2 WAAWITÁ 24 - Biblía Axweesantá Hhohho' ar Mungú 2004

¹ De'emaá waawutmo Yehoyakimuwo, waawutmo Nebukadnesa oo yaamaá Babuloni ina haratláy baraá yaamaá Yuda. Waawutmo Yehoyakimu Nebukadnesa guri sagadiyuús tleehhiít har afiqoomár kureeri tame. Aluuwo iri warqáy, iri dee/anuút.

² AAKOÓ MUNGÚ guri xoordií tleés, xoorór Babuloni nee ar Aramu, nee ar Moabu, nee ar Amoni, yaamaá Yuda kiri i haratláy, nee yaamuudá' kiri hhaamiís adoodá' aáng AAKOÓ MUNGÚ aa oó' ar afér aaruuseerós.

³ Looeemaawo muruú tlákw múk Yuda guna sláy ar adoodá' AAKOÓ MUNGÚ ngira oó', aa inooín kiwa ar tlay dír geeraawose, asma tlakweemaadá' waawutmo Manase aa tlehhaahhiít,

⁴ nee sleeme asma inós baraá Yerusalemuro tseerdaá múk dakuús wásl gina ku'uús. Ala AAKOÓ MUNGÚ tlakweemaadá' gaa slaiiká ngiwa gurtlay.

⁵ Tlehhma'aá hatlá' awa Yehoyakimu nee kudá' sleémeero aa tleéhh kaa gooín baraá kitaábuú qom'aá waawituú Yuda.

⁶ Yehoyakimu iri gwaá', nee garmaawós Yehoyakini iri kitaangós wa waawuti'ín.

⁷ Waawutmoó Misri aa malé haratlayká amór yaamaá Yuda, asma waawutmoó Babuloni yaamu sleémeero kudá' aáng taa sawaawuti'ín nee waawutmoó Misri gina hayóh iimír yaaér Misrír wa tleemu ay yaaér Eufrate.

Waawutmo Yehoyakini oo Yuda

⁸ Yehoyakini waawuti'iima ngiwa iimu/ún kureeriiwós a mibaá nee dakaát. Inós baraá waawuti'iimaro slahheeri ngaa /aáy tám baraá gixsár Yerusalemuro. Umuú aayoorós a Nehushta, dasír Elnatani ar yaamaá Yerusalemu.

⁹ Inós tlakweema gina tleéhh dír geeraá AAKOÓ MUNGUHE adoodár kilá' ar baabuúwós aa tleéhh.

¹⁰ Qoomaadae slaqwaruusér Nebukadnesa waawutmoó Babuloni ina haratleér amór gixsár Yerusalemu, gari harwét.

¹¹ Qoomár gixsár Yerusalemu kawa harweér nee slaqwaruusér Nebukadnesa, waawutmo Nebukadnesa inosuú kilá' iri hardáh Yerusalemu.

¹² Waawutmo Yehoyakini oo Yuda dabaawós giri haniís dír waawutmoó Babuloni, inós dinkwa nee aayoorose, nee sagadiyuuseerose, nee mukdá' oo urén baraá waawuti'iimarós, nee mukdá' urén oo doó waawutmo. Inós Yohayakini nguwa tseék baraá Babuloni, kureeriiwós a dakaát baraá waawuti'iimaro.

¹³ Adoodá' AAKOÓ MUNGÚ ngira geerií oó', Nebukadnesa daqaari'iimár baraá doó AAKOÓ MUNGÚ nee ar doó waawutmo gari ar tláy. Xooslár taa tleéhh ar sahaábu nee waawutmo Solomon gana tsuú/. Xooslarí i baraá doó AAKOÓ MUNGÚ i dirí'.

¹⁴ Muu sleémeero oo Yerusalemu guna ar tláy: Geeraharuuse nee miguuseero, nee múk mura' tlehhtuuwo gu xuú' nee kareerá, dinkwaaro múk taa haasaáng wa huúw a kume mibaangw. Heé aa meet i kaahh aqo har mukduú narkuute liitlakwén baraá yaamuudae.

¹⁵ Yehoyakini guna ar tláy ay yaamaá Babuloni, nee aayór waawutmowo, tlaawoó waawutmo, nee geeraharuusér uren ar slaqwaruuse, nee geeraharuusér yaamaá Yerusalemu gari huúw ay Babuloni.

¹⁶ Nebukadnesa waawutmoó Babuloni miguusér kume faanqw gana haasaáng wa huúw, múk mura' tlehhtuuwo gu baál, nee kareerahe a kumuú wák. Mukwí sleémeero a múk /uureemaá koóm nee oo slaqwara ga baál.

¹⁷ Nebukadnesa Matania maamoó Yehoyakini guri waawutmoó wa qaás kitaangose. Umuuwós guri warqeés guri báy Sedekia.

Waawutmo Sedekia oo Yuda

¹⁸ Sedekia waawuti'iima ngiwa iimu/ún kureeriiwós a mibeeri tsár nee wak. Inós baraá waawuti'iimaro kureeri ngaa /aáy a mibaá nee wak baraá Yerusalemuro. Umuú aayoorós a Hamutali dasír Yeremia kuduú Libna.

¹⁹ Inós tlakweema gina tleéhh dír geeraá AAKOÓ MUNGUHE, adoodár kilá' Yehoyakimu baabuúwós aa tleéhh.

²⁰ Múk Yerusalemu nee oo Yudawo AAKOÓ MUNGÚ nguna ló'wa buhhtisiyé' giri hingeés dír geeraawose. Sedekia iri dee/anuút dír waawutmoó Babuloniro.