2 WAAWITÁ 18 - Biblía Axweesantá Hhohho' ar Mungú 2004

Waawutmo Hesekia oo Yuda

¹ Kurkú tám oo waawuti'iimár Hoshea garmoó Ela, waawutmoó Israeli, Hesekia garmoó Ahasi waawutmoó Yuda waawuti'iima gana iimu/ún.

² Waawuti'iima ngiwa iimu/ún kureeriiwós a mibeeri tsár nee kooán. Inós baraá waawuti'iimaro kureeri ngaa /aáy mibeeri tsár nee gwaleél baraá gixsár Yerusalemuro. Aayoorós a Abi dasír Sekaria.

³ Inós geeraá AAKOÓ MUNGUHE hhooa gana tleéhh adór Daudi baabuúwós wa ale.

⁴ Inós kiteeridaá gawaá gongoama' awa munguaá lama kiwa sluufmiisi nee uheemidae gina feé/, nee slaqsoó munguú Ashera guna tsaát. Inós slaqsayduú dayshamo, kudá' aáng Mose aa tleéhh ar muqslír sirdaa/aat, kudá' ta babay Nehushtani, guri suwawaá'. Asma ay qoomaadá' múk Israeli dayshamoodá' taa tleéhh nee Mose ngun mooyángw tsuú' i da/a/aná' as nguwa ilaiwawa/iya'.

⁵ Hesekia AAKOÓ MUNGÚ, Munguú Israeli guna ló'wa haratlintií'. Baraá yaamaá Yudawo waawutmoó adór inós i kaahh, tam dír waawitaádá' aa giirini, laqaá kudá' aa waawuti'in aluuwose.

⁶ Inós AAKOÓ MUNGÚ guna eehár ar inkihhimu, sleeme gwa geexayká, inós hara'ayaadá' AAKOÓ MUNGÚ aa haniís dír Mose gana óh.

⁷ Naagáy AAKOÓ MUNGÚ a dinkwa nee inós, guri aleesleemú i haniís baraá umuú gár aqo tleehhi. Inós kuwa sawaawuti'in nee waawutmoó Ashuru gana sií', nee nguwa sagadiyuusi.

⁸ Inós múk Filisti slaqwaraaro guna baál nee guri haraadáh baraá gixsaduín iimír Gasa ay ayeemaá inslawaydá', iimír iimu/úngw /Aampaá xuuma ay gixsadaá taa tleéhh ar koo/ír gawit.

⁹ Kurkú tsiyáhh oo waawuti'iimár Hesekia, sleeme qoomaarihe Hoshea garmoó Ela kureeraá faanqw gaa /aáy baraá waawuti'iimár yaamaá Israeliro, Shalmanesa waawutmoó Ashuru gixsár Samaria gana i haratláy, gari harweér.

¹⁰ Alhhe'eesoó kurkú tame múk Ashuru gixsár Samaria gari hayóh. Qoomaarihe Hesekia baraá waawuti'iimaro kureeraá lahhoó' gaa aáy, nee qoomaarihe waawutmoó Israeli kureeraá gwaleél gaa /aáy baraá waawuti'iimaro.

¹¹ Waawutmoó Ashuru múk Israeli guri haásaáng wa ar tláy ay yaamaá Ashuru, bahh'ale giri qaás baraá gixsár Hala nee ar Habori, nee bahh'ale baraá bihhaá yaaér Gosani, nee gixsadaá yaamaá Media.

¹² Adoorí ina tleehharút asma múk Israeli afór AAKOÓ MUNGÚ, Munguúín, nga iiárií qaasi'iiká. Inooín al'axweesantós ngina geexayé', laqaá afór Mose sleeme nga iiárií qaasi'iiká, sagadiyusmoó AAKOÓ MUNGÚ kudá' aa hara'ayín.

Yerusalemu kawa dae tsaát nee múk Ashuru

¹³ Qoomár kurkú mibaá nee tsiyáhh oo waawuti'iimár Hesekia, waawutmo Senakeribu oo Ashuru gixsadaá Yuda sleémeero kudá' taa tleéhh ar koo/ír gawden gina i haratláy, nee giri hayóh.

¹⁴ Hesekia waawutmoó Yuda afo gari ya/aáw amór Senakeribu baraadaá Lakishi, guri báy, «Gám aníng aga dakuús. Na'amaamís, slaqwara sihhtisek, nee aníng umuú gár ta sla'a ngi haniís.» Waawutmoó Ashuru iri oó', «Hesekia waawutmoó Yuda kílor kume mibaangw ar peésa nee kílor kumuú wák ar sahaábu ngi haniisi.»

¹⁵ Hesekia peésaadá' sleémeero baraá doó AAKOÓ MUNGÚ dirii', nee tidár baraá doó waawutmowo gari haniís dír Senakeribu.

¹⁶ Slám sleeme sahaábudá' baraá afér Doó AAKOÓ MUNGÚ i dirii' nee sahaábu inós aa afkú maandár sliík sleémeero guna haniís dír waawutmo Senakeribu.

¹⁷ Naagáy waawutmoó Ashuru geeraharusmoó úr oo slaqwaruuse nee geeraharusmoó úr oo askaári nee geeraharusmoó múk taa karmuumúy dinkwa nee slaqwaruusér yaariir, gari ya/aáw amór Lakishi wá ale ay amór waawutmo Hesekia baraá Yerusalemu, niri hardihiyé' baraá Yerusalemu. Inooín niwa hardihiyé' nay sihhitiyé' bihhaá maparír ma'aay tidár bihhaá loohidá' ur, ar amór didár hhuuntsitór kaw.

¹⁸ Waawutmo Hesekia nguwa ateetiyé', inooín kina al'áy nee Eliakimu garmoó Hilkia kudá' doó waawutmoó sagesihhmiít, nee Shebna kuduú goousmo, nee Yoa garmoó Asafu goousmoó muruú inslaslángwá hariím.

¹⁹ Geeraharusmoodá' úr oo mukdá' taa karmuumúy iri oó', «Hesekia bawaak, adoorí an adoodá' waawutmoó úr oo Ashuru i kaahi, ‹Gaasíng taa harahhíf a milá?

²⁰ Xáy ka xu' axweesantá tawo a qeeruúwo nee an /uuruúwo baraá slaqwaraaro? Heesíng a heemá taa harahhíf tam aníng iri áhh?

²¹ Hám qaytsiít daxta múk Misri una harahhíf, inooín a adór hhartá aa qet, tidá' hee birnga ar qadiís gun dawa mút. Adoorí an adoodá' waawutmo Farao oo Misri i dirii'i dír mukdá' sleémeero inós gu harahhifa.›

²² «Ala tam i beera, ‹Atén AAKOÓ MUNGÚ, Munguúrén un harahhifaán,› xuaak adór munguúsíng tar kudá' Hesekia kiteeriwós kudá' gawaá gongoama' awa ilahhooa hanmis ngira fe/iít, múk Yuda nee oo Yerusalemu guri báy, ‹Mungú sluufmisaak dír geeraá kitangwduú ilahhooa oo baraá Yerusalemurí dirií'.›

²³ Gimsé' daxta axweesé' nee aakooeé' waawutmoó Ashuru, daqaní aníng farasuú kume tsár ngu haniís, bar kuungá' múk faras gu i tsa/ám u koondá'.

²⁴ Ahaá kuungá' heé wák oo niiná baraá sagadiyuusér aakooeene adór kur alií ki/isa' a adoomá, bartaqae kuungá' gár ta koonda' i káhh, aqo múk Misri un harahhifá', nee mukdá' farasuuín gu madiít.

²⁵ Tam adoorihe, xáy, kuungá' ka xua' aníng nee AAKOÓ MUNGÚ ti kaahi koomanaakáhe as yaamuuhúng ngiwa i haratlaw, nee ngiwa qwaarees. AAKOÓ MUNGÚ an heé iga bay, ‹Yaamusingá' i haratlaweek nee ki hhaamís.› »

²⁶ Naagáy Eliakimu garmoó Hilkia, nee Shebna nee Yoa, heedaádá' úr oo múk taa karmuumúy nguri bayé', «Na'ás, axweés ar tsifrír Aramu, asma atén a axamisaán. Ma axweesaar ar tsifrír Ebrania asma mukqá' gawaá ságw koo/írí dirií' i axamiis.»

²⁷ Heedaádá' úr oo múk taa karmuumuyi iri oó', «Xáy, aakooeé' aníng ina ya/aáwi dír aakoohúng nee dirhúng kilós? Ala iga ya/awikáhe dír mukdá' gawaá ságw koo/írí dirií', kudá' sleémeero taa sakwasleemuút dinkwa nee kuungá', /o/oduuín ngiwa /ayiya' nee sooxaín ngiwa kilooín wahiya'.»

²⁸ Naagáy heedaádá' úr oo múk taa karmuumúy iri tseé' ar afór ur, nee iri axweés ar tsifrír Ebrania, iri oó', «Iia qaasaak, gár waawutmoó úr oo Ashuru i kaahi,

²⁹ ‹Adoorí an adoodá' waawutmo i kaahi, kuungá' mutunduwa al/agín nee Hesekia, inós kuungá' nu baloó aleeslayká /iisaro gawaá dabaeene.

³⁰ Kuungá' Hesekia munduwa tawo al/agín as AAKOÓ MUNGÚ kuwa harahhifa' iwa kaahi, AAKOÓ MUNGÚ kuungá' nu ba/amis, nee gixsarí waawutmoó Ashuru ga hayohiiká.›

³¹ Kuungá' Hesekia mu iiárií qamimara', asma waawutmoó Ashuru i kaahi, ‹Kuungá' wayda koomaak dir'eé' wa ale, ti hanise' gawaá dabaeé'. Daqaní dír kuungae umuú heewo mamaá sabiíbuuwós gi /aay kilós alé, nee mamaá /aantsírós gi /aay, nee ma'aá hhalaangós gi wahán,

³² ay dír aníng kuungá' nuy huúw amór yaamaá saawá' awa adór koohúng kuká', yaamaá balaangw nee difaái, yaamaá mikaátér koomá' nee qamaá sabiiíbuuwo, yaamaá xaa'aá seituúni nee awa danér koomá', as daqaní kuungá' tawa hota', tawa baloó qatla'aaká. Hesekia kuungá' burnu al/agín, kuungá' mu iiárií qaasara' iwa kaahi: AAKOÓ MUNGÚ kuungá' nu ba/amis.

³³ Xáy, baraá munguaá xoordaá hatlae awa muk'ín ngwa /iisiyé' i dayá'a gawaá dabaá waawutmoó Ashuruwo?

³⁴ Xáy, munguaá Hamati nee awa Arpadi i amoomá? Munguaá Sefarfaimu nee awa Hena nee awa Ifa i amoomá? Xáy, gixsár Samaria nga ba/amisí'i gawaá dabaeene?

³⁵ Xáy, baraá munguaá yaamu sleémeerowo oo yaamuuwós gaa tuu/ gawaá dabaeene i deéro? Daqaní bir deer AAKOÓ MUNGÚ sleeme gixsár Yerusalemu ga ba/amis gawaá dabaeene.› »

³⁶ Ala muu ina qartlamiít tam heé /aymu gwa tlaaxw i kaahh, asma waawutmo Hesekia mu guna báy, «Axweesantós ma tlaxwaara'.»

³⁷ Naagáy Eliakimu garmoó Hilkia kudaádá' doó waawutmoó sagesihhmiít, nee Shebna goousmo, nee Yoa garmoó Asafu goousmoó muruú inslaslángw wa hariím, tlabaaín kiri feehhamiís, niri amór Hesekia kayé', kángw heedá' úr oo múk taa karmuumúy aa káhh nguri ooiyé'.