AMOS 6 - Biblía Axweesantá Hhohho' ar Mungú 2004

Hhaamiisár múk Israeli

¹ Tsaxwaahúng kuungaásingá' aga yaandahhe'eese' baraá Siyoniro, nee tsaxwaahúng kuungaá amohhooár hootá' gawaá tloomár Samaríaro, tunduwa ga/ay a waawituú xooroodá' iia tleer tidá' múk Israeli aa haraahhiíf.

² Gimsé', qaytsité' baraá gixsár Kalne, daqaní ta kumitá' ay baraá gixsadá' ur ar Hamati, nee ta baráy /etá' ay yaamaá Filisti dír gixsár Gati. Xáy, inooín an ak tsiníhe ta yaamaá Yuda nee Israeliwo? Xáy, yaamuuín ki úre ta koohunge?

³ Kuungaásingá' deelór tlaakw ngi amór saáwí haraaxuá', /ayta bihherhúng i tseewemisá'.

⁴ Tsaxwaahúng kuungaádá' qaqtimá' baraá qateenaá taa parootuús ar xareemaá daawe, nee kudá' ti alduxuumá' gawaá qateenoodá' bununuuqá' wa alé, fu'unaá deeloó bee/aangw kiri /agá' nee tari damaá lehhitá' baraá slumo.

⁵ Kuungaásingá daa'ángw gaa wásl daa'á' ar mariímba, ahaá waawutmo Daudi muhar aleealusá' ar xoslaá daa'aangw.

⁶ Kuungaásingá' difaáír wahaamá' ar isangaa'áy nee ti kiloohúng slikimá' ar di/tá mooyángw koom, ala a gurhaamuta'aaká daanduú qwanoó xwaylár Yosefuwo.

⁷ Gawaá adoorihe kuungá' hamí an múk ta giirisi huwtá baraá lawaali'iimaro, nee mukdá' aa aftlin dír muruú /ayma, ala muruú /aymaasíng tar qwalee/inda' nuri afa baa/.

⁸ Aakoó MUNGÚ lo'o gaa huúw ar umuuwós, AAKOÓ MUNGÚ, Munguú Aleesleemusmo i kaahi, «Aníng ti buhhtamis nee daara/ángw múk Yakobo, nee koo/irós tidá' aa parootuús aníng aga aáhh. Gawaá adoorihe gixsarí aníng a haniís dír wakuuse dinkwa nee umuú gaaro ar baraadií diriia.»

⁹ Ala bar múk mibaangw aa meét baraá doó wake, inooín sleémeero aqo nin qatliyá'.

¹⁰ Qoomár maamáy tuuadá' taa daá/ birngi tse/aá i duux, heé aa baraá qul/ír dóií nahhaat bir deer, barngwa báy, «Heé aa meet i deéro?» Heedaádá' in ooi, «Tumu wák i kaahh.» Ala iri ooi, «shi-shi-shi-shi xásl asma umuú AAKOÓ MUNGÚ u ooanaaká.»

¹¹ AAKOÓ MUNGÚ hara'aya gaa oó', doó úr iri feehhamiit, doó niiná iri suwa tleehhiit.

¹² Xáy, faras iqo ta'aaína gawaá daanduú tlaa/aro? Xáy, hee tlawi gaqo doósli ar awe? Ala kuungá' sakwasleemár ganaa' aga warqesé' tawa qara, nee mamaá hotaá ganaa'á' iga adór hhamaandú tlehhé' qarqaraywo.

¹³ Kuungaásingaá qwalala/á' as gixsár Lodebar kawa hayoté', slamí tin xirfayeemisá' tawa kata, «Ahaá, Karnaimu aga hayohanikáhe ar /uuruurén?»

¹⁴ AAKOÓ MUNGÚ, Munguú Aleesleemusmo i kaahi, «Aá múk Israeli, aníng xoororka ngi tleés amorhúng i alé, kuungá' tunduri slahh'eemiis iimír afkú dahmaá Lebo-hamatír wa alé, ay dír duxuú Araba.»