2 WAAWITÁ 3 - Biblía Axweesantá Hhohho' ar Mungú 2004

Slaqwarár múk Israeli nee múk Moabu

¹ Kurkú mibaá nee dakaát oo waawuti'iimár Yehoshafati waawutmoó Yuda, Yoram garmoó Ahabu waawuti'iima gana iimu/ún baraá Israeliro nee kureeri ngaa /aáy mibaá nee tsár baraá waawuti'iimár Samariaro.

² Yoram tlakweema gina tleéhh dír geeraá AAKOÓ MUNGUHE, ala inós tlakweemawo dír baabá nee aayoorós gaa ayká, asma inós uheemi Ba'ali taa tleéhh nee baabuúwós gina feé/.

³ Tam adoorihe, Yoram tlakweema gaa mayká adór waawutmo Yeroboamu, garmoó Nebati, kudá' aáng tlakweema gaa tleehh nee múk Israeli guna baraá tlakweemií dahaás.

⁴ Waawutmo Mesha oo Moabu, inós a de'eemusmoó bee/aangw, nee umuú kurko ohme gana bu'ún dír waawutmoó múk Israeli ar deeloó bee/aangw kume tsiiru, nee se'éngw bee/ángw kume tsiiru.

⁵ Ala Ahabu iwa sa gwaá', waawutmoó Moabu iri dee/aanuút.

⁶ Gawaá adoorihe, waawutmo Yoram iri Samaria wa tláy, slaqwaruusér Israeli gari burumbuúr sleémeero.

⁷ Afo gari ya/aáw amór waawutmo Yehoshafati oo Yuda, guri báy, «Waawutmoó Moabu kangw'eé' gwaa sií', xáy a aldinku'uusána baraá slaqwaraaro?» Waawutmo Yehoshafati iri oó', «Eeít, aníng ti amohhoó'. Aníng nee kuúng gár dimbé i káhh, muk'eé' a mukók, farsuueé' aqo kók.»

⁸ Aluuwo Yehoshafati iri oó', «Xáy, loohír tar oohaan a gaalá?» Yoram iri oó', «Loohír xaanxoó Edomu anar dahaán.»

⁹ Naagáy waawutmo Yoram iri tláy dinkwa nee waawutmoó Yuda nee waawutmoó Edomu. Ala nina hi'iimitiyé' deelo faanqw, ma'aay niri faakiyé'. Ma'aay i kahhiyá' awa slaqwaruuse i wat, laqaá awa makay'ín i wahiya'.

¹⁰ Waawutmoó Israeli iri oó', «Tsaxwaarén, AAKOÓ MUNGÚ ateéká' waawitaáwí tám taa dinkwárí ateet as tiwa qaasi baraá dabaá waawutmoó Moabu.»

¹¹ Waawutmo Yehoshafati giri yaahaás, «Xáy aarusmoó AAKOÓ MUNGÚ diirihe i káhhi oo ta yaahasaan daanduú AAKOÓ MUNGUHE?» Sagadiyusmoó wák oo waawutmo Yoram oo Israeli iri oó', «Elisha garmoó Shafati i diirí, inós aáng a sagadiyusmoó Eliya.»

¹² Yehoshafati iri oó', «Axweesantá AAKOÓ MUNGÚ ga kón.» Naagáy waawitáwí tám tari daqáy dír Elisha.

¹³ Elisha waawutmoó Israeli guri yaahaás, «Aníng nee kuúng dinku'uumár ta koomaan i deéro? Tláw amór aaruusedár baabuúwók nee aayoorók.» Waawutmoó Israeli iri oó', «Aasla'áy AAKOÓ MUNGÚ an heé ateéká' tám awa waawitá taa ateet, as tiwa qaasi baraá dabaá waawutmoó Moabu.»

¹⁴ Elisha iri oó', «Adoodá' AAKOÓ MUNGÚ Aleesleemusmo ir hotaatin, kudá' aníng ni sagadiyuus, hám geera barnaxes an mak Yehoshatiwooká waawutmoó Yuda, aníng geeraawo kuúng u iiárií qaasaaká.

¹⁵ Ala hám daxta heé xooslmoó daa'aangw gu baál slahhto slawaare'.» Kunguri sláy. Qoomár xooslmoodá' kuwa slaáhh, /uuruú AAKOÓ MUNGÚ Elisha guri hatsiís.

¹⁶ Iri oó', «AAKOÓ MUNGÚ i kaahi, ‹Boh'e foolaak baraá xatstí sleémeero.›

¹⁷ Asma AAKOÓ MUNGÚ i kaahi, ‹Kuungá' tam fur'a a aanda'aaká ala xatstí i háts ma'aywo, kuungá' kiri watá', nee hikwahunge nee makayhunge.›

¹⁸ Ala tí dír AAKOÓ MUNGUHE ka gawdeeká tleehharo, inós sleeme baali ngi haniis dirhunge ar múk Moabu kuwa ar ba/a'.

¹⁹ Kuungá' umuúqo gixsár koo/i gawide an ar ba/á' nee umuú gixsár hhoohhooe, umuú xa'anoó hhooe un dahhá', kutlaá ma'ay'ín in tipá', nee qamuuín kudá' xáw'uú koomá' kay tlaa/ér hhitiindá'.»

²⁰ Looár na tleer, qoomár ilahhooár muruú ta tsu/i ar matlaatle, ma'aay nina wa/iyé' amór yaamaá Edomúr wa ale, nee xatstadá' ngiri dalaa/iyé'.

²¹ Qoomár múk Moabu ngiwa axaás adór waawitaádá' tám nira hardáh ar haratleemu, muu sleémeero oo slaqwara ga aleesláw iimír na/aá ninakw ay bariise, kina ateét kiri xooslár slaqwarárí haniís tiri amohhe'eesiyé' slaqwaraaro.

²² Matlaatleero múk Moabu tindiwa tláy qatuuwo, tsee/amá iwa gwa/aát gawaá daanduú ma'aydá', tawa qaytsiít ma'aay ki da/aten adór tseere,

²³ tari oó', «Gaarí a tseere, anga/áw waawitaádá' tám taa kilooín muxiyé' tiri tsu/iyé', gusé' a haasaánguú leehhaán.»

²⁴ Ala múk Moabu iwa hardáh dír xafoó múk Israeliro, kiri i haratláy niri gowiyé' geeraá múk Israeli wa aleeró, kiri sangw aluú wa guús ay Moabu, slám kaa loohi tsu/aa/ín.

²⁵ Gixsaduuín kina fe/iít. Umuú dír tara waaraahhi baraá qaymooro umuú heewo tlaa/ano guna tsaxaár, qaymo tlaa/eewo iri háts. Kutloó ma'aay nguri tipiyé' nee xaa'aá hhohho' kiri tlaáq. Aluuwo gár aa met a gixsár ur ar Kir-heresi kilós, kari harweér nee múk kuukumayár tlaquút, kari hayóh.

²⁶ Waawutmoó Moabu ngiwa ár kuwa ar baá/ slaqwaraaro, múk tsiire faanqw oo slaqwarár ló' wa xuú' ar paangadu, guna tsawaár as slaqwaruusér Edomu ngiwa tla/a pu'uusi ala adoodá' gaa aleeslayká.

²⁷ Na/aywós oo baris kudá' geeraawo waawuti'iím kitaangós wa ale, guri ilahhooár da/tá wa haniís gawaá koo/ír gixsa. Múk Israeli adoodá' ngiwa ár kiri ló'wa buhhtís. Gixsadá' ngiri geexayé', niri ayaaín i watliyé'.