AMOS 4 - Biblía Axweesantá Hhohho' ar Mungú 2004

¹ Axweesantí iiárií qaasaak, kuungaá /ameenár Samaria, ar aa wahhdit adór hikwaá yaamaá Bashanír ale. Kuungaádá' narkuutér baramaanumaamisá' nee mukdá' haleleeamiít, kuungaádá' hhawaateín ngi babaawá', «Gimsé', difaái huware', a xufaán.»

² Aakoó MUNGÚ kudá' hhoohhoó' lo'o gaa /aáy, «Qaytsité', qooma i xeér ar kuungá' tunduwa uruuxun ar him'e, tari adór siyoó gawaá baraatsufáy wa tarereamiít.

³ Kuungá' tundu duruux ar dír taa fooxiís baraá koo/iro. Umuú /ameeniro nee loohirós, kuungá' tunduri kwaahh amór Harmoni. Anuú AAKOÓ MUNGÚ tí ngina oó'.»

Múk Israeli tlakweema gaa baloó mayká

⁴ «Qwalaasé' amór Beteli as tawa dakusa'. Qwalaasé', amór Gilgali as tlakweema kiwa alkoondá' tlehhtuuwo. Ilahhooarhúng ar muruú ta tsu/i huwaare' umuúqo matlaatleero, nee umuúqo bál tame ilahhooarhúng ar sluufaay ngi hubá', umuúqo gár wák baraá muruú mibaango.

⁵ Ee, gimsé', xáy, kuungá' ilahhooár murú ta tsu/i ar sluufaay ar mikaátér taa sluuftís haniisaak, ilahaniisaak umuú diiro adór ilahhooa kara hanisé' ar muunuú /awaák. Asma an adoodá' kuungá' kar sla'a', kuungaásingá' múk Israeli. Anuú Aakoó MUNGÚ tí aga oó'.

⁶ «Aníng kuungá' nuna giyeédí tleés baraá gixsaduhúng sleémeero, muruú /ayma kuri dakuse' umuú diiro. Tam adoorihe kuungá' naa amor'eéní ki/iiká. Anuú AAKOÓ MUNGÚ tí ngina oó'.

⁷ «Slám aníng nuna tluwoó /iít qoomár slahheeraá tám niwa meetiyé' hamnoó balaango. Ala tluwaay una haniís gixsár wák i alé, dír gixsár hatlae ngway ilaá/. Baraá qaymór wake tluwaay ina tluúw, nee qaymór hatlae i tluwiiká, iri qor'ót.

⁸ Múk baraá gixsadaá tsár, laqaá tám tan ma'aá leelehhtuú áy baraá gixsár wák, ala naa bu'uti'iiká. Tam adoorihe kuungá' naa amor'eéní ki/i'iiká. Anuú AAKOÓ MUNGÚ tí ngina oó'.

⁹ «Aníng kuungá' nuna slaáhh ar tlaanguú danuú koóm Asalmaahúng nee qamaá sabiíbuuwo niri tawó meetiye', Iingigi /aantsírhúng nee seituúnirhunge gari /ák, tam adoorihe kuungá' naa amor'eénií ki/i'iiká. Anuú AAKOÓ MUNGÚ tí ngina oó'.

¹⁰ «Aníng kuungá' nuna pú/tií tleés adór tooaáng naa tleés baraá yaamaá Misri. Aníng masoombarhúng ana tsuú/ baraá slaqwaarár wa ale, farsuuhúng oo slaqwara una ar tláw. Tu'u baraá marayhúng ngiri dalaa/iyé', tsuts'ir'ín baraá duungerhúng gay hatsís. Tam adoorihe kuungá' naa amor'eéní ki/i'iiká. Anuú AAKOÓ MUNGÚ tí ngina oó'.

¹¹ «Muu bahh'alé baraá tla/angwhunge una hhaamiís, adoodá' múk Sodoma nee Gomora ngura hhaamiís. Panaydá' aa meet baraá tla/angwhunge tay adór xwatsaatsír asla aa meetís. Ala tam adoorihe kuungá' naa amor'eéní ki/i'iiká. Anuú AAKOÓ MUNGÚ tí ngina oó'.

¹² «Gawaá adoorihe, aá múk Israeli kuungá' nu muúx. As adoorí ni dirhúngí tleehha, gimsé' ti amohhe'ese' sakwasleemar'eé' tihe.»

¹³ Mungú an kudá' tlom'i gaa tleehh nee fur'aaro, inós inslawaywós gun dír heéwí oo', inós an kudá' tlaatla/aangw gu xweerí warqeés, nee an kudá' sagér tlom'i ga yaamií adaráh. Inós umuuwós an AAKOÓ MUNGÚ, Munguú Aleesleemusmo.