2 WAAWITÁ 21 - Biblía Axweesantá Hhohho' ar Mungú 2004

Waawutmo Manase oo Yuda

¹ Waawutmo Manase waawuti'iima ngiwa iimu/ún kureeriiwós a mibaá nee tsár. Inós baraá waawuti'iimaro kureeri ngaa /aáy a mibeeri kooán nee kooán baraá gixsár Yerusalemuro. Umuú aayoorós a Hefsiba.

² Inós muruú tlákw guna tlehhiít dír geeraá AAKOÓ MUNGUHE ar tlehhma'aá tlakw awa xoordaá hatlá' kiwa aleealuusi, kudá' AAKOÓ MUNGÚ aa guús geeraá xoorór Israeli wa ale, qoomár inooín iwa darahiya' baraá yaamuudá'.

³ Asma inós kiteeridá' waawutmo Hesekia aa feé/ kudá' munguaá hatlá' kiwa gawaá gongoamaá wa sluufmiisi, inós gina male /abeés, kitángw Ba'ali kuwa ilahhooárí hanmiisi guna tleéhh, nee slaqsoó Ashera guna tleéhh adoodá' aáng Ahabu waawutmoó Israeli aa tleéhh. Tam adoorihe Manase tsatse/uú gawaá doori guna sluufmiís, guri sagadiyuús adór Munguú ló' wa aleeró.

⁴ Kiteeraá ilahhooa gina tleéhh baraá Doó AAKOÓ MUNGÚ didá' aáng AAKOÓ MUNGÚ iwa oó', «Yerusalemu an dír umuueé' kuwa ateeti.»

⁵ Kiteeraá tsatse/ sleémeero kuwa sluufmiisi gina tleéhh baraá afeenaadá' tsár ar baraá guruú doó AAKOÓ MUNGÚ.

⁶ Inós na/aywós guna haniís as tawa ilahhooár da/a, tlaa/e giri xuú', iri tsuuqaá a'áy, tari aldinku'uús nee qwaslaarér giaá duxuum nee da/aluuse. Inós muruú tlákw guna ló'wa tlehhiít, AAKOÓ MUNGÚ guri mune duúx.

⁷ Slaqsoó Ashera guri tleéhh, guri qaás baraá guruú do', didá' aáng AAKOÓ MUNGÚ Daudi nee Solomon ngiwa báy, «Baraá do'wihe nee baraá Yerusalemu tidá' án naa tsawaár, an didaádá' tlahh'aá Israeli sleémeero umuueé' kuwa ateetin ay kureeraá kureér.»

⁸ Barnaxés múk Israeli hara'ayaadá' naa Mose i haniís nga gaárí xuiyé', aníng i baloó ya/aamaaká inooín kiwa guusi dír yaamuudá' naa baabi'ii'ín i haniisi.

⁹ Ala inooín tí nga iiárií qaasi'iiká, Manase inooín giri dahaás baraá tlakweemaá yaariir tam kudaá xoorduudá' AAKOÓ MUNGÚ aa hhaamiís geeraá Israeli wa aleeró ba/a.

¹⁰ Naagáy AAKOÓ MUNGÚ iri axweés ar loohír sagadiyuuserós ar aaruuse, iwa kaahi,

¹¹ «Asma waawutmo Manase muruú buhhtamís guna tleéhh tam xoorór múk Amori ba/a, tidá' baraadá' i dirii', nee inós múk Yuda guri baraá tlakweemií dahaás ar murslaaqatuudá' aa tleéhh,

¹² gawaá adoorihe Anuú AAKOÓ MUNGÚ, Munguú Israeli a kah, qaytsiít aníng amotlakwe ngi huúw daanduú Yerusalemu nee Yuda, tí umuú heewo birnga axaás iaawós giri oh.

¹³ Aníng hhutlmooduú qoomeemes oo Samaria ngira qoomeés, nee doó Ahabuwo, un gixsár Yerusalemúr qoomeés. Aníng gixsár Yerusalemu an paapa/aás adór hee qwaree/amo ngur xusaasin, guri xoptis.

¹⁴ Aníng aalir'eé' tidá' aa met an kwaáhh, inooín ngiri haniís dír wakuuser'ín, inooín tay maraando nee sluqór wakuuser'ín.

¹⁵ Aníng muruuwí sleémeero un inooín tleéhh asma inooín muruú tlákw nguna tlehhahhitiyé' dír geeraeene, iri buhhtisiyé', iimír baabi'ii'ín niwa baraá Misrír wa ti'itiyé', tam ay laarí.»

¹⁶ Inós múk Yuda guna dahaás baraá tlakweemaawós, inooín tlakweema ngiri tleehhiyé' geeraá AAKOÓ MUNGUHE. Sleeme Manase múk yaariír oo dakuús wásl guna tsuú/, tseerér yaariir ina ku'út badu sleémeero ar Yerusalemu.

¹⁷ Tlehhma'aá hatlá' awa Manase dinkwa nee tlakweemaawós kudá' aa tleéhh, kaa gooín baraá kitaábuú qom'aá waawituú Yuda.

¹⁸ Manase iri gwaá', kuri foól baraá asalmoowós kuduú do'osú kilá', baraá asalmoó Usa. Garmaawós Amoni iri waawuti'ín kitaangós wa aleeró.

Waawutmo Amoni oo Yuda

¹⁹ Amoni waawuti'iima ngiwa iimu/ún kureeriiwós a mibeeri tsár nee tsár. Kureeraá waawuti'iima ngaa /aáy tsár baraá Yerusalemuro. Umuú aayoorós a Meshulemeti dasír Harusi kuduú Yotba.

²⁰ Inós tlakweema gina tleéhh dír geeraá AAKOÓ MUNGUHE adór baabuúwós Manase aa tleéhh.

²¹ Inós loohír baabuúwós gana eehár, nee murslaaqatudá' baabuúwós aa sagadiyuús nee aa sluufmiís, inós sleeme guna sagadiyuús.

²² Inós AAKOÓ MUNGÚ, Munguú baabi'iiwós guna geexáy, nee loohír AAKOÓ MUNGÚ gaa eehariiká.

²³ Aluuwo Amoni sagadiyuuseerós guna sakí/, kuri gaás baraá doó waawuti'iima.

²⁴ Ala múk Yuda mukdá' Amoni gwa gaas kuri tsuú/. Naagáy, aluuwo múk Yuda Yosia garmoó Amoni kuri waawutmoó wa qaás kitaangós wa ale.

²⁵ Tlehhma'aá hatlá' sleémeero awa Amoni aa tleéhh kaa gooín baraá kitaábuú qom'aá waawituú Yuda.

²⁶ Amoni kuri foól baraá asalmoó Usa, nee Yosia garmaawós ir waawuti'ín kitaangós wa aleeró.