2 WAAWITÁ 2 - Biblía Axweesantá Hhohho' ar Mungú 2004

Eliya kuwa artláy gawaá doori

¹ Qoomaadá' iwa xeér ar AAKOÓ MUNGÚ Eliya nguwa ar tleemuú wa slai gawaá doori ar fur'ár bambaao, Eliya nee Elisha ta baraá loohírí dirii', ta Gilgalír daahh.

² Eliya Elisha guna báy, «Gám na'ás diirí meeteek, asma aníng AAKOÓ MUNGÚ iga ya/aáw Beteli.» Ala Elisha iri oó', «Adoodá' AAKOÓ MUNGÚ ir hotaatina nee adoodá' kuúng tar slafa, ar looeemaawo aníng kuúng u baloó geexawaaká.» Naagáy tay alkoné' ay Beteli.

³ Eeharuusér aaruuse tidá' Beteli i dirii' Elisha guri i daqeér, guri beér, «Xáy, kuúng hamí laarí a xúa AAKOÓ MUNGÚ aakoowók nguwa ar tlay?» Elisha iri oó', «Eeít, a xuú', kuungá' xasliité'.»

⁴ Eliya Elisha guri báy, «Gám kuúng diirí meeteek, AAKOÓ MUNGÚ aníng iga ya/aáw ay Yeriko.» Ala Elisha iri oó', «Ar adoodá' AAKOÓ MUNGÚ ir hotaatina nee adoodá' kuúng tar slafa, aníng kuúng u baloó geexawaaká.» Naagáy tay altláy ay Yeriko.

⁵ Eeharuusér aaruuse ar amoodár Yeriko Elisha guri i daqeér, guri beér, «Xáy, kuúng hamí laarí a xúa AAKOÓ MUNGÚ aakoowók nguwa ar tlay?» Elisha iri oó', «Eeít a xuú', kuungá' xasliité'.»

⁶ Naagáy Eliya Elisha guri báy, «Gám na'ás kuúng diirí meeteek, AAKOÓ MUNGÚ iga ya/aáw ay yaaér Yordani.» Ala Elisha iri oó', «Ar adoodá' AAKOÓ MUNGÚ ir hotaatina nee adoodá' kuúng tar slafa, aníng kuúng u baloó geexawaaká.» Naagáy tsaraawo tiri alkoné'.

⁷ Eeharuusér aaruse ar mibeeri kooán iri eehariín aluudá' wa alé, ay yaaér Yordani. Eliya nee Elisha tari sihhiít dír afaá yaaér Yordani, nee eeharuuseedár aaruuse tari adooqá' i sihhiít.

⁸ Eliya tlawuwós guri duúx guri marmaár, ma'aay giri slaáhh, ma'aay nay tla/aa qasitiyé' bihhe tsár, inooín tari yaamaá kaahaár waaraáhh ay gayuuqá'.

⁹ Tawa hardáh gayuduú hatlae Eliya Elisha guri báy, «Gimáy gár ta sla' ooang dír aníng tira ar tlayká diroge.» Elisha iri oó', «Masók aleesleemuú qeeru oo adór kók kwisíng un sagaáwa tsár wa sláw.»

¹⁰ Eliya iri oó', «Firoorók tí ka ló'wa gawit, ala tam nee tihe qeemu u sleér qoomár bar tlatláw bira aán, ala bira aandiiká gár ta sleer i káhh.»

¹¹ Qoomár tawa hi'iimiti nee tawa axweesi ila nee tí gaárír asla nee faraásír asla Eliya nee Elisha giri parátl, Eliya kuri ar tláy gawaá doori ar fur'ár bambaao.

¹² Elisha adoorí ngiwa ár iri /aá/ iwa kaahi, «Baabuúeé', baabuúeé', gaardaá faras i uuruxun nee mukdá' faras gwaa i tsa/an.» Naagáy Elisha Eliya gway ártí ki/iiká. Elisha tlabaawós giri óh, giri feehhamiís kaeemo tsár.

¹³ Naagáy tlawuuduú Eliya aa gawaawós i huu', guri taataáhh, iri kií/, iri sihhiít dír gaangeefír yaaér Yordani.

¹⁴ Tlawuuduú Eliya aa gawaawós huu' guri óh, ma'aay giri slaáhh iwa kaahi, «AAKOÓ MUNGÚ, Munguú Eliya i amá?» Qoomár ma'aay ngiwa slaáhh, ma'aay nay qasiitiyé' bihhe tsár, inós iri waaraáhh ay gayuú hatlá'.

¹⁵ Eeharuuseedár aaruuse kudaá Yeriko, Elisha nguwa ariyé', tari oó', «Qeeruú Eliya i gawaá Elisha i dirii'.» Naagáy ngway al'ayé' niri tumbarara'atiyé' dír geeraawós i aleero.

¹⁶ Tari oó', «Atén sagadiyuuseerók, múk miguuse oo mibeeri kooán u koomaán, pa/aángwí haniseek aakoowók ngu leeleehhtuú aye', barnaxes qeeruú AAKOÓ MUNGÚ guna ar tláy gway kwaáhh gawaá tlom'i laqaá baraá xatsa.» Elisha iri oó', «Aasla'áy, mi ya/aawara'.»

¹⁷ Alaá inooín tawa ló'wa naagiís, inós iri muruút, giri báy, «Ya/awaak.» Gawaá adoorihe múk mibeeri kooán kuri ya/aáw, tari tláy kway leelehhiít deelo tám, umuú diiro, ala ngwa ari'iiká.

¹⁸ Inooín tari kií/ amór Elisha qoomaadae inós gi Yerikór wa daamaarán, giri báy, «Xáy, aníng kuungá' naa báwiíke ma daqawara'.»

Waa/oo/amór Elisha

¹⁹ Aluudae múk Yeriko iri daqáy dír Elisha, nguri bayé', «Aáko, gixsarí bar ga/eér ka mak ló'wa hhoohhoo', ala ma'aywós ki ló'wa tlakw nee birka /aáy /ameena gur'e gan kwakwáhh.»

²⁰ Elisha giri báy, «Diwi qaasare' baraá qwaree/amoó /abén, daqaní ngi amor'eé' hubá'.» Inooín ngay huwiyé'.

²¹ Elisha iri tláy, ay didá' tsiinqár ma'aay i diri', diwtidá' gari kwaáhh baraá ma'áy ale, iri oó', «AAKOÓ MUNGÚ i kaahi, ‹Ma'ayká' iga tsuu'uús, iimír hamí gwa'ara ngi baloó huwiaaká, laqaá /ameena gur'e ga kwakwahhaká.› »

²² Nee ma'aydá' niri hhooayé' ay laarí ar adoodá' Elisha ngira oó'.

²³ Elisha iri Yeriko wa tláy ay Beteli. Qoomár iwa baraá loohírí dirii'i daaqayko nina baraá gixsár wa ti'iít, inós kuri iimu/ún tloqmisuuwo, tawa kaahi, «Tláw, tláw, aakoó paynú.»

²⁴ Elisha giri xuuxuú', giri lu'ús ar umuú AAKOÓ MUNGÚ, makaá tsár awa /ameena awa ta bay duúbu, niri ti'iitiyé' baraá sla/atá wa ale, daaqayduú mibeeri tsiyáhh nee tsár kuri karslamiís.

²⁵ Elisha aaiiwose iri kumiít ay tloomár Karmeli, niri amoodá' wa kií/ ay yaamaá Samaria.