AMOS 1 - Biblía Axweesantá Hhohho' ar Mungú 2004

¹ Kaangwí an axweesantá Amos, de'eemusmoó gixsár Tekoár daáhh. Geehhoeemaá aa ár daanduú xoorór Israeliwo kureeraá tsár geeraá kurkú kunseeliro, de'emaá Usia tawa waawutmoó Yuda, nee Yeroboamu, garmoó Yoashi tawa waawutmoó Israeli.

² Amos ina oó', «AAKOÓ MUNGÚ i xorootl amór Siyonír wa alé, i tseeamín Yerusalemúr wa alé. Qawtaantá de'eemuuse i tsuunqumís. Gitsór tloomár Karmeli i /óts.»

Sakwasleemár Mungú dír xoordaá inslaawoó Israeli Múk Damasko

³ Tí an tidá' AAKOÓ MUNGÚ i kaahi, «Aníng múk Damasko u mawaaká muxtaaro asma tlakweema ngiwa tlehhaahhitiyé'. Asma inooín múk Gileadi nguna muxaaxiné' ar difiitamaá muqsla.

⁴ Gawaá adoorihe aníng asla a qaás baraá doó waawutmo Hasaeli, nee asla koo/ír gawít ar Ben-hadadi gari /ák.

⁵ Afér gixsár Damasko a giqáw nee múk baraá xatstá Aweni nguri diyaá/, dinkwa nee waawutmoó Beti-edeniwo. Múk Aramu kuri loohatis ay Kiri. Anuú AAKOÓ MUNGÚ tí ngina oó'.»

Múk Filisti

⁶ AAKOÓ MUNGÚ i kaahi, «Aníng múk Gasa u mawaaká muxtaaro asma tlakweema ngiwa tlehhahhitiyé'. Asma inooín xooro ngina sleémeeró wa ar tlayé', nee ngiri weerisiyé' as tawa lawaalér múk Edomu.

⁷ Gawaá adoorihe asla a qaás gawaá koo/ír gixsár Gasa, maraywós kudá' gawden giri fák.

⁸ Aníng yaamuloouusér gixsár Ashdodi a tlatlahhaás amór saáw i ale, tam kudá' hhartá waawuti'iimár gixsár Ashkeloni ga koóm. Aníng gixsár Ekroni an alwarqáw, múk Filisti sleémeero kudá' aa meet nguri qwaareés. Anuú Aakoó MUNGÚ ti aga oó'.»

Múk Tiro

⁹ AAKOÓ MUNGÚ i kaahi, «Aníng múk Tiro u mawaaka muxtaaro asma tlakweema ngiwa tlehhaahhitiyé'. Asma inooín xooro sleémeero ngina ar tlayé' ngiri haniisiyé' dír xoorór Edomu. Inooín alqadoodár hhae ngaa inslay'iiká.

¹⁰ Gawaá adoorihe aníng asla a qaás gawaá koo/ír gixsár Tiro, nee asla koo/irós tidá' gawit gari /ák.»

Múk Edomu

¹¹ AAKOÓ MUNGÚ i kaahi, «Aníng múk Edomu u mawaaká muxtaaro asma tlakweema tlakweema ngiwa tlehhaahhitiyé'. Asma inooín hhaeeín awa Israeli ngina slakaatiyé' ar paangadu, inooín tam gurtleemú niiná daanduú hhaeeine ngu kona'aaká. Buhhtaaín nina kumaamitiyé' umuú daqto.

¹² Ala aníng gil'o a ku'uús gawaá gixsár Temani, asla maraá gawdén awa Bosra giri /ák.»

Múk Amoni

¹³ AAKOÓ MUNGÚ i kaahi, «Aníng múk Amoni muxtaaro u mawaaká, as tlakweema ngiwa tlehhaahhitiyé'. Asma inooín /ameenár tsiihaawe ar múk Gileadi ngina gur'e feehhamiisiyé', asma iwa digeemaá yaamuuín intlaaxweemisiya'.

¹⁴ Gawaá adoorihe aníng asla a qaás gawaá koo/ír gixsár Raba, asla koo/irós tidá' gawit gari /ák. Deeloodár slaqwaraaro tsimaahhi ka ló'wá ur, nee slaqwara ka ló'wa hhamhhám adór bambaao.

¹⁵ Waawutmoó múk Amoni ku huuw lawaali'iimár wa alé dinkwa nee mukdá' urén inós gu alee/imiís. Anuú AAKOÓ MUNGÚ tí ngina oó'.»