2 WAAWITÁ 5 - Biblía Axweesantá Hhohho' ar Mungú 2004

Hunguu/usár Na'amani

¹ Na'amani, geeraharusmoó slaqwaruusér waawutmoó Aramu, inós an heé ló'wa iia tleér, nee oo ta ló'wa slai nee aakoowós, asma ar loohír inose AAKOÓ MUNGÚ yaamuuín gina arba/atírí haniís. Inós an slaqwarusmoó pihhusmo, ala inós i tiqtír tsatmituú kón.

² Baraá slaqwarár nee múk Israeli tawa slaáqw, dasír niina ar Israeli kana hayóh. Dasiirí tari sagadiyuso'ór harér Na'amani.

³ Looarka wake dasi harér Na'amáni gana beér, «Ís geera a tsiní aakooeé' bira amór aarusmookó káy oo yaamaá Samaria, geeraawo baraá tiqtirihe ku hungu/uus.

⁴ Na'amani adoorí ngiwa axaás iri tláy ay dír waawutmo, kaangwí na/aywí i kaahi guri oó'.»

⁵ Waawutmoó Aramu iri oó', «Gimáy tláw barwito'oorí huweek dír waawutmoó Israeli.» Gawaá adoorihe, Na'amani iri tláy peésár kume mibeeri tám nee parhheemaá sahaábu awa kume lahhoó' nee tlabaá mibaangw awa ló'wa hhohho' gina huúw.

⁶ Barwito'oodá' gari huúw dír waawutmoó Israeli, gár taa baraadií gooín a tí, «Barwito'oorí bara sleér, ka xú' adór aníng sagadiyusmooeé' Na'amaní ngura amoorók i ya/aáw, as kuwa hungu/us tiqtirós tír tsatmituuwo.»

⁷ Waawutmoó Israeli barwito'oodá' ngiwa soomuús, tlabaawós giri feehhamiís, iri oó', «Ahaá inós ngi xui aníng an Mungúhe, kudaádá' hee gu gaás nee gu slafís, tam waawutmoowuú Aramu niri amor'eéní ya/abín as heewuú tiqtír tsatmit nguwa hungu/uus. Gám ga/aa/awaak heewí i gilaá leeleehhiit dir'eéní aleeró.»

⁸ Elisha heé Mungú adoorí ngiwa axaás, adór waawutmo tlabaawós ngira feehhamiís, afo gari ya/aáw amór waawutmo guri yaahaás, «Ahaá a milá, tlabaawók misa feehhamís? Heesíng amor'eénií huwang, as daqaní ngiwa tsaahhi adór baraá yaamaá Israeliro aarusmo ir deér.»

⁹ Naagáy Na'amani niri hardáh ar faraásirós nee gaárirós ay dír afkú doó Elisha.

¹⁰ Elisha hee guri ya/aáw amór Na'amani, nguwa bay, «Tláw, hamtlo aweek baraá yaaér Yordani sagaá wa faanqw, slaqwtók daqaní i adoodií kí/, kuúng tari hhoohhoouúr.»

¹¹ Ala Na'amani ina ló'wa buúhh, iri tláy iwa kaahi, «Aníng ngi xuu' geeraawo aqo nin tsee/áy ti'iit, nee AAKOÓ MUNGÚ, Munguúwós guri firín, nee dir'e tidá' tiiq gari kwatimiit, nee iri hungu/uus.

¹² Xáy, yaaér Abana nee Farpari kudaá Damasko a tsinihekáhe, ta ma'aá ya'aá yaamaá Israeliro? Xáy, aníng hamtlo a aleeslawakahe baraadae niri hhoohhooúw?» Iri tláy, iri waátl slám amorqae aa qaroó buúhh.

¹³ Sagadiyuseerós guri haratseewuúr, guri beér, «Xáy, baabuúrén, kuúng geeraawo bar aarusmo una báy, gár ur tleehheek, tleehharo a meéra? Hám daxta an ak tsinihekáhe uwa báy, ‹Tláw hamtliím, hhoohhooúw.› »

¹⁴ Naagáy Na'amani iri tláy ay baraá yaaér Yordani, iri /eét sagaá wa faanqw ar adoodá' Elisha heé Mungú ngira oó'. Inós iri ló'wa huunguú/. Kaahartá slaqwtós iri hhoohhouúr adór tiqár na/oó niiná.

¹⁵ Inós dinkwa nee sagadiyuuseerós niri ki/iyé' dír heedaáduú Mungú, iri oó', «Hám daxta aníng aga xuú' Mungú i kaahh baraá xoordu sleémeero, aqo Munguú Israeli. Gimáy daxta na'ás qeemuú sagadiyusmoowók ya/aameek.»

¹⁶ Elisha iri oó', «Ar adoodá' AAKOÓ MUNGÚ ir hotaatina, kudá' ni sagadiyuus, gám aníng qeemuuwók u baloó oohaaká.» Na'amani Elisha guri ló'wa harhhehhe'eés, ala Elisha ina sií'.

¹⁷ Na'amani iri oó', «Gám ala kuúng bar gar'eé' ooharo aga sí', kár ala sagadiyusmoowók hhapér yaamuuká' ar wayshamaá tsár gagaaro i aleeslaya' ti hanis, asma iimír laarí aníng sagadiyusmoowók a kumiitaaká ilahhooár da/a haniisaro laqaá ilahhooár muruú ta tsu/i dír munguaá hatlá', aqo har dír AAKOÓ MUNGÚ kilós.

¹⁸ Baraá gaarí wake aníng AAKOÓ MUNGÚ i gurtlay, qoomár bar ti alkoomaán nee aakooeé' waawutmo baraá doó Munguúdá' ta bay Rimoni, munguú múk Aramu as iwa baraadí sluufmisuú ay, qoomár inós bir tumbarara'aat, dakw'eé' burungwa ar qadiís, aníng sleeme niri tumbarara'aát baraá doó mungú Rimoni wa alé, daqaní baraá gaarí wake AAKOÓ MUNGÚ aníng i gurtlay.»

¹⁹ Elisha iri oó', «Kuúng tláw, waátl ar wayda.» Na'amani iri tláy. Dír ira purutsiiká,

²⁰ Gehasi, sagadiyusmoó Elisha heé Mungú iri baraá guruuwós i oó', «Hám qaytsiít, aakooeé', muruudá' Na'amani heé Aramu naa huúw gwa sií' ooharo. Ar adoodá' AAKOÓ MUNGÚ ir hotaatina, aníng un alta'aaím as gaa ngiwa slaw dirose.»

²¹ Gehasi Na'amani guri aluúwaá eehár. Na'amani iwa aluú i qaytsiít hee guna ár i aluú wa ti'ii'ín, iri aweér gawaá gaárirose tiri doogiyé' nee inós. Guri yaahaás, «Gám tu hhoóe?»

²² Gehasi iri oó', «Gár tlaakw i káhh. Ala aakooeé' iga ya/aáw, kuúng uwa baw, dahaayér tsár gaa sláy, eeharuusér tsár ar aaruuse ar amór yaamaá tlom'aá Efraimu daahh. Inós gana slaá' kuwa qeer parhheemaá kume tame awa muqslár peésa, nee tlabaá tsár awa tar ti'imiiti bál deelór ure.»

²³ Na'amani iri oó', «Gimáy na'ás are parhheemaá peésa awa kume lahhoó'.» Guri malé harhhehhe'eés aluuwo gway daqooroó tsár oo tlaba' nee tlabaá hhohho' awa tsár awa tar ti'imiiti bál deelór uren giri tsa/aás gawaá sagadiyuuseerós ar tsár, iri geeraá Gehasi wa hi'ít.

²⁴ Tawa hardáh gawaá tloomaadá' Elisha i dirii'i Gehasi peésadá' gari taataáhh dír sagadiyuusér Na'amani wa ale gari dahaás baraá do'ós. Naagáy sagadiyuuseedá' gari báy, «Daxta kuungá' watlé'.» Sagadiyuuseedá' iri tleér.

²⁵ Gehasi iri dáh baraá doó Elisha, Elisha Gehasi guri yaahaás, «Amór taa keér a amá?» Gehasi iri oó', «Anuú sagadiyusmoowók amór naa káw i káhh.»

²⁶ Ala Elisha guri báy, «Ahaá qeeruueé' nee kuúng taa alkoondi'iikáhe, qoomár heedaádá' niwa amór gaárirós wa kií/ nee kuúng tay dogé'. Xáy, qoomaarí ar peésa nee tlaba' ohiíngo, laqaá a qoomár qamaá seituúni nee sabiíbu ohiíngo? Laqaá qoomár bee/aangw nee hikwa ohiíngo? Laqaá qoomár sagadiyuusér hhawaate nee ar /ameena ohiingo?

²⁷ Gawaá adoorihe tiqtidár tsatmit ar Na'amani kuúng u ot, nee xwaylarók sleémeero, tam ay alhhe'eesay wasle.» Naagáy Gehasi iri tláy didae nee slaqwtós tiqtír tsatmit gaa qaroó ót, kaahartós aa /awaakuúr adór tlaa/aá tluwaay.