2 WAAWITÁ 9 - Biblía Axweesantá Hhohho' ar Mungú 2004

Yehu kuwa waawutmoó Israeli wa qaás

¹ Qoomaarír kilae aarusmo Elisha heé wák baraá tla/ángw eeharuusér aaruuseero guri ateét, guri báy, «Ti amohhe'es Ramot-gileadi keemuuwo. Aree chupiito'ór di/i,

² nee bara hardát, Yehu garmoó Yehoshafati nee nángw naangó Nimshi leeleehheek kur baraá tla/afír wa ar súf, dír kuungá' tawa kiloohúng.

³ Daqaní chupiito'ór di/i ka taatáhh, ku saga iimbaláx ar di/i nee ku beer, ‹AAKOÓ MUNGÚ i kaahi, aníng kuúng ugwa iimbalaáx ar di/i as tawa waawutmoó Israeli.› Adoorí bara hhe'és, daqaní afkú do' ku gwét, ta gaanslár ta'aaiín.»

⁴ Naagáy aarusmoowí oo masoomo iri tláy ay Ramot-gileadi.

⁵ Iwa hardáh geeraharuusér slaqwaruuse gari dír kwasleemárií áy. Iri oó', «Geeraharusámo, aníng a /aymuú koóm daanduwoge.» Yehu iri oó', «Heé ta kangwsíng babeer a heemá dír ateékaákae?» Inós iri oó', «Kuúng geeraharusámo.»

⁶ Naagáy inooín tsaraawo tari dáh baraá tla/afi nee aarusmo Yehu guri saga di/tí tsiririxiís nee guri báy, «AAKOÓ MUNGÚ, Munguú múk Israeli i kaahi, ‹Aníng kuúng una iimbalaáx as uwa waawutmoó wa qaás daanduú muk'eé' oo Israeli.

⁷ Kuúng doó aakoowók Ahabu un qwaarés, as aníng li/ay nguwa buu' dír Yesebeli, tidá' tseerdaá aaruuser'eé' gaa ku'us, nee sagadiyuuser'eé' sleémeero.

⁸ Adoorí aqo an tléhh asma doó Ahabu iwa qwaari, slám malé ale umuú hhawaatuwo oo doó Ahabu, lawaalamo laqaá tam lawaalmoowoká aníng i hhaamiís baraá Israeliro.

⁹ Múk do'ós i adór múk doó Yeroboamu garmoó Nebati tleehhiit, nee adór doó Ba'asha garmoó Ahiya.

¹⁰ Yesebeli ka fooliiká nee heé, tuuaarós kan /aay nee seeaawe baraá yaamaá Yesre'eli wa aleeró.› » Alaá tí ooaro ngiwa hhe'eés, aarusmo iri baraá dó' wa ti'iít nee iri ta'aaín.

¹¹ Yehu iwa kií/ dír mukós, heé wák guri yaahaás, «Gám gaa a milá? Slarhhamaádá' gár i slai diroge?» Yehu giri mu/aywaáts, «Kuungá' gár i slai a xuá'.»

¹² Inooín nguri bayé', «Aasla'áy a xuaanaaká. Ooang gár i kaahi.» Inós giri báy, «Aníng ina báy, AAKOÓ MUNGÚ i kaahi, ‹Aníng kuúng ugwa iimbalaáx waawutmoó Israelír wa ale.› »

¹³ Qoomaadár kilae geeraharuuseedár hatlá' ar slaqwaruuse tlabaaín ngiri duuxiyé' ar gaanlaay, ngiri dinkwarí qaasiyé' as Yehu iwa sihhiiti gawaá ufuduú tlaba, nee tarumbeéta ngiri ufaahhiyé' ar afór ur, tawa kaahi, «Yehu a waawutmo!»

Waawutmo Yoram oo Israeli kuwa gaás

¹⁴ Yehu garmoó Yehoshafati a nángw naangó' Nimshi, inós Yoram guna geewaqaát. Yoram qoomaadae nee múk Israeli ta Ramot-gileadi dirii', ta xún ar baalaqaasi as Hasaeli waawutmoó Aramu.

¹⁵ Ala Yoram naa kií/ Yesre'eli as kuwa hubin as inkahhaydá' aa sláy qoomár tawa slaqwi nee waawutmo Hasaeli oo Aramu. Yehu geeraharuuseedár slaqwaruuse ar bartós gari báy, «Kuungá' bar nee aníng a dinkwa, gimsé' hee tumu wák miwa baraá Ramotír wa ti'iít, kaangwí nguwa ooár ay ay yaamaá Yesre'eli.»

¹⁶ Qoomaadae Yehu iri tsa/án gawaá gaárirós iri tláy ay Yesre'eli, Yoram aa huungu/iiká, Ahasia waawutmoó Yuda guna neetleesi áy.

¹⁷ Xuumusmoodá' baraá baalaqasíri dirií', kudá' gawaá /aampár Yesre'eli dirií' iri oó', «Mukko ugwa ár ni hi'iit, slám i gaárír kón.» Yoram iri oó', «Heé wák oo faraási ga i tsa/ám tsawaaraak, ya/aawaak as tiwa doogiya' nee inooín, as ngiwa yaahasi, ‹Axáy, wayda iqo deéro?› »

¹⁸ Naagáy heedaádá' iri tláy, tiri doogiyé' nee Yehu, Yehu kuri báy, «Waawutmo i yaahaamiis, ‹Gám kuúng a heé wayduúwo?› » Yehu guri mu/aywaáts, «Gár kuúng wayda kus yaahamis a milá? Kuúng aníng na eeharáng.» Xuumusmoodá' gawaá /aampárí dirií' iri oó', «Heedaádá' taa ya/awaán a mak hardáh ala naa ki/iiká.»

¹⁹ Heé hatlá' oo tsár kuri ya/aáw, iwa hardáh Yehu guna yaahaás, «Waawutmo i kaahi, ‹Gám wayda i deéro?› » Yehu guna adór kuduú geeraár mu/aywaáts sleeme, «Gár kuúng wayda kus yaahamis a milá? Kuúng aníng na eeharáng.»

²⁰ Wa'aá hatlae xuumusmoduú gawaá /aampa ina malé oó', «Heedaádá' ta ya/awaán aa mak hardáh, ala na ki/iiká.» Iri malé oó', «Madituú gaárirqá' baré oo adór kuduú Yehu garmoó Nimshi, asma inós gaári ga ló'wa gaanslár gusaasín.»

²¹ Naagáy Yoram waawutmoó múk Israeli iri oó', «Gaári amohhe'eesare'.» Inooín gaári kari amoohhe'eés. Yoram waawutmoó Israeli nee Ahasia waawutmoó Yuda tari tsa/án umuú heewo gawaá gaárirós, tari tláy as tiwa doogiya' nee Yehu. Inooín nee Yehu tiri doogiyé' dír afeenír Naboti heé Yesre'eli.

²² Qoomár Yoram Yéhu nguwa ár guri báy, «Xáy Yehu, kuúng naa qo hardáti ar wayda?» Yehu guri mu/aywaáts, «Wayda a gaalá, bar tsaatu'uumár aayirók Yesebeli nee da/ariiwose naa qaroó tlahhiyé'?»

²³ Yoram gaárirós gari warqeés, iri tláy, Ahasia guri báy, «Ahasía, taa sakií/ xáy gan.»

²⁴ Yehu ga/aleerós gari taataáhh nee mahaangós guri tsaxaár, Yoram guri diindirma' sláy, mahaangw iri hardáh ay baraá muuná, inós iri didár kilií gwaá' gawaá gaárirós.

²⁵ Yehu alee/isusmoowós kudá' ta bay Bidkari guri báy, «Tuuarós tisíng kwahheek baraá qaymoosír Naboti, heé Yesre'eli. Inslaweek tidá' qoomaadá' aníng nee kuúng tawa alaá Ahabu wa hi'imitaan ar farsuurén, adoodá' AAKOÓ MUNGÚ aa axweés daanduuwose.

²⁶ AAKOÓ MUNGÚ ina oó', ‹Tseerér Naboti nee ar na/iiwós tidá' /isá' naa ár, looeemaawo aníng lo'o aga /aáy án li/oó tseereerí u buú' baraá qaymoorí.› Gawaá adoorihe, tuuár Yoram kwahheek baraá qaymór Naboti ar adoodá' AAKOÓ MUNGÚ ngira oó'.»

Waawutmoó Ahasia oo Yuda kwa gaás

²⁷ Waawutmo Ahasia oo Yuda ngiwa ár, tidá' aa tleehharut iri goów amór gixsár Bet-hagan, amooqae kungu alkón nee Yehu. Yehu mukós guri báy, «Inós sleeme tsaxaaraak.» Inooín nguri gaárirós i tsaxaariyé', qoomár iwa dír waatsarár loohír Gurír kaw, nee iisaapoó gixsár Ibleamu. Iri kumiít ti'iingo iri Megido i gwa'arár áy.

²⁸ Geeraharuuseerós ar uren baraá waawuti'iimaro tuuarós kari gagaár ar gaárirós, kari huúw ay gixsár Yerusalemu, inós kuri foól baraá /aantaá baabi'iiwós, kudaá baraá gixsár Daudi.

²⁹ Ahasia waawuti'iima ngiwa iimu/ún baraá yaamaá Yudawo a kurkú mibaá nee wak oo waawuti'iimár Yoram garmoó Ahabu.

Waawuto'o Yesebeli kawa gaás

³⁰ Yehu iwa hardáh Yesre'eli, Yesebeli kangwdá' aa tleehharuut gwa qaroó geerií axás. Hhamhhamaá ilaawós gina parootús ar wahaaso nee se'eengós guri xáf, iri tleér dír pa/aangw, iri baráy ii qaytsít.

³¹ Qoomár Yehu iwa hardaraahi afkú do' Yesebeli guna beér, «Kuúng naaqo waydúr hardáti, xáy Simri, kuúnguú waawutmoowók ugwa qas?»

³² Yehu iri gáwtí qaytsiít iri oó', «Heé bartaeé' ni dirií' a heemá?» Geeraharuusér tsár laqaá tám nari tsee/áy harqaytsitiyé' ar pa/ángw do'.

³³ Yehu iri oó', «Yaamií kwahhaare'.» Inós kari yaamií kwaáhh nee tseerduuwós niri tsiniqitiyé' gawaá koo/i nee gawaá faras. Yehu faraasí nee gaáriro gay waarahhaás ar gawaá tuuarós.

³⁴ Yehu iri dáh baraá doó waawutmo, iri /ayín iri wahán. Aluuwo iri oó', «Tlawsé' /ameenisíng taa lu'ús foolaak, asma inós a dasír waawutmo.»

³⁵ Ala qoomár kawa foolár ay, naxés gár taa didií áy aqo har fartá saga, nee fadaá daba', nee awa ya'a'.

³⁶ Naagáy tari kií/, Yehu kway kaangwí báy, inós iri oó', «Adoorí an adoodá' AAKOÓ MUNGÚ aa qaroó aarín ar loohír sagadiyusmoowós Eliya heé Tishbe, iwa kaahi, ‹Seeaawe slaqwtá Yesebeli ga /ák baraá yaamaá Yesre'elír wa ale.

³⁷ Tuuár Yesebeli a adór /o/ór baraá qaymo, baraá yaamaá Yesre'eliro, asma heé oó', gaarí a tuuár Yesebeli, i kaahh.› »