2 WAAWITÁ 13 - Biblía Axweesantá Hhohho' ar Mungú 2004

Waawutmo Yehoahasi oo múk Israeli

¹ Kurkú mibeeri tsár nee tám oo waawuti'iimár Yoashi waawutmoó Yuda, Yehoahasi garmoó Yehu waawuti'iima gana iimu/ún baraá yaamaá Israeliro amór gixsár Samaria. Inós kureeri ngaa /aáy baraá waawuti'iimaro a mibaá nee faanqw.

² Inós tlakweema gina tleéhh geeraá AAKOÓ MUNGUHE adoodár Yeroboamu garmoó Nebati, kudá' múk Israeli gwa baraá tlakweemáy dahaas, Yehoahasi tlehhmi'iiká' tlakw tlehhtuuwo gaa mayká.

³ AAKOÓ MUNGÚ iri ló'wa buúhh, múk Israeli guri ya/án kuwa baliiti baraá slaqwaraaro nee múk waawutmo Hasaeli oo Aramu nee garmaawós Ben-hadadi.

⁴ Yehoahasi AAKOÓ MUNGÚ guri harhheehhe'eés, AAKOÓ MUNGÚ adoodá' múk Israeli kura slahh'eemiís nee waawutmoó Aramu ngiwa ár, firor'ín gari iiaárí qaás.

⁵ AAKOÓ MUNGÚ múk Israeli guri geeraharusmoó i sláy oo gaa tuu/ dír múk Aramu wa ale. Tari hoót ar wayda ar adoodár geera.

⁶ Tam adoorihe múk Israeli tlakweema tlehhtuuwo gaa mayká, kudaá waawutmo Yeroboamu múk Israeli nguwa baraá tlakweemáy dahaás, ala tana kumiít tlakweema tlehhtuuwo nee Ashera munguúín kuduú /ameeni, ina meér baraá Samaria.

⁷ Yehoahasi slaqwaruuse ga konká, ala gár i kon aqo har múk farsuú madiít oo mibeeri kooán, nee gaardu mibaangw, nee slaqwaruusér ya'ár hi'iimiit a kume mibángw wák. Gár tas adoorí a waawutmoó Aramu slaqwaruusér múk Israeli gana hhaamiís, nee gari yaamaá hara adáh adór teerír wa aleeró.

⁸ Tlehhma'aá hatlá' sleémeero awa Yehoahasi aa tleéhh nee migtose kaa gooín baraá kitaábuú qom'aá waawituú Israeli.

⁹ Yehoahasi iri gwaá', kuri foól baraá Samaria, nee garmaawós Yehoashi iri waawuti'ín kitaangós wa ale.

Waawutmo Yehoashi oo Israeli

¹⁰ Kurkú mibeeri tám nee faanqw oo waawuti'iimár Yoashi oo Yuda, Yehoashi garmoó Yehoahasi, waawuti'iima gana iimu/ún baraá Israeliro, amór Samaria. Inós baraá waawuti'iimaro kureeri ngaa /aáy a mibaá nee lahhoó'.

¹¹ Yehoashi sleeme tlakweema gina tleéhh dír geeraá AAKOÓ MUNGUHE nee loohidár Yeroboamu garmoó Nebati gana eehár, kudá' múk Israeli gwa qwaarees.

¹² Tlehhma'aá hatlá' awa waawutmo Yehoashi nee migtose nee slaqwaradá' taa slaáqw nee waawutmo Amasia oo Yuda kaa gooín baraá kitaábuú qom'aá waawituú Israeli.

¹³ Yehoashi iri gwaá', kuri foól baraá /aantaá waawitá, baraá gixsár Samaria. Nee garmaawós Yeroboamu oo tsár iri waawuti'ín kitaangós wa aleeró.

Gwa'arár Elisha

¹⁴ Aarusmo Elisha tiqti guri /uurúr ót. Qoomár gwa'ara ngiwa áy, waawutmo Yehoashi oo Israeli guri neetleesi áy. Iwa hardáh iri dír geeraá Elisha wa /aá/, iri oó', «Baabuúeé', baabuúeé', gaardaá múk Israeli nee mukduú farsuú madiít.»

¹⁵ Elisha iri oó', «Xáda, ga/ale nee maheeri hanisang.» Yehoashi giri huúw.

¹⁶ Elisha iri oó', «Ti amohhe'es mahaangw tsaxaararo.» Elisha dabaawós giri qaás gawaá dabaá waawutmo.

¹⁷ Waawutmo adoodá' Elisha aa oó' gana tleéhh, nee pa/aangwdá' aa amór yaamaá múk Aramu xuu' guri gweér. Elisha iri oó', «Mahaangw tsaxareek.» Qoomár waawutmo mahaangw nguwa tsaxaár, aarusmo ina adaá oó', «Kuúng an mahángw AAKOÓ MUNGÚ kudá' múk Aramu gi baál. A slaqwá' nee múk Aramu baraá Afekír wa ale ay dír kay bal.»

¹⁸ Elisha waawutmo guri báy, «Maheeraá hatlá' oohang nee ki yaamií tsaxát.» Waawutmo maheeridá' giri yaamií tlaquút sagaáwa tám. Kár tlaqooro giri máy.

¹⁹ Elisha iri ló'wa daa/atúy buhhtaawo, waawutmo guri báy, «Ahaá a milá maheeri misa tlaqutká ay wai kooán laqaá lahhoó'? Adoorí geera bara tléhh múk Aramu u hhaamís ló'wa ale. Hám daxta múk Aramu u bál wai tám kilós.»

²⁰ Elisha iri gwaá', kway foól. Naagáy umuú kurko bir iimu/uu/ún daqtá múk Moabu in haratlaatleér baraá yaamaá Israeli.

²¹ Qoomarka wake muu iwa heé foliiti, daqtá slaqwaruuse kana ár, tuuadá' ngiri kwahhiyé' baraá /aantár aáng Elisha kway foól, inooín niri gowiyé'. Tuuadá' fadaá Elisha ngiwa kwatít, ina waaslé/, iri sihhít ar ya'aawós.

Slaqwarár múk Israeli nee Aramu

²² Waawutmo Hasaeli oo Aramu múk Israeli guna ló'wa baramaanuús qooma sleémeero ar waawuti'iimár Yehoahasiwo.

²³ Ala AAKOÓ MUNGÚ múk Israeli guna gurtleemuú wa ár. Inós gina gurtleemuú wa ár asma alqadoodá' aáng aa alqadín dír Abrahamu nee Isaka nee Yakobo. Tam ay laarí múk Israeli kwa hhaamiisiiká laqaá kwa si'iiká nee Mungú.

²⁴ Waawutmo Hasaeli oo Aramu iwa gwaá', garmaawós Ben-hadadi iri waawuti'ín kitaangós wa ale.

²⁵ Waawutmo Yehoashi garmoó Yehoahasi, Ben-hadadi garmoó Hasaeli slaqwaraaro guna baál sagaáwa tám. Inós gixsadu sleémeero giri tuú/ kudá' taa hayóh qoomár baabuúwós Yehoashi tawa waawutmo.