2 WAAWITÁ 6 - Biblía Axweesantá Hhohho' ar Mungú 2004

Tsawór taa sláy

¹ Looarka wake eeharuusér aaruuse tana qununuú/ dír Elisha, asma dír tawa hooti i bu'umitká, ta kaahi, «Dirók tí atén ta hootaan ka niina ló'wa ale direne.

² Xaa ya/aám, atén a Yordanírí /eetaán as xaai ngiwa tsataan, nee doorén oo bu'uút nguwa tleehhaan.» Elisha giri báy, «Tlawsé'.»

³ Heé wák baraaine Elisha guri firín, iwa kaahi, «Xaa na'amaamís ti alkoonde' nee sagadiyuseerók.» Inós iri oó', «Kahhoo' a daqáw.»

⁴ Gawaá adoorihe, Elisha nee inooín tari alkoné'. Tawa hardáh dír yaaér Yordaniro, xaai tlaquuwo ngay iimu/uné'.

⁵ Heé wák baraá tla/angw'ine qoomár iwa xaa'aá tlaaqi, tsawoorós ina gawaá kipáy wa /akút ir /ét baraá ma'aay, iri /aá/ iri oó', «Laá dír ni dah aakooeé'? Tsawoorí aáng ana firimaán.»

⁶ Elisha guri yaahaás, «Dír i /ét a diimá?» Heedaádá' didá' tsawo i /ét gari laqán, Elisha xwaytsi gari tsaát gari kwaáhh baraá ma'aay didá' tsawo i /ét, tsawo niri ti'ít gawaá daanduú ma'aay.

⁷ Elisha guri báy, «Tsawoorók taataahheek.» Inós dakós guri tleereés, gari taataáhh.

Slaqwaruusér Aramu kawa baál

⁸ Qoomarkaaro waawutmoó Aramu nee múk Israeli tana slaáqw. Naagáy waawutmoó Aramu nee geeraharuuseerós tari al'axweés as tiwa kaahi slaya' amór ta i haratlaya.

⁹ Ala Elisha heé Mungú afo gari ya/aáw amór waawutmoó Israeli guri báy, «Magaáhh, loohisíng mar oohaar, asma slaqwaruusér Aramu aa amoosíng xú', taa amohhe'és slaqwaraaro.»

¹⁰ Naagáy waawutmoó Israeli slaqwaruuseerós gari tseeweés didaádá' kwa báy. Nee Elisha heé Mungú iri kumiít waawutmo gurbu'uungo, nee waawutmoó Israeli tiri amohhe'eés slaqwaraaro. Adoorí kana /iimamiís daqtá yaariire.

¹¹ Waawutmoó Aramu adoorí ngiwa ár ina ló'wa amooqwaqwadín. Geeraharuuseerós ar slaqwara gari ateét, gari báy, «Baraá tla/angwhúng kwihe a heemá oo atén gewaqaqatiím dír waawutmoó Israeli?»

¹² Heé wák baraá tla/angw'ine iri oó', «Gám i kaahh waawutámo. Ala aqo har Elisha kuduú aarusmo. Inós muruú kuúng ta axwes baraá kutuwirók tidár qatuú wa ale, gun kah dír waawutmoó Israeli.»

¹³ Waawutmo iri oó', «Tlawsé', dír i dirii'i araare', aníng daqaní muu u ya/aáw oo gu óh.» Naagáy nguri bayé', «Elisha i Dotanirí dirii'.»

¹⁴ Waawutmo slaqwaruusér yaariir gari ya/aáw dinkwa nee faras nee gaardaá ta uuruxun nee faras. Slaqwaruseedá' iwa hardát iimi a xweera. Gixsadá' gana harwét.

¹⁵ Sagadiyusmoó Elisha, heé Mungú, qatuuwo iwa tláy matlaatlér boo/e, iri ti'iít, naxés slaqwaruusér yaariir nee farsuwo, nee gaardaá ta uuruxun nee farsuwo, gina ár gixsadá' ngaa harweeriyé'. Iri baraá dó' i kií/, iri oó', «Tsaxwaarén aakooeé', hám daxta adór ta /iisaan a adoomá?»

¹⁶ Elisha iri oó', «Kuúng ma da'ayumiitaar, asma slaqwaruusér atén ta koomaan ka ur ta tiqá' nee inooín ti alkooma'a.»

¹⁷ Elisha Mungú guri firín, «Aá AAKOÓ MUNGÚ, ilaá sagadiyusmooeé' kwí gweereek as iwa qaytsitiya'.» Naagáy ilaawós kari gweér nee AAKOÓ MUNGÚ, masoomodá' faras nee gaardaá asla giri ár bihhér tlooma sleémeero. Elisha ngwa harweeriyé'.

¹⁸ Múk Aramu niwa haraatláy, Elisha AAKOÓ MUNGÚ guna firín, iri oó', «Aníng kuúng u firiím, mukwí i taampumiti.» AAKOÓ MUNGÚ firo gari axaás, mukdá' iri taampuumiít.

¹⁹ Elisha giri i daqáy giri báy, «Kuungá' loohi aga dakusé', gixsarí a tidá' kuungá' ta leeleehhiita'aaká. Aníng eeharaaré', aníng kuungá' nu hardahaás dír heedaádá' kuungá' ta leeleehhita'.» Inós giri huúw ay yaamaá Samaria.

²⁰ Niwa sa dahiyé' baraá gixsa, Elisha iri malé firín iri oó', «Aa AAKOÓ MUNGÚ, ilaaín daxta i qaytsitiye' as kawa tsaahhi.» AAKOÓ MUNGÚ firór Elisha gari axaás, inooín giri iimi pa/ás. Naxés inooín tawa qaytsiít ta baraá tla/ángw gixsár Samaria.

²¹ Waawutmoó Israeli múk Aramu nguwa ár, Elisha guri yaahaás, «Xáy baabá, i tsú/a?»

²² Elisha iri oó', «Aasla'áy, mi tsu/aar. Ahaá kuká' ta tsu/utár wa sla' geeraawo kuúng iga ohiíndi ar paángarók laqaá ga/aleerók? Muksíng /aymiseek daqaní ki watlís amór waawutmooín.»

²³ Waawutmoó Israeli mukdá' guri muruú /aymárí qaás, /aymaro tawa hhe'eés nee wahaango, giri geemáy niwa watliya' amór waawutmooín. Iimír qoomaadae múk Aramu haratleemuú yaamaá Israeliro taa baloó ki/iiká.

Gixsár Samaria kawa harweér

²⁴ Aluuwo waawutmo Ben-hadadi oo Aramu slaqwaruseerós sleémeero gari burumbuúr iri tláy gixsár Samaria gari harweér.

²⁵ Adoorí giyér hhamhhám gari húp baraá gixsár Samariaro. Tlaxo iri tsa/aán ságw daqwaay kuri weeriís ar parhheemaá mibeeri dakaát awa peésa, nee slooqoó niiná oo /o/ór hhooki gár kura weermiís a parhheemaá kooán awa peésa.

²⁶ Looarka wake qoomár waawutmoó Israeli iwa hi'iimiti gawaá ságw koo/ír gixsár wa ale, afór /ameeni gana axaás, i kat, «Aakooeé' waawutámo, án alee/iisáng.»

²⁷ Waawutmo gari báy, «AAKOÓ MUNGÚ kiíng alee/iisaro bira harslaqaát, alók aníng alee/isaay dír nguwa slaw a diimá? Dír kitaangwí balaangw kuwa múxi, laqaá bohóngw sabiíbu kuwa tsoo/íti?

²⁸ Gaa a milá kiíng?» Guri beér, «Lat'aáng /ameenirí aníng ina beér, ‹Na/aywók u /ayaán laarí, daqaní na/ay'eé' u /ayaán matlo.›

²⁹ Na/ay'eé' kuri humimaán, kuri /ayaán, looaytleérose ana báw, ‹Na/aywók daxa u /ayaán.› Ala inós na/aywós gwaa qaroó lú/.»

³⁰ Waawutmo adoorí ngiwa axaás tidá' /ameenidá' i kat, tlabaawós giri feehhamiís as gurhaami, inós i gawaá ságw koo/ír wa hi'imiit, muu inós guri ár tlabaá guniyudu' ngiwa tsiít.

³¹ Inós iri oó', «Aníng tam Mungú i gaasi nee ar tí ba/a ngi án i tleehhi, Elisha garmoó Shafati buraqo isa tsatiiká laarí.»

³² Naagáy waawutmo hee guri ya/aáw oo Elisha ateeta. Qoomaadár kilae Elisha i dó' i dirii' nee bariiserka aa do'ós keer. Dír heedaádá' ta ya/aáw ira hardihiiká Elisha bariiseedá' gana báy, «A ga/eerá'a, tsu/utusmo kungwa ya/aáw as istaeé' ngiwa tsati, qoomár birnda hardáh afkú do' ku tsegá', mindiwa baloó dáh baraá do'. Slám aakoowós i aluuwós wa hi'iit.»

³³ Tidá' ooaro gaa hhe'eesiiká, heedaádá' tinda ya/aáw nee waawutmo naa hardáh, i kaahi, «Slahh'amuuwí amór i dahhi a amór AAKOÓ MUNGÚ, án gár ni daamaraam a milá ar ni aniíngí tleehhi?»