2 WAAWITÁ 22 - Biblía Axweesantá Hhohho' ar Mungú 2004

Waawutmo Yosia oo Yuda

¹ Yosia waawuti'iima ngiwa iimu/ún kureeriiwós a dakaát. Kureeraá waawuti'iima ngaa /aáy a mibeeri tám nee wak baraá Yerusalemuro. Umuú aayoorós a Yedida, dasír Adaya, kuduú gixsár Boskati.

² Yosia adór ganaa' gana tleéhh, AAKOÓ MUNGÚ guri sla'atís. Inós adoodá' baabuúwós waawutmo Daudi aa tleéhh gana eehár, inós hara'ayár AAKOÓ MUNGÚ sleémeero gana iialooeés.

Kitaábuú dabe kuwa sláy

³ Kurkú mibaá nee dakaát oo waawuti'iimár Yosia, inós goousmo Shafani garmoó Asalia, garmoó Meshulamu, guna ya/aáw amór doó AAKOÓ MUNGÚ, iwa kaahi,

⁴ «Tláw dír Hilkia kaahamusmoó úr oo Mungú, asma peésaadá' muu aa huwahuúw baraá doó MUNGÚ ngiwa faari, tidá' xuumuuseedá' afkú doó ga/aw aa burumburiín dír múk wa ale.

⁵ Daqaní ka hanisá' dír mukdá' tleehhamór doó AAKOÓ MUNGÚ ga sagesihhmiít, as mukdá' doó tlehhiít kuwa bui ar peésaadá',

⁶ nee mukdá' peehhoó hhasliít, nee mukdá' doó tleéhh, nee peehháy ku tlaxwi, nee tlaa/aá taa hhaásl as do' kuwa tleehhi.

⁷ Ala inooín mikiwa yaahaás adoodá' peésa ngira ar gadiyusi'i, asma ngina ar gadiyuusiyé' ar adoodá' kas hariím.»

⁸ Hilkia kaahamusmoó úr oo Mungú Shafani kuduú goousmo guri báy, «Gám kitaábuú dabe ugwa baraá doó AAKOÓ MUNGÚ wa sláw.» Hilkia kitaábuudá' guri haniís dír Shafani, inós guri soomuús.

⁹ Goousmo Shafani iri daqáy dír waawutmo, kangwdá' guri oó', guri báy, «Sagadiyuuseerók peésaadá' gaa dúx baraá doó Munguhe, nee ngaa hanisiyé' dír mukdá' tlehhmuú doó AAKOÓ MUNGÚ gu sagesihhmiít.»

¹⁰ Naagáy Shafani kuduú goousmo waawutmo guri báy, «Hilkia kaahamusmoó Mungú iga kitaábuú i haniís.» Shafani kitaábuudá' guri soomuús dír geeraá waawutmoó wa alé.

¹¹ Qoomár waawutmo kangwdá' Shafani aa baraá kitaábuú dabér wa soomuús nguwa axaás, tlabaawós gina feehhamiís.

¹² Waawutmo Yosia kaahamusmoó Mungú Hilkia, nee Ahikamu garmoó Shafani, nee Akbori garmoó Mikaya, nee goousmo Shafani, nee Asaya sagadiyusmoó doó waawutmo, giri báy,

¹³ «Tlawsé' AAKOÓ MUNGÚ yaahasaare', as aníng nee muu sleémeerowo nee múk Yuda sleémeero, nee as daanduú /ayma'aá baraá kitaábuwí taa sláy, asma buhhtaá AAKOÓ MUNGÚ ki ur direne, asma baabi'iirén adór kitaábuuwí i kaahi nga iialooeesi'iiká, nee tidá' taa gooín sleeme nga boo/eesi'iiká.»

¹⁴ Gawaá adoorihe, kaahamusmoó Mungú Hilkia, nee Ahikamu nee Akbori nee Shafani nee Asaya sleémeero tana daqáy amór aaruso'o Hulda, harér Shalumu, garmoó Tikfa, garmoó Harhasi. Shalumu an kudá' tlabaá doó Mungú amohhee'emaamiís. Qoomaadae Hulka dír i hot a bartá tsár ar Yerusalemu. Inooín nee aaruso'o Hulda tari axweés.

¹⁵ Naagáy inooín giri beér, «AAKOÓ MUNGÚ, Munguú Israeli i kaahi, heedaádá' kuungá' naa amor'eé' ya/aaw ku beera',

¹⁶ ‹Qaytsiít aníng amotlakwe ngi huúw yaamuuká', nee dír yaamuloouseerós, adoodá' kara soomuús baraá kitaábudae nee waawutmoó Yuda.

¹⁷ Asma aníng iga geexayé', munguaá hatlá' ngaa mooyángw tsuú' i da/iyé', aníng iga buhhtisiyé' ar gadiyér dabaaín sleémeero. Gawaá adoorihe, aníng iga i daa/atúw buhhtaawo, nee i baloó tsauya'aaká.

¹⁸ Ala waawutmooduú Yuda, kudá' kuungá' naa ya/aaw, as AAKOÓ MUNGÚ kuwa yaahasa', ku beera', ‹Adoorí an adór AAKOÓ MUNGÚ, Munguú Israeli i kaahi, daanduú /aymi'iidá' taa axasi'i,

¹⁹ Aníng /aa/eewók iga axaás, asma kuúng tawa hhu'u'uún, nee kuúng taa niinawés dír geeraeene qoomár /aymi'iiká' kiwa axás daanduú yaamuuká' nee yaamuloouseerose, as tawa yaamaá deewa'ame nee lo'o. Kuúng tlabaawók iga feehhamís nee aga ló'wa /aa/amiín. AAKOÓ MUNGÚ adoorí gana káh.

²⁰ Gawaá adoorihe, ga/aaweek kuúng a adór hhoóár gwá', turi qaas bihhaá baabi'iiwók ar wayda, ilaawók slasla/aruwí aníng ni huuw yaamuuká' i alé ngu ariaaká.› » Kaangwí kuri ooár áy dír waawutmo Yosia.