2 WAAWITÁ 12 - Biblía Axweesantá Hhohho' ar Mungú 2004

Waawutmo Yoashi oo múk Yuda

¹ Kurkú faanqw oo waawuti'iimár Yehu oo Israeli Yoashi waawuti'iima gana iimu/ún baraá yaamaá Yudawo amór Yerusalemu. Inós baraá waawuti'iimaro kureeri ngaa /aáy a mibeeri tsiyáhh. Umuú aayoorós a Sibia ar yaamaá Be'er-sheba.

² Baraá slafiingós sleémeero gan'amu guna tleéhh dír geeraá AAKOÓ MUNGUHE, asma inós kuna intsaahhatamís nee kaahamusmoó Mungú Yehoyada.

³ Tam adoorihe kiteeridaá munguaá hatlá' awa gawaá gongoama' kaa fee/iiká nee muu ina kumiít ilahhooár muruú ta tsu/i hanmisuwo nee mooyángw tsuú' kuwa da/aa/an gawaá gongoama.

⁴ Yoashi kaahamuusér Mungú sleémeero gana ateét, giri báy, «Peésaadá' tindi huwaahuwi nee muu baraá doó AAKOÓ MUNGÚ, ar adoodá' hee kura peésaarós i gooín, laqaá hee gana tawo slaá' ar muunaáwós peésaarós haniisaro, dír doó AAKOÓ MUNGÚ,

⁵ kaahamuusér Mungú peésa ngi ilaót dír umuú heewo, nee inooín daqaní wa/aameedá' aa hhiturumit baraá do'o ngi amohhe'eesiye'.»

⁶ Ala tam alaá kureeri mibeeri tsár nee tám awa waawuti'iimár Yoashiwo, kaahamuusér Mungú gár aa tléhh i káhh gawaá do'odae.

⁷ Gawaá adoorihe, waawutmo Yoashi kaahamusmo Yehoyada nee kaahamusér hatlae giri yaahaás, «Ahaá baré do' ugwa amohhe'esi'iiká? Gimsé' peésár muu ma kwatitara', huwaare' as do' kuwa amohhe'eesaan.»

⁸ Kaahamuusér Mungú adoodá' gari ya/aán, peésár muu ngiri mayé' niri ooiyé', «Atén doó Mungú u tleehhanaaká.»

⁹ Naagáy kaahamusmo Yehoyada sandakmo guri qaás bihhaá doó /iyáy awa kitángw ta ilahhooárí hanmamisi amór bihhadá' muu ir daraahi baraá doó AAKOÓ MUNGÚ, tuuntukmár sandakmo gari fooxiís. Kaahamuuse tidá' ti baalaqamiim, peésadá' tindi huwahuwi nee muu sleémeero kana qaás baraá sandakmoodá'.

¹⁰ Qoomár barka ár peésa aa tláhh baraá sandakmodae, goousmoó waawutmo nee kaahamusmoó úr oo Mungú tan dah peésaadá' kari faar, nee kari tsegiit baraá warqama', kari baats.

¹¹ Peésaadá' kawa hhe'eés qoomeemesuwo, mukdaádá' gadiyeé ga sagesihhmiít ar doó Mungú, kuri peésaadá' i haniís, inooín mukdá' peehháy gwa hhasliit nee do' gwa tleehh kuri buú',

¹² kari buu' sleeme ar múk koo/ír tleéhh nee kudá' tlaa/e gaa tsiihh, peehháy kuri tlaáxw nee tlaa/aá ta tsihhi as doó AAKOÓ MUNGÚ kuwa tleehhi, nee muruú hatlá' sla'amuút kway tlaáxw.

¹³ Ala peésaarí kaa burumburiiká as iimpedudaá peésa kiwa tleehhi, makaasír támboó mishumaa, nee búklaaywo nee tarumbeéta laqaá xooslár hatlá' ar sahaábu laqaá ar peésa.

¹⁴ Peésaadá' sleémeero kana buú' ar mukdá' doó AAKOÓ MUNGÚ gwaa inki/is tlehhmuuwo.

¹⁵ Mukdá' gadiyeédá' gaa tleehh an múk ló'wa inkihhimuú koóm, gawaá adoorihe, adór peésaadá' iri gadiyús heé ga faaro leelehhiít i kaahh.

¹⁶ Peésaadá' taa burumbuúr as ilahhooár dakuús nee tidár tlakweema hingeesa kaa huwiiká baraá doó AAKOÓ MUNGÚ, tidá' kana máy dír kaahamuusér Mungú as tawa tooín.

¹⁷ Qoomaarihe Hasaeli waawutmoó Aramu gixsár Gati gana i haraatláy nee gari hayóh. Ala Hasaeli iwa kumiít haratleemuwo ay Yerusalemu,

¹⁸ Yoashi waawutmoó Yuda ilahhooadá' sleémeero baabi'iiwós waawituú Yuda: Yehoshafati, nee Yehoramu, nee Ahasia naa paraatliyé' as Mungú, gari taataáhh, tós tidá' gay didií doók dinkwa nee sahaábu sleémeero kudá' baraá doó AAKOÓ MUNGÚ i diriiá' nee ar baraá doó waawutmo, gari ya/aáw amór Hasaeli waawutmoó Aramu. Hasaeli gila giri máy, iri ti'iít baraá Yerusalemuro.

¹⁹ Tlehhma'aá hatlá' awa waawutmo Yoashi kaa gooín baraá kitaábuú qom'aá waawituú Yuda.

²⁰ Yoashi sagadiyuuseerós guna geewaqát, nguri gaasiyé' baraá do'ós kuduú Milo dír loohidá' Sílár kaw.

²¹ Sagadiyuuseerós tidá' gwaa gas an ín Yosakari garmoó Shimeati, nee Yehosabadi garmoó Shomeri kuduú sagadiyusmoowós. Nguri fooliyé' baraá /antaá waawitá kudaá baraá gixsár Daudi. Garmaawós Amasia iri waawuti'ín kitaangós wa aleeró.