2 WAAWITÁ 20 - Biblía Axweesantá Hhohho' ar Mungú 2004

Tiqtír waawutmo Hesekia nee hungu/umaawós

¹ Qoomaarihe waawutmo Hesekia tiqti guna ót, iri lak gwaá', aarusmo Isaya garmoó Amos guri ii daqáy, guri báy, «AAKOÓ MUNGÚ i kaahi, ‹Do'ók amohhe'eeseek, asma kuúng a gwá', tiqtisinge kuúng a hungu/ká.› »

² Naagáy Hesekia guruuwós guri amór koo/ír xu'ús, AAKOÓ MUNGÚ guri firín, iwa kaahi,

³ «AAKOÓ MUNGÚ, án kuúng un harhheehhe'eés, adoodá' aníng kuúng ura sagadiyuús ar inkihhimu, nee ar muunaáeé' sleémeero inslaweek, nee tidá' dír geeraawoge qoom ana tleéhh.» Hesekia iri gurhaamuút iri /aá/.

⁴ Qoomár Isaya iwa tláy, tla/ángw afeena nguwa áy, axweesantá AAKOÓ MUNGÚ gana axaás i kaahi,

⁵ «Alu i ki/eek, Hesekia, geeraharusmoó muk'eé' baweek, ‹Anuú AAKOÓ MUNGÚ, Munguú baabuúwók Daudi a kah, Aníng firoorók aga axaás, nee hhirhheriiwók iga ár. Ga/aaweek, aníng kuúng u hungu/uús, nee bál tame kuúng ta daqeér baraá Doó AAKOÓ MUNGÚ.

⁶ Aníng kureeraá mibaá nee kooán ngi doók baraá hotaawoge. Aníng kuúng u tuú/, nee gixsarihe, gawaá dákw waawutmoó Ashuruwo. Aníng gixsarí an xuúm as aníng nee as sagadiyusmooeé' Daudi.› »

⁷ Isaya iri oó', «Mandasmoó taa tleéhh ar /aantsí oohare'. Ku qasá' didár umángw koom, daqaní inós i hunguu/.»

⁸ Hesekia Isaya guri yaahaás, «Layár ni ar a gaalá ar amór AAKOÓ MUNGÚ daahh, adór án nir hunguú/, nee bál tame niwa tlaw baraá doó AAKOÓ MUNGÚ?»

⁹ Isaya iri oó', «Gaarí an layár kuúng ta aan ar amór AAKOÓ MUNGÚ daahh, adór al'axweesantós ngir boo/eés. Xáy ka sla' geehhaantamo har afiqoomár digiruú mibaangw in geerií kumiíti, laqaá in alií kii/?»

¹⁰ Hesekia iri oó', «Geehhaantamo geerií kumiitaro adoosíng ka inslaahh, ala áx gimáy geehhantamo i alií ki/i digir mibaangw.»

¹¹ Aarusmo Isaya AAKOÓ MUNGÚ guri ló'wa firín, AAKOÓ MUNGÚ geehhaantamo guri alií ki/ís digir mibaangw, gawaá tsa/a/amtoodá' taa tleéhh nee Ahasi.

Ya/abuusér Babulonír daahh

¹² Qoomaarihe waawutmo Merodak-baladani garmoó Baladani waawutmoó Babuloni gana axaás adór Hesekia ira tiíq nee hám daxta aa huunguú/. Inós barwiito'o gana ya/aáw dinkwa nee qeemuwo amór waawutmo Hesekia.

¹³ Hesekia giri dah'ís, do'ós kuduú daqaari'iima ngi amohhe'eemamisi guna laqán: Peésa nee sahaábuwo, nee mooyangwdá' tsuú', nee di/i, nee do'ós oo xooslár slaqwarár koóm, nee xoosla sleémeero tidá' sa dawa gana laqán. Hesekia umuú gár aa laqaniiká i káhh baraá do'ose, nee ar dawa baraá yaamuuwose.

¹⁴ Naagáy aarusmo Isaya waawutmo Hesekia guri i daqáy, guri yaahaás, «Mukwí mi kaáhi? Amór i dahhiya' a amoomá?» Hesekia iri oó', «Mukwí amór yaamaá saawá' awa Babuloni gan daahh.»

¹⁵ Isaya iri oó', «Gár na ariyé' a milá baraá do'oge?» Hesekia iri oó', «Mura' sleémeero kuduú baraá dooeé' ngwa ariyé', ar na laqamiiká i káhh tam ar wák tidá' sa dawa.»

¹⁶ Isaya Hesekia guri báy, «Gimáy, axweesantá AAKOÓ MUNGÚ iiárií qaaseek.

¹⁷ Qaytsiít, qooma i hardát ar xosluudá' sleémeero ar baraá do'ók i dirii', nee tidá' baabi'iiwók naa burumburiyé' ay laarí, kan ar tláy ay yaamaá Babuloni. Gaa tam ar wák ar meet i káhh. Adoorí an adoodá' AAKOÓ MUNGÚ i kaahi.

¹⁸ Slám na/iiwók bahh'alé kinar tláy nee kiri karmuumúy, niri baraá doó waawutmoó Babulonír wa gadiyuusiyá'.»

¹⁹ Hesekia iri oó', «Axweesantasír AAKOÓ MUNGÚ ta kat i qoón.» Asma inos ina baraá guruuwósí oó', «Ahaá ala, gár is tleehharutká a milá, bar baraá waawuti'iimar'eene wayda i deer nee saxremaawo?»

Alhhe'eesoó waawuti'iimár Hesekia

²⁰ Tlehhma'aá hatlá' awa waawutmo Hesekia nee migtose, nee adoodá' tlahhsár ma'aay ngira tleéhh, nee mapeeraá ma'aá wa/amisá' baraá gixsa, kaa gooín baraá kitaábuú qom'aá waawituú Yuda.

²¹ Hesekia iri gwaá', garmaawós Manase iri waawuti'ín kitaangós wa aleeró.