AMOS 2 - Biblía Axweesantá Hhohho' ar Mungú 2004

Múk Moabu

¹ AAKOÓ MUNGÚ i kaahi, «Aníng múk Moabu muxtaaro u mawaaká, as tlakweema ngiwa tlehhaahhitiyé'. Asma inooín fadaá waawutmoó Edomu ngina da/iyé' tay da/ara.

² Gawaá adoorihe múk Moabu aníng u faák ar asla, nee koo/ír gawit ar Kerioti asla gari fák. Múk Moabu barta uú' nee tarumbeéta ngari ufaahhiyé' ni baraá tsimaahhidií qatliyá'.

³ Tam adoorihe aníng waawutmoó Moabu un gaás dinkwa nee geeraharuuser'ín ar hatlae. Anuú AAKOÓ MUNGÚ tí ngina oó'.»

Múk Yuda

⁴ AAKOÓ MUNGÚ i kaahi, «Aníng múk Yuda muxtaaro u mawaaká, as tlakweema ngiwa tlehhaahhitiyé'. Asma inooín dabér AAKOÓ MUNGÚ eeharto ngina si'iyé', tam kaahirós sleeme ngaa oohii'iiká. Ala lamtaín tidá' i tlaqaaqatiya' gay dahás baraá qwanaay tidá' aáng taati'ii'ín naa eehariyé'.

⁵ Gawaá adoorihe asla a qaás gawaá múk Yuda, asla koo/ír gawit ar Yerusalemu gari /ák.»

Sakwasleemár Mungú dír xoorór Israeli.

⁶ AAKOÓ MUNGÚ i kaahi, «Aníng múk Israeli muxtaaro u mawaaká, as tlakweema ngiwa tlehhaahhitiyé'. Asma inooín múk gan'amuú koóm nguna weeramiisiyé' ar peésa, nee narkuutmoó iinár niina gaa harslaaqaat bu'utuwo kuna weeriís ar ya/atá tsár.

⁷ Inooín múk aleesleemuú koomaaká ngun baramaanuusiyá', nee hariímár narkuute kana hayoohín. Garma nee baabuúwós tan fuqtá áy dír dasír wák. Gawaá adoorihe umuueé' kudá' hhoohhoó' nguri meetagaasiyé'.

⁸ Umuúqo dír kitángw ilahhooa i dirii'i, inooín tan qaqatín gawaá tlabaá taa arhaanír wa ohín nee baraá doó Munguúine, difaáír ta xufi an tidá' tinda iinúr bu'ún.

⁹ «Tam adoorihe, aá muk'eé', aníng xoorór Amori ana hhaamiís geerahúng wa alé, inooín tam múk tlede adór sahhtár wa ale, nee tam i /uureemaá kona'a adór ti'ituú wa ale, eeít, aníng haleemiiwós nee dee/áruwose ina qororo'oós.

¹⁰ Aníng kuungá' nuna duúx baraá yaamaá Misrír wa ale, nuri geerahaár baraá xaanxaywo har qoomár kureeri mibeeri tsiyáhh, nuri dahaás baraá yaamaá múk Amori as kiwa ala'.

¹¹ Aníng na/iihúng ina bahh tsawaár tawa aaruuse, nee baraakarka tawa múk al'axweesanoó qamiím. Xáy, a adooríheéke, aá múk Israeli? Anuú AAKOÓ MUNGÚ tí ngina oó'.»

¹² «Ala kuungá' mukdá' al'axweesanoó qamiím una xufiitisé' difaáiro, aaruuse kay beeré', ‹Ma aariirimaara'.›

¹³ Qaytsiité', daxta aníng kuungá' nu al'iilooúw ar adoodá' gaári kar al'iiloouy nee guniyadaá balaangw.

¹⁴ Tam mukdá' ti'ii'íngw xuú' i kotsqotiiká, mukdá' /uureemaá koóm, /uureemooín in faakiyá', tam slaqwaruuse sleeme slafingw'ín gu tu/uka.

¹⁵ Tam mukdá' slaáqw ar maheeri nee ga/aldu asla ngi baloó dan'aaká. Mukdá' ti'ii'íngw baál ti baloó tu/iiaaká, laqaá kudá' farasúr ti'ii'imá' slafingw'ín ngu /iisiiaaká.

¹⁶ Baalaarihe tam slaqwarusmoó guruuwós gwaa tlaa/árí dahaas aqo in ta'aaín ar /aankwets. Anuú AAKOÓ MUNGÚ tí ngina oó'.»