2 WAAWITÁ 16 - Biblía Axweesantá Hhohho' ar Mungú 2004

Waawutmoó Ahasi oo Yuda

¹ Kurkú mibaá nee faanqw oo waawuti'iimár Peka garmoó Remalia waawutmoó Israeliro, Ahasi garmoó Yotam waawutmoó Yuda waawuti'iima gana iimu/ún.

² Waawuti'iima ngiwa iimu/un kureeriiwós a mibeeri tsár. Inós baraá waawuti'iimaro kureeri ngaa /aáy mibaá nee lahhoó', baraá gixsár Yerusalemuro. Inós hhooeema gaa tleehhiiká dír geeraá AAKOÓ MUNGUHE, adoodár baabuúwós Daudi gaa tleehhiiká.

³ Ala inós tlehhma'aá waawituú Israeli gina eehár. Inós sleeme tam na/aywós guna ilahhooár da/tá wa haniís. Inós tleehhmuudá' ta waki oo xoordá hatlaá' kudá' AAKOÓ MUNGÚ aa guús geeraá múk Israelír wa ale guna tleéhh.

⁴ Aluuwo Ahasi ilahhooár muruú ta tsu/i nee mooyángw tsuú' gina hanmiís gawaá gongoamá wa ale, nee dír gamuú umuú xa'anoó naa/e.

⁵ Aluuwo Resini waawutmoó Aramu nee Peka garmoó Remalia waawutmoó Israeli tana tláy tawa slaqwarár ay Yerusalemu. Inooín Ahasi nguna harweeriyé' ala ngwa baali'iiká.

⁶ Qoomaarihe, waawutmoó Edomu gixsár Elati a tidá' aáng taa hayóh nee múk Yuda, gari ki/ís dír múk Edomu, múk Yuda kudá' baraadá' wa hoót guri guús. Múk Edomu tari dáh, nee tari hoót Elatír wa alé ay laarí.

⁷ Ahasi muu guri ya/aáw amór waawutmo Tiglat-pileseri oo Ashuru iwa kaahi, «Aníng a sagadiyusmoowók oo inkihhimuú koóm, qwaláng tu/áng baraá dabaá waawutmoó Aramuwo nee oo Israeliwo kudá' aníng iga i haraatlaye'.»

⁸ Ahasi peésaadár baraá Doó AAKOÓ MUNGÚ, nee sahaábu, nee muruú baraá doó waawutmo, gari haniís tawa qeemuú waawutmoó Ashuru.

⁹ Tiglat-pileseri firoodár Ahasi gari ya/án, gixsár Damasko gari i haraatláy nee ngiri hayóh. Waawutmo Resini oo Aramu guri gaás, muu guri ar tláy ay Kiri.

¹⁰ Waawutmo Ahasi iwa Damaskór káy as tiwa doogiya' nee waawutmo Tiglat-pileseri, iwa hardáh Damasko kitángw ilahhooa kay hanmaamisi guri ár amoodá' wa aleeró. Naagáy slaqsoó nee kudá' ti slawá' guri ya/aáw amór Uria kaahamusmoó Mungú as kitángw adór kudá' kuwa tleehhi.

¹¹ Uria kitángw ilahhooa guri tleéhh ar slaqsoó adór kudá', nee tleehhamoro guri hhe'eés dír waawutmo Ahasi nira amór dó' i ki/iiká.

¹² Ahasi niwa Damasko wa kií/ kitangwduú ilahhooa guri ár, iri tseewúy dír kitangwdá', ilahhooa gari haniís gawaadá' wa alé.

¹³ Ilahhooár da/a gari haniís, nee ilahhooár puuruhe. Ilahhooár muruú wahaangw gari tsipipi'iís, nee tseereedár ilahhooár wayda gari hikimiís gawaá kitangwdá'.

¹⁴ Kitangwduú ilahhooa aáng taa tleéhh ar muqslír sirdaa/aat, guri paraátl as AAKOÓ MUNGÚ, guri hingeés, geeraá dó' wa alé, dír tla/ángw kitaangós kuduú ilahhooa nee Doó AAKOÓ MUNGÚ, guri qaás bihhaá /iya awa kitaangós kuduú ilahhooa.

¹⁵ Aluuwo waawutmo Ahasi kaahamusmo Uria guri báy, «Kitaangwí úr ar gadiyuuseek as ilahhooár da/a ar matlaatle kawa gawaaká' wa hanmis. Nee ar tsiindo tidár puurú gawaaká' tiwa hanmis, nee ilahhooár da/a ar waawutmo nee ilahhooarós ar puuruhe, dinkwa nee ilahhooár da/a ar muu sleémeero oo baraá yaamuuká', nee ilahhooar'ín ar puuruhe nee ar muruú wahaango. Tseere sleémeero ar ilahhooár da/a nee ar ilahhooár muruú ta tsu/i gawaaká' ti tsipipi'is. Ala kitángw taa tleéhh ar muqslír sirdaa/aat a kwe'eé' as Mungú nguwa yaahamiis.»

¹⁶ Kaahamusmo Uria adoodá' waawutmo aa oó' gana eehár tleehharo.

¹⁷ Waawutmo Ahasi waqsuudá' oo birika kay iwitiís guri tsaát, birika gari hingeés gawaá hikwaadá mibaá nee tsár awa muqslidá' sirdaa/aate, nee birikadá' kari iwitiís gawaá iihhaafirír tlaa/e.

¹⁸ Nee matla/angwdá' taa tleéhh as deelór Sabaáto, kudá' taa tleéhh baraá doó waawutmo, nee afkú do'duú dahmaá baraá doó AAKOÓ MUNGÚ, waawutmo guri hingeés dír doó AAKOÓ MUNGUHE as waawutmoó Ashuru.

¹⁹ Tlehhma'aá hatlá' sleémeero awa waawutmo Ahasi aa tleéhh kaa gooín baraá kitaábuú qom'aá waawituú Yuda.

²⁰ Ahasi iri gwaá', kuri foól baraá /antaá waawitá kudá baraá gixsár Daudi, nee garmaawós Hesekia iri waawuti'ín kitaangós wa aleeró.