2 WAAWITÁ 7 - Biblía Axweesantá Hhohho' ar Mungú 2004

¹ Elisha iri oó', «Axweesantá AAKOÓ MUNGÚ iiárií qaaseek, matlo qoomár adór tí baraaká gixsár Samariaro kílo tám ar puuruú hhohhó' oo angaáno ka weeriis ar shekeélír wák nee kílo lahhoó' ar shayiíri ka weeriis ar shekeélír wák.»

² Aluuwo alee/isusmoó waawutmo Elisha guri báy, «Tam AAKOÓ MUNGÚ inósuú kilá' afkú doori burngwa gweér, adoosíng iqo baloó ya/aánda?» Elisha iri oó', «Kuúng ilaawoge adoorí a tawo aán, ala gár ta tsaq i káhh.»

AAKOÓ MUNGÚ slaqwaruusér Aramu ngiwa guús

³ Muko tsiyáhh oo tiqtír tsatimituú koóm i deer didár afkú gixsár Samariaro, inooín tina kilooín yaahamisiyé', «Ahaá an diirí wá iwiwiitaána ay dír qwari tay tsu/i?

⁴ Hám bar mak ooana a dahaán baraá gixsa, baraadae qwari i deer an qatlaán, bara ooaán a diirií meetaán aqo an qatlaán. Gimsé' gusé' amór xafoó múk Aramu, barnaxes taa slafiíngwí máy aga tu/utaán, ala barnaxes taa tsu/iyé' daqaní aqo naagáy.»

⁵ Gawaá adoorihe, qoomár looa iwa dát, inooín tari tláy, ay dír xafoó múk Aramu, ala tawa didií hardáh, naxés heé ta didií áy i kaahh.

⁶ Asma AAKOÓ MUNGÚ xweeraawo slaqwaruusér múk Aramu gana naáxw ar afór ur ar slaqwaruusér yaariir, nee ar faras nee ar gaardu. Múk Aramu ngiwa xui a múk Israeli, slaqwaruusér taa tlaaxw ar múk Hiti nee múk Misri nina haraatleér.

⁷ Naagáy baraá xweeraadae múk Aramu sleémeero tana goów as slafingw'ín kilós nguna tu/iya'. Xafay'ín nguna geexayé', nee slaqwaruuseedá' taa tlaáxw farsuuín nee daqwaayer'ine ngina baraá tseegamór i geexayé'.

⁸ Mukdá' tsiyáhh oo tiqtír tsatmit tari dáh baraá xafaydá', tari /ayín nee tari wahán, peésa nee sahaábu nee tlabaawo ngiri ar tlayé', ngiri lu/iyé'. Nari tlayé' amór xafoó hatlá', adoodá' ngiri tleehhiyé'.

⁹ Ala inooín tari oó', «Xaa adoorí i qoondaaká. Gaarí a gitsa/aá hhooá' ala naxés matlaatle bara daamaán, xaa ti doohhiis. Gusé' múk doó waawutmo u ádbeemuú awaán.»

¹⁰ Gawaá adoorihe, nari dír xafayduú múk Aramu wa tlayé', nee mukdá' afér gixsár xuúm kuri ateét, kuri báy, «Atén ana amór xafoó múk Aramu kawaán, nee heé ta araán laqaá oo ta axasaán wa/amedae i kaahh. Faras nee daqwaayero i tseegamorí kahhiyá', nee heemaduuín kaa adoodár kilá' i geexáy.»

¹¹ Xuumuusér afér gixsa kaangwí guri tsiyaayáx iri hardáh amór doó waawutmo.

¹² Tam siiwadaádae iimi i giba, waawutmo ina tláy qatuuwo sagadiyuuserós gari báy, «Aníng a xuú' adór múk Aramu ta tlehhiiti. Inooín ngi xuiyá' atén a ló'wa qwariitaan. Hamí xafay'ín nguna geexayé' nari nahhaatiyé' as kahhó', atén bara muruú /aymár leelehhtuú awaán, atén sleémeero tin slafingw ohiná', gixsarén kari hayoh.»

¹³ Heé wák baraá tla/ángw sagadiyuuserose iri oó', «Axáy múk niiná nee farsuú kooán dír kudá' aa meeti u ya/aawaán as kawa araan áx gár aa tleehharut. Inooín slahh'amu ngu ak slay'aaká ta múk Israeli kudá' aa meet hamí baraá gixsa, laqaá ta kudá' aa qaroó hhan.»

¹⁴ Muu kuri tsawaár nee kuri gaardaá tsár i haniís. Waawutmo giri ya/aáw as múk Aramu nguwa eehariya', iri oó', «Tlawsé' gaasíng araare'.»

¹⁵ Mukdaádá' ina tláy ay Yordani, nee baraá loohiro tlaba nee xooslaá hatlá awa taa slaslaáx nee múk Aramu qoomár iwa ti'ii'ina' ngina ariyé'. Niri ki/iyé', kaangwí nguri ooiyé' dír waawutmo.

¹⁶ Múk Samaria tari tláy, tari dáh baraá xafoó múk Aramu. Adoodár kilá' AAKOÓ MUNGÚ ngira oó', kílór kooán ar puurú hhohhó' oo angaáno kana weerimiís ar shekeélír wák nee kílór mibaangw ar shayiíri kana weerimiís ar shekeélír wák.

¹⁷ Waawutmo alee/isusmowós kudá' guna qaás dír afkú doó gixsa. Inós qoomár muu iwa ti'iimiiti kuna kal/án nee muu kuri gaás, adoodár kilá' Elisha heé Mungú ngira geerií aarín qoomaadá' waawutmo iwa dirós káy.

¹⁸ Elisha aáng waawutmo guna qaroó geerií báy, matlo qoomár adór tihe, kílo kooán ar puuruú hhohhó' oo angaáno ka weerimiis ar shekeélír wák, nee kílo mibaangw ar angaánoó shayiíri ka warqeemiis ar shekeélír wák dír afkú gixsa Samariaro.

¹⁹ Alee/isusmooduú waawutmo Elisha guna mu/aywaáts, iwa kaahi, «Tam AAKOÓ MUNGÚ inósuú kilá' afkú doori burngwa gweér, adoosíng iqo baloó ya/aánda?» Qoomadaádae Elisha guna mu/aywaáts, guna bay, «Kuúng aqo tawo aán ala muruú /aymaadá' u /akká.»

²⁰ Ala adoorí ina tleehharút alee/isusmooduú waawutmo kuna kal/án nee muu dír afkú gixsár i alé, iri gwaá'.