2 WAAWITÁ 15 - Biblía Axweesantá Hhohho' ar Mungú 2004

Waawutmo Asariya oo múk Yuda

¹ Kurkú mibeeri tsár nee faanqw oo waawuti'iimár Yeroboamu waawutmoó Israeli, Asariya garmoó Amasia waawutmoó Yuda waawuti'iima gana iimu/ún.

² Waawuti'iima ngiwa iimu/ún kureeriiwós a mibaá nee lahhoó'. Inós kureeri nga /aáy baraá waawuti'iimaro a mibeeri kooán nee tsár baraá gixsár Yerusalemuro. Umuú aayoorós a Yekolia ar gixsár Yerusalemu.

³ Inós hhooeema gina tleéhh dír geeraá AAKOÓ MUNGUHE adór baabuúwós aa tleéhh.

⁴ Tam adoorihe kiteeridá' tawa ilahhooár hanmaamisi kudaá gawaá gongooama' kaa hingeesiiká, muu ina ló'wa kumiít ilahhooár muruú ta tsu/i hanmisuwo nee mooyángw tsu/i hanmisuwo nee mooyángw tsuú' da/a/ango.

⁵ AAKOÓ MUNGÚ Asariya guri slaáhh ar tiqtír tsatmit ay gwa'ararós. Kuri har meetín nee muu baraá do'ós kudá' aa hooti. Gadiyeérós sleémeero ar waawut'iima kari tleéhh nee garmaawós Yotam.

⁶ Tlehhma'aá hatlá' sleémeero awa Asariya kaa gooín baraá kitaábuú qom'aá waawituú Yuda.

⁷ Asariya iri gwaá', kway foól baraá /antaá waawitá kudaá baraá gixsár Daudi didá' baabi'iiwós kay foól. Garmaawós Yotam iri waawuti'ín kitaangós wa ale.

Waawutmo Sekaria oo Israeli

⁸ Kurkú mibeeri tám nee dakaát oo waawuti'iimár Asariya waawutmoó Yuda, Sekaria garmoó Yeroboamu waawuti'iima gana iimu/ún baraá yaamaá Israeliro, baraá gixsár Samaria. Inós baraá waawuti'iimaro slahheeri ngaa /aáy a lahhoó'.

⁹ Inós aqo adór waawitaádá' giirin aa tleéhh gana tleéhh, tlakweema giri tleéhh dír geeraá AAKOÓ MUNGUHE. Tlehhma'aá Yeroboamu garmoó Nebati aa tleéhh gina tleéhh kudá' múk Israeli gwaa baraá tlakweemáy dahaas.

¹⁰ Shalumu garmoó Yabeshi waawutmo Sekaria guri geewaqaát, guri muúx geeraá múk wa alé, guri gaás, naagáy iri waawuti'ín kitaangós wa ale.

¹¹ Tlehhma'aá hatlá' sleémeero awa Sekaria aa tleéhh ka gooín baraá kitaábuú qom'aá waawituú Israeli.

¹² Naagáy adoorí ina tleehharút as al'axweesantadá' AAKOÓ MUNGÚ aa oó' dír Yehu iwa bo/, tidá' iwa káh, «Xwaylarók i waawuti'iín ay nángw tsiyáhh.»

Waawutmo Shalumu oo Israeli

¹³ Kurkú mibeeri tám nee gwaleél oo waawuti'iimár Asariya oo Yudawo, Shalumu garmoó Yabeshi waawuti'iima gana iimu/ún baraá Israeliro. Inós baraá waawuti'iimaro slahhaangw ngwa /aáy a wak, baraá gixsár Samariaro.

¹⁴ Menahemu garmoó Gadi ina Tirsár wa tláy ay Samaria, nee baraá Samariaro Shalumu garmoó Yabeshi guri gaás. Inós iri waawuti'ín kitaangós wa alé.

¹⁵ Tlehhma'aá hatlá' sleémeero awa Shalumu aa tleéhh nee geewaqatuuwós kudá' aa tleéhh sleémeero kaa gooín baraá kitaábuú qom'aá waawituú Israeli.

¹⁶ Qoomár Menahemu iwa baraá loohirí dirii'i iwa amór Tirsár dahhi, gixsár Tapua nee yaamuloousér ayaadae gana hhaamiís, nee múk iisaapoó yaamudae, as niwa bartós ayi'iiká. Tam /ameenár tsiihawe sleeme gana gur'e feehhamiís.

Menahemu waawutmoó Israeli

¹⁷ Kurkú mibeeri tám nee gwaleél oo waawuti'iimár Asariya oo Yudawo, Menahemu garmoó Gadi waawuti'iima gana iimu/ún baraá yaamaá Israeliro. Inós baraá waawuti'iimaro kureeri ngaa /aáy a mibaangw baraá gixsár Samariaro.

¹⁸ Inós tlakweema giri tleéhh dír geeraá AAKOÓ MUNGUHE de'emaá waawuti'iimarose, slám tlakweemadá' Yeroboamu garmoó Nebati aa tlehhiít, inós sleeme gina aleealuús, kudá' múk Israeli nguwa baraá tlakweemáy dahaás.

¹⁹ Naagáy Pulu waawutmoó Ashuru yaamaá Israeli giri i haraatláy. Nee Menahemu kilór mibeera tám nee tsiyáhh ar peésa gari haniís dír waawutmoó Ashuru nguwa alee/iisi waawuti'iimarós ngiwa gawdeesi baraá yaamaá Israeliro.

²⁰ Menahemu daqaare gana /uurutimís ohmér shekeéli mibeeri kooán ar peesa ngiwa haniisiya' umuúqo heewo. Aluuwo Pulu aa hootiiká baraá yaamaá Israeliro, ina baraá ayaawós kií/.

²¹ Tlehhma'aá hatlá' awa Menahemu aa tleéhh ka gooín baraá kitaábuú qom'aá waawituú Israeli.

²² Menahemu iri gwaá', garmaawós Pekahia iri waawuti'ín kitaangós wa alé.

Waawutmo Pekahia oo Israeli

²³ Kurkú mibeeri kooán oo waawuti'iimár Asariya oo Yudawo, Pekahia garmoó Menahemu waawuti'iima gana iimu/ún baraá yaamaá Israeliro. Inós baraá waawuti'iimaro kureeri ngaa /aáy a tsár baraá Samariaro.

²⁴ Inós tlakweema gina tleéhh dír geeraá AAKOÓ MUNGUHE, inós tlakweemaadá' Yeroboamu garmoó Nebati aa tleéhh gaa mayká, kudá' múk Israeli nguwa baraá tlakweemáy dahaás.

²⁵ Peka garmoó Remalia kuduú geeraharusmoó slaqwaruusér Pekahia, inós nee múk mibeeri kooán oo Gileadi tana aldinku'uús Pekahia nguwa geewaqaatiya', nguri gaasiyé' dinkwa nee Argobu nee Arie baraá guruú koo/ír gawit ar doó waawutmo, tidár baraá Samaria, Peka iri waawuti'ín kitaangós wa aleeró.

²⁶ Tlehhma'aá hatlá' awa Pekahia aa tleéhh kaa gooín baraá kitaábuú qom'aá waawituú Israeli.

Waawutmoó Peka oo Israeli

²⁷ Kurkú mibeeri kooán nee tsár oo waawuti'iimár Asariya oo Yudawo, Peka garmoó Remalia waawuti'iima gana iimu/ún baraá yaamaá Israeliro, baraá gixsár Samariaro. Inós baraá waawuti'iimaro kureeri ngaa /aáy a mibeeri tsár.

²⁸ Inós tlakweema gina tleéhh dír geeraá AAKOÓ MUNGUHE, nee tlakweemaadá' Yeroboamu garmoó Nebati aa tleéhh gaa mayká, kudá' múk Israeli nguwa baraá tlakweemáy dahaás.

²⁹ Qoomár waawuti'iimár Peka oo Israeliro, waawutmo Tiglat-pileseri oo Ashuru gixsadaá Iyoni, nee Abel-bet-ma'aka, nee Yanoa, nee Kadeshi nee Hasori dinkwa nee yaamaá Gileadiro, nee Galilayaro nee yaamu sleémeero awa Naftaliwo gina hayóh. Múk yaamuudá' guna haasaáng wá ar tláy ay Ashuru.

³⁰ Kurkú mibeeri tsár oo waawuti'imár Yotam, garmoó Usia waawutmoó Yudawo, Hoshea garmoó Ela Peka garmoó Ramalia guri geewaqaát guri gaás. Naagáy iri waawuti'ín kitaangós wa aleeró.

³¹ Tlehhma'aá hatlá' awa Peka aa tleéhh nee tidá' sleémeero aa tleehhi kaa gooín baraá kitaábuú qom'aá waawituú Israeli.

Waawutmo Yotam oo Yuda

³² Kurkú tsár oo waawuti'iimár Peka garmoó Remalia oo Israeliro Yotam garmoó Usia waawutmoó Yuda waawuti'iima gana iimu/ún baraá Yudawo.

³³ Waawuti'iima ngiwa iimu/ún kureeriiwós a mibeeri tsár nee kooán. Inós baraá waawuti'iimaro kureeri ngaa /aáy mibaá nee lahhoó', baraá gixsár Yerusalemuro. Umuú aayoorós a Yerusha dasír Sadoki.

³⁴ Yotam tlehhma'aá hhohho' gina tleéhh dír geeraá AAKOÓ MUNGUHE, adór baabuúwós Usia aa tleéhh.

³⁵ Tam adoorihe wa/aameedár kiteeridá' munguaá hatlá' kiwa ilahhooárií hanmamisi ar gawaá gongoama' ka hingeesiiká, muu ina kumiít ilahhooár muruú ta tsu/i hanmisuwo, nee mooyángw tsuú' da/a/aango gawaá kiteeridá gawaá gongoama'. Yotam Afkuduú Bihhaá /iya oo Doó AAKOÓ MUNGÚ guna tleéhh.

³⁶ Tlehhma'aá hatlá' awa Yotam aa tleéhh sleémeero kaa gooín baraá kitaábuú qom'aá waawituú Yuda.

³⁷ Qoomár waawuti'iimár Yotamwo, AAKOÓ MUNGÚ waawutmo Resini oo Aramu nee Peka waawutmoó Israeli gina /agís as tawa haraatlay baraá yaamaá Yuda.

³⁸ Yotam iri gwaá', kway foól baraá /antaá waawitá, kudaá baraá gixsár Daudi. Garmaawós Ahasi iri waawuti'ín kitaángós wa alé.