2 WAAWITÁ 19 - Biblía Axweesantá Hhohho' ar Mungú 2004

Hara'ayár Isaya dír waawutmoowo

¹ Qoomár waawutmo Hesekia tí ngiwa axaás, tlabaawós gina feehhamiís, nee guniyadu giri tsiít, iri dáh baraá doó AAKOÓ MUNGÚ.

² Inós Eliakimu guna ya/aáw, hedaáduú úr oo doó waawutmo, nee Shebna kuduú goousmo, nee kaahamuusér Mungú tidá' aa diimaadiin. Inooín tlabaá guniyadu ngina tsiitiyé', nay amór aarusmo Isaya garmoó Amos kayé',

³ Isaya nguri bayé', «Hesekia i kaahi, ‹Laarí an deelór slahh'amaaye nee ar mureekesaay, nee ar /ooslisliingw, asma atén a adór /ameenír xwaylár slaa', ala /uuruú na/aay ngur xwayluur i kaahh.

⁴ Hamí sleeme i ya/aán AAKOÓ MUNGÚ gaa axaás axweesantá heedaádá' úr oo múk taa karmuumúy, kudá' tinda ya/aáw nee wawutmoó Ashuru, as aakoowós Munguúdá' slaáf nguwa /oosliislin. Doóqa AAKOÓ MUNGÚ, Munguúwók inós gu naanaaq as /aymi'iidá' aa axaás. Gawaá adoorihe mukók kwí aa meet aleefirimeek.› »

⁵ Naagáy sagadiyuuseedár waawutmo Hesekia iwa hardát amór aarusmo Isaya,

⁶ Isaya giri báy, «Aakoohúng bawaak, AAKOÓ MUNGÚ i kaahi, ‹Ma da'ayumiitaar as axweesantasíng taa axás, tisíng sagadiyuusér waawutmoó Ashuru i kat as waaniqay'eé'.

⁷ Qaytsiít, aníng waawutmo u dae tsaát, inós kun lamtá báy, iri waatl ayaawós, amoodár ayaawose kuri gaas ar paánga.› »

Kángw hatlá' oo daetlaquú múk Ashuru

⁸ Naagáy heedaádá' úr oo múk taa karmuumúy ngiwa axaás adór waawutmoó Ashuru nira tláy Lakishír wa ale, inós ina tláy iwa didií hardáh gixsár Libna kaa tsitsiíhh.

⁹ Nee waawutmo ngiwa axaás adór Tirhaka waawutmo Kushi nir hi'iít iwa slaqwarár ay amoorós, inós muu guri malé ya/aáw amór Hesekia iwa kaahi,

¹⁰ «Hesekia waawutmoó Yuda bawaak, ‹Kuúng ma ya/aamaar tuwa tawo al/agin nee Munguúwók, kwisíng ta harahhif, uwa babay Yerusalemu ka baloó hayohiiká nee waawutmoó Ashuru.

¹¹ Kuúng a xú' adór waawituú Ashuru aa tleehhiít dír xoordaá hatlae, nee adoodá' ngira hhaamisiyé' ló'wa alé, xáy ka xu', kuúng hamí a ba/aánda?

¹² Xáy, munguaá xoorór Gosani nee Harani nee Resefu nee mukduú Edeni kudá' Telasárír hoót xoorduuká' taa hhaamiís nee taati'iieé', xáy inooín kaa /iísi nee munguii'ín?

¹³ Xáy waawutmoó Hamati nee oo Arpadi, nee oo Sefarfaimu, nee oo Hena, nee oo Ifa, amór tay dirii'i a amá?›»

¹⁴ Waawutmo Hesekia barwito'o gana dír mukdá' taa ya/aáw wa sláy, gari soomuús. Ngiwa hhe'eés iri dáh baraá doó AAKOÓ MUNGÚ, gari qaás dír geeraá AAKOÓ MUNGÚ.

¹⁵ Inós AAKOÓ MUNGÚ guri firín iwa kaahi, «Aá AAKOÓ MUNGÚ, Munguú múk Israeli, kuúnguudá' kitaangók gáwtí dirií' dír keruúbiro, a har kuúng kilók Munguú ló', kudá' waawituú baraá daanduú yaamu sleémeero gu sawaawuti'i'iím. Kuúng yaamu nee dooriwo ina tléhh.

¹⁶ Aá AAKOÓ MUNGÚ, kuúng qaytsitáng, iia qaaseek niqayduú Senakeribu Munguú slaáf nguwa niqin axaaseek.

¹⁷ Aá AAKOÓ MUNGÚ, ar tsuwa ló' waawituú Ashuru xoordaá yaariir gaa hhaamiís nee yaamuuine.

¹⁸ Mungui'ín giri kwakwaáhh baraá asla, asma a munguaá loeeká. Mungui'ín an gadiyér dabaá muu, a xaai nee tlaa/e kilooín, an gár ngisa hhitín.

¹⁹ Hám daxta AAKOÓ MUNGÚ, Munguúrén, aníng kuúng un fiririím, ti ba/amis gawaá dakose, as daqaní waawituú baraakaá yaamu ngiwa tsaahhi adór kuúng tar AAKOÓ MUNGÚ, kuúng kilók.»

Afór Isaya aa ilahaniís dír waawutmo

²⁰ Aluuwo Isaya garmoó Amos afo gari ilahaniís dír Hesekia, iwa kaahi, «AAKOÓ MUNGÚ, Munguú Israeli i kaahi, ‹Aníng kuúng iga firiín daanduú Senakeribu waawutmoó múk Ashuruwo, nee aníng firiirók aga axaás.›

²¹ AAKOÓ MUNGÚ daanduú Senakeribuwo i kaahi, ‹Dasír Siyoni kuúng ugwa waaqá', nee ugwa ló'wa waniqís, nee dasír Yerusalemu kuúng ugwa aluú wa qoongo'ós,

²² kuúng heé ta niqiin nee oo ta /oosliisliin a heemá? Xáy heé ta i tseeamiin a heemá? Heé ta daara/ángwár ga/eer a heemá? A kudá' hhoohhoó' oo Israeli.

²³ AAKOÓ MUNGÚ una niqiín ar ya/abuuseerók tidá' taa ya/áp, kuúng tari ó', ‹Ar gaarduueé' kuká' yaariire ana tsa/ám ay gawaá sagér tlom'i, ay gawaá tsintá tloomár Lebanoni. Aníng sahhtaarós tidá' tledaadet an daraáhh, nee xaaiiwós kudaá misonobaáriro, nee an sleé/ ay baraá tla/angwdá', ay baraá gartós tidá' ur.

²⁴ Aníng hhaleeri iga foliít, nee ma'aá ayaá hee ngiri wáh, aníng ma'aá ya'aá Misri sleémeero ngiri kahaás ar tsa/aá ya'aaer'eé'.› »

²⁵ Kuúng aga axaskáhe adór aníng kaangwí hám ni tlehhiit ngura qoomeés iimír aange. Kuúng una qaás as gixsaduudá' koo/i gawden kiwa warqes tawa ufér sluhhaay.

²⁶ Yaamuloouuser'ín iri nehuumít, kiri dae tsaát nee niri amoqwaqwadiné', tari adór balángw baraá qaymo tleehhiit, adór gitsór dutlutluu/, adór gitsór naa gawaá daanduú dó' wa ti'it, tidá' kah dír ira urareeriiká.

²⁷ Aníng adór kuúng tar iwiiwit nee tar tlatleer a xuú', adór kuúng tar ti'imit nee tar darat a xuú', nee adór kuúng aníng ira i buhhaabúhh a xuú'.

²⁸ As adoosíng aníng iwa i qa/ít, nee daara/aangók nguwa axaás, aníng kuúng un duunga' mogolmór uuruúx nee taqesmoowók un tseék ar him'e. Aníng kuúng un ki/ís ar loohidá' nira daqeér.»

²⁹ Aluuwo Isaya waawutmo Hesekia guri báy, «Gaarí an laya diroge, kurkí nee kurkuquú hatlae kuúng balángw ta /ak a kudá' aa kilós ti'iit. Ala bál kurkú tame balaangw un dahasá' nee kuri fiqá', nee sabiíbu kuri dahasá' mamuuwós kiri /agá'.

³⁰ Mukdá' aa meet baraá tlahhoó Yudawo i tlaahh adór dee/aruú xaai, kudá' baraá hhapeérí dirií' nee /ar'i ngiwa slaslaaxi gawaá haleemiwo.

³¹ Asma múk meét baraá gixsár Yerusalemu i deer, eeít, nee panoó niiná i meet gawaá tloomár Siyoni, asma AAKOÓ MUNGÚ adoorí gaa ístí tsaát tleehharo.

³² «Gawaá adoorihe, AAKOÓ MUNGÚ tí gana oó' daanduú waawutmoó Ashuruwo, iwa kaahi, ‹Inós i baloó dahiiká baraá gixsarí, laqaá mahaangw gu tsaxaariiká, laqaá ni hardihiiká ar gaamboót, laqaá gixsarí ga harweeriiká.›

³³ Inós loohidá' nira hardáh gan ar kii/, nee i baloó dahiiká baraá gixsa. Adoorí an adoodá' AAKOÓ MUNGÚ naa oó'.

³⁴ Eeít, aníng gixsarí a xuúm as daanduú ilaiwa/amer'eé' nee as daanduú sagadiyusmooeé' Daudi, gixsarí a xuúm nee ngiri ba/amís.»

³⁵ Naagáy xweeradaá kilae malaykamoó AAKOÓ MUNGÚ iri dáh baraá xafoó slaqwaruusér múk Ashuru i diri', múk kume tsiiruú wák nee mibeeri dakaát nee kooán guri tsuú/. Qoomár looa niwa tleér, qatuuwo niwa tláy naxés tu'u naa qaró hhaafmitiyé'.

³⁶ Naagáy waawutmo Senakeribu oo Ashuru iri tláy, iri waátl amór do', iri hotaá áy Ninewi.

³⁷ Looarka wake Senakeribu iwa munguúwós sluufmiisi baraá doó Nisroki munguúwós, daaqaywós oo tsár, Adrameleki nee Shareseri nguri gaasiyé' ar paánga, inooín tari tlatlaáhh ay yaamaá Ararati. Garmaawós Esarhadoni iri waawuti'ín kitaangós wa alé.