AMOS 3 - Biblía Axweesantá Hhohho' ar Mungú 2004

¹ Gimsé' daxta, /aymi'iiká' AAKOÓ MUNGÚ aa axweés daanduuhunge iiárií qaasaak kuungaásingaá múk Israeli, xooroorí sleémeero inós naa duúx baraá yaamaá Misrír wa alé,

² iwa kaahi, «Baraá tla/ángw xoordu sleémeero awa baraá yaamuwo kuungá' kiloohúng nun xuú'. Gawaá adoorihe aníng kuungá' nun muúx asma tlakweemaahúng sleémeero.»

Gadiyér aarusmo

³ Xáy, múk tsár taqo tsuwa al'aa'aá káya barnaxes taa kaahi slay'iiká?

⁴ Xáy, diraangw iqo tsuwa aáhhi baraá sla/atá wa alé bar makiito'o ngaa oohiiká? Xáy, na/oó diraangw iqo /oroótli baraá mar'ír wa alé bar gár aa sláy i káhh?

⁵ Xáy, tsir/i kaqo tsuwa oóhi nee tsaaxweeli barnaxés tsaaxweelidá' kaa balaangwí qaasiiká? Xáy, tsaaxweeli iqo tsuwa /akúta, bar gár gaa kwatit i káhh?

⁶ Xáy, tarumbeéta kaqo tawo ufaáhhi baraá gixsaro, muu iri da'ayutiiká? Xáy, gár tlaakw iqo baraá gixsár wa tleehharúta ar amór AAKOÓ MUNGÚ dahhaaká?

⁷ Ar tsuuwa ló', Aakoó MUNGÚ gaa ga tawo tleehhiiká, bar naaqoorós ngaa geehhooeesiiká dír sagadiyuuseerós tidár aaruuse.

⁸ Diraangw bira aáhh, xáy heé da'ayumitaaká a heemá? Aakoó MUNGÚ, Mungú aa axweés, xáy heé kaangwí gu ooaaká a heemá?

Hhaamiisár múk Samaria

⁹ Gimsé', afo ilahanisaak baraá maraydá' gawden awa Ashadodi nee amór maraydá' gawden awa yaamaá Misri, muu bawaak, «Burumburiité' gawaá tlom'aá' Samaria, daqaní ta qaytsitá', wayaqamuú yaariír araak nee /aytár yaariir ar baraadá' wa tleehharumiit.»

¹⁰ AAKOÓ MUNGÚ i kaahi, «Mukwí gár ganaa' tleehhamooro ngi xuiaaká. Inooín muruú fiiso nee oo taa /uurúr hayoohín ngun babatsiyá' baraá maray'ín i alé.»

¹¹ Gawaá adoorihe Aakoó MUNGÚ i kaahi, «Wakusmo ni hardah, yaamu giri harweer bihhe sleémeero, inós /uuruuwók kudá' tar hhawaati'iimaamis gway yaamií daahh, koo/irók tidá' gawit kari hayóh.»

¹² AAKOÓ MUNGÚ i kaahi, «Adoodá' de'eemusmo ya'aá tsár ngir afkú dirángw wa tu/i, laqaá iiár bee/i ngiwa tu/i, an adoodá' múk niiná oo Samaria ir kotsqoti, kudá' hamí guá' baraá qateenaá hhohhó' wa alé, nee inqwaruú hhohhó' ngwa hhafine'.»

¹³ Aakoó MUNGÚ, Munguú Aleesleemusmo i kaahi, «Iia qaasaak, nee doó Yakobo gurbuaak.

¹⁴ Bál aníng múk Israeli bur muúx daanduú tlakweemaine, aníng kitangwduú ilahhooa oo baraá gixsár Beteli un hhitiím sleeme. Xareemaá kitangwdá' sleémeero ngiri yaamií slaáx.

¹⁵ Aníng maraydá' taa tlehhiít as tsaaqwa nee kudá' taa tlehhiít as qoomár siiree/i in yaamií intláh sleémeero. Nee maraydá' taa qaalín ar xareemaá daawe in feé/, tam maraydá' uren i meetisaaká. Anuú AAKOÓ MUNGÚ tí ngina oó'.»