ asla gana ateét as sakwasleema. Asltadá' iloodaá tlabeemo gina /ák, tam yaamaá kaahaar sleeme gina iimu/uún /aymaaro.

⁵ An qoomár aníng niwa oó', «Aá Aáko, MUNGÚ, na'ás án kuúng harhheehhe'eés, mukók maweek. Adór xwaylár Yakobo ir hot a adoomá? Inooín a na/aá ninakw.»

⁶ AAKOÓ MUNGÚ guruuwós iri tláy, iri oó', «Tí sleeme i tleehharutká.»

Iigu'utuú tám. Gár qoomeemes

⁷ AAKOÓ MUNGÚ ina male iigu'utúy laqán. Aníng niri qaytsiít, Aako aa sihhiít bihhaá koo/ír taa qoomeés ar hhutlmoó taa saga muqslír i tseék, inós hhutlmoowí gu kón.

⁸ AAKOÓ MUNGÚ aníng iri báy, «Ámos, gár taa aán?» Aníng niri oó', «Gár naa ár a hhutlmoodá' taa saga muqslír i tseék oo ta dó ár qoomeemeesi.» Naagáy Aako aníng iri báy, «Qaytsiít, hhutlmoowú qoomeemes un qaás baraá tla/ángw muk'eé' oo Israeli, mukwí daxta aníng u baloó gurtlawaaká.

⁹ Kiteeridaá saaliingw gawaá tlom'i awa doó Isaka ki fee/, nee wa/angwdá' hhohhó' oo múk Israeli ku taangu tleehh. Aníng tlahhoó waawutmo Yeroboamu un hhaamiís ar paánga.»

Amos nee Amasia

¹⁰ Aluuwo kaahamusmo Amasia oo gixsár Beteli afo gari ya/aáw amór waawutmo Yeroboamu oo múk Israeli, iwa kaahi, «Amos kuúng un safoliit dír mukwí alé, axweesanaywós kwí saqitluuwo u aslawanaaká.»

¹¹ Asma Amos i kaahi, ‹Yeroboamu ku gaas ar paánga, nee múk Israeli kurir tláy, kuri loohatis yaamaá saáw i alé.› »

¹² Naagáy Amasia, Amos guri báy, «Aá iigu'utusámo, quútl, tláw ay baraá yaamaá Yuda, muruú /ayma ku amoodá' wa /ák, nee ta aaririín amoodá' wa ale.

¹³ Ala ma malé ki/aar tawa aaririin diirír Beteliro, asma diirí an didá' hhoohhoo' ar waawutmo, slám diirí a doó saalíngw waawuti'iimarí.»

¹⁴ Amos Amasia guri báy, «Kuúng ka xu' aníng a aarusmoodá' aaraariíma as bu'utu nguwa slay. Aníng a eeharusmoó aarusmowooká sleeme, ala aníng an de'eemusmo, nee heé /aantsír amohhe'eemamiís.

¹⁵ Ala AAKOÓ MUNGÚ aníng ina leéhh baraá gadiyér'eé' tí ar de'eengw, iri báy, ‹Tláw aaririím dír muk'eé' oo Israeli.›

¹⁶ «Gimáy, daxta axweesantá AAKOÓ MUNGÚ iiárií qaaseek, kuúng a kat, ‹Ma aaririimaar daanduú múk Israeliwo, tam dír xwaylár Isakawo ma dahareemisaar.›

¹⁷ Gawaá adoorihe, AAKOÓ MUNGÚ i kaahi, ‹Hareerók i tsaatuso'o tleehhít baraá gixsaro, na/iiwók awa daaqaay nee awa dasu ki tsuu/ ar paánga, nee qaymoorók kan qasiis dír múk hatlá' ar hima, kuúnguú kilá' a gwá' baraá yaamaá naa meeta gwaaiye', nee múk Israeli kun loohatis amór saáw i ale dír yaamuuine.› »