2 WAAWITÁ 10 - Biblía Axweesantá Hhohho' ar Mungú 2004

Xwaylár Ahabu kawa tsuú/

¹ Baraá gixár Samariaro daaqoó waawutmo Ahabu a mibeeri faanqw. Yehu barwito'o gari gooín amór waawituú gixsár Yesre'eli nee dír geeraharuuse nee dír xuumuusér daaqoó Ahabu. Barwito'o gár i kát a tí,

² «Asma baraá tla/angwhunge kuungá' na/aá waawutmo i koondá', dinkwa nee faras nee gaardu nee xooslár slaqwara nee gixsadaá koo/i gawdene,

³ gimsé', baraá daaqoó waawutmoowo oo aleesleemuú koóm tsawaaraak, ku waawutmoó wa qasá'. Daqaní ta slaqwá' bartá doo waawutmoó wa ale.»

⁴ Waawituú yaamaá Samaria tana ló'wa da'ayuút tari oó', «Xáy atén slaqwarár nee Yehu anqo tsuwa aleeslawaána, inós Yoram nee waawutmo Ahasia nguna aleeslay'iiká baaliro?»

⁵ Gawaá adoorihe, geeraharusmoó úr oo baraá doó waawutmo nee ga/aawusmoó úr oo gixsadá', dinkwa nee geeraharuusér hatlá' nee xuumuusero, afoorí kana ya/aáw amór Yehu, tawa kaahi, «Atén a sagadiyuuseerók, adór kuúng ta kat atén a tleehhaán, ala atén heé hatlá' u tsawaranaaká waawutmoó wá alé, gár kuúng ta sla' ar hariim tleehheek.»

⁶ Yehu gina malé barwito'ór hatlá' i gooín, iwa kaahi, «Kuungá' barqo tsuwa bartaeé' diriá', nee tidá' aníng naa oó' a tlehhá', gimsé' matlo qoomár adór tihe sagér daaqoó waawutmo Ahabu huwaare'.» Daaqoó mibeeri faanqw oo waawutmo Ahabu dír i hooti a baraá maraá geeraharuusér múk gixsár Samaria. Inooín an múk na/iidá' gaa ureemiis.

⁷ Naagáy mukdá' urén oo gixsa barwito'oodá' ngiwa slayé', daaqaydá' mibeeri faanqw oo waawutmo kuri uhín kuri ise tlaáq sleémeerowo. Sageedá' kari qaás baraá lakwaantáy, kari huúw amór Yehu kuduú Yesre'elír i dirií'.

⁸ Aluuwo sagadiyusmoó wák iri tláy amór Yehu iri oó', «Sagér daaqoó waawutmo nga qaroó huwaán.» Inós iri oó', «Baraá daqoroó tsár ti qase' dír afkú gixsa ay matlo matlaatle.»

⁹ Matlaatleero inós iri sihhiít, muu sleémeero guri báy, «Kuungá' tundu dakuús wásl, hám qaytsité' aníng aakooeé' una geewaqaát nguri gaás. Xáy hamí daxta heé mukwí gwa tsuu/ a heemá.

¹⁰ Gimsé' daxta xuaak adór axweesantadá' AAKOÓ MUNGÚ aa axweés daanduú doó Ahabuwo ira bó/, tidá' aa axweés ar loohír sagadiyusmoowós Eliya daxta gaa boo/eés.»

¹¹ Yehu múk doó Ahabu sleémeero guri tsuú/ kudá' baraá yaamaá Yesre'eli i dirií' dinkwa nee geeraharuuseerós, nee mulqer'ine nee kaahamuuser'ine, heé taa meetiís i kaahh tumu wák.

Hhay Ahasia kawa tsuú/

¹² Aluuwo Yehu iri tláy Yesre'eli wa alé ay Samaria. Qoomár iwa baraá loohír dirii'i didá' ta bay, «Xafoó de'eemuuse,»

¹³ tina doogiyé' nee múk doó waawutmo Ahasia oo Yuda, giri yaahaás, «Kuungá' a ma'aáriya'?» Inooín kuri mu/aywaáts, «Atén awa doó Ahasia, atén an baraaká' kawaán amór na/aá waawutmo nee awa aamaarós tidár waawuto'o.»

¹⁴ Inós iri oó', «Slafiingw ohiimare'.» Kiri ohín muu mibeeri tsiyáhh nee tsár, kuri tsuú/ dír iisaapoó hhalangwduú bihhaá xafoó de'eemuuse. Hee tumu wák oo taa meetiís i kaahh.

Múk doó Ahasia sleémeero oo aa meet kuwa tsuú/

¹⁵ Yehu iwa didá' wa tláy tina doogiyé' nee Yehonadabu garmoó Rekabu baraá loohi, Yehu guri taaqweés, guri báy, «Xáy kuúng inslawaywók nee kwe'eé' ti alkón'a? Aníng kuúng i dawa óta?» Yehonadabu guri mu/aywaáts, «Eeít, aníng kuúng un dawa óh.» Yehu iri oó', «Gimáy dawa leehháng.» Tiri /iye leehhiyé', guri tsa/aás gawaá gaárirós.

¹⁶ Guri báy, «Gimáy aníng eeharáng daqaní a aán adór aníng nir inkihhimuú koóm dír geeraá AAKOÓ MUNGUHE.» Naagáy tari al'aa'aá káy gawaá gaárirós ar aleeró.

¹⁷ Tawa hardáh Samaria, Yehu múk doó Ahabu sleémeero guna tsuú/, tumu wák gwaa meetisiiká. Inós adoodá' AAKOÓ MUNGÚ a dír Eliyawí oó' gana boo/eés.

Mukdá' Ba'ali gu sluufmiís kuwa tsuú/

¹⁸ Yehu múk Samaria sleémeero guna buruumbuúr guri báy, «Waawutmo Ahabu Ba'ali guna sagadiyuús gár niinár taworo, ala aníng i axamaamisá' adór ngur ló'wa sagadiyuus.

¹⁹ Aaruusér Ba'ali sleémeero ateetare', nee eeharuuseerós sleémeerowo nee kaahamuuser'ine. Umuú hee tumu wák miwa paá/ hardahamuuwo, asma aníng ilahhooár ur a muruú ta tsu/i dír Ba'alí haniisár wa slaá', nee heé aa paa/ a gaasa.» Ala Yehu adoorí gana tleéhh as aaruuse nee eeharuusér Ba'ali ngiwa slay.

²⁰ Yehu hara'aya gari oó', iwa kaahi, «Dinku'uumár Ba'ali kuwa sluufmiisi ateetare'!» Adoodá' kari tleéhh.

²¹ Yehu afo gari ilahaniís baraá yaamaá Israeli sleémeero, as eeharuusér Ba'ali sleémeero niwa hardat. Sleémeero niri hardihiyé', do'oduú sluufmisuú Ba'ali kuri hatsiís, bartaqá' wa tleemu ay bartaqá'.

²² Yehu heedaádá' tlabaá hhohho' gi sagesihhmamiít guri báy, «Tlabaasíng duuxaak nee ki hanisá' dír mukwí Ba'ali ngwa sluufmiisuú ay.» Sagesihhtusmoodá' tlabaadá' giri haniís.

²³ Yehu iri dáh baraá doó Ba'ali nee Yehonadabu garmoó Rekabu ti alkoná', muu nguri bayé', «Múk baraaká' masók a múk Ba'ali kilós gu sluufmaamiís, heé AAKOÓ MUNGÚ gu sluufmaamiís u sla'aanaaká.»

²⁴ Naagáy niri dahiyé' nee Yehonadabu as ilahhooár muruú ta tsu/i nee ar da/aa/ango kawa haniisi ar Ba'ali. Yehu múk mibeeri dakaát gwa amohhe'eés tsee/aawo, guri báy, «Mukwí sleémeero tsu/aak. Hee tumu wák bura geemeeré', heedaádá' gwa geemay aqo kun gaas.»

²⁵ Qoomár Yehu ilahhooár da/a haniisaaro ngiwa hhe'eés, inós xuumuuse nee geeraharuuse sleémeero gari báy, «Dahé', sleémeero tsu/aak, tumu wák mu meetisaara' laqaá miwa /akuút.» Tari dáh nee paangaduuine kiri tsuú/ sleémeero, tu'uuín kiri tsee/áy kwaáhh. Naagáy tari dáh baraá tla/afidár doó sluufmisuú Ba'ali,

²⁶ nee uhmoodá' taa paraátl as Ba'ali kuri tsee/áy duúx kuri daá/ ar asla.

²⁷ Uheemidá' dinkwa nee doó sluufmisuwo kiri naasúy. Doó sluufmis kuri bohóngw /o/odu tleéhh. Adoorí an adór do'duú sluufmis i dirii'i ay laarí.

²⁸ Adoorí an adoodá' Yehu ilahhooár Ba'ali ngira fiíts baraá yaamaá Israeliro.

²⁹ Ala inós tlakweemaadaá Yeroboamu garmoó Nebati gina eehár, kudá' múk Israeli nguwa baraá tlakweemáy dahaás. Inós ina kumiít murslaaqatuú dama oo sahaábu nguwa sluufmiisi, kuduú baraá Beteli nee baraá Dani.

³⁰ AAKOÓ MUNGÚ Yehu guri báy, «Adoodá' ni slaa' tleehhamoro dír xwaylár Ahabu sleémeero aga tléhh. Gawaá adoorihe, aníng al'axweesante'eé' ngin dirógí oó' nee dír xwaylarók, múk Israeli u sawaawuti'iindá' ay qartá tsiyáhh.»

³¹ Ala Yehu hara'ayár AAKOÓ MUNGÚ, Munguú múk Israeli gaa iialooeesiiká ar muunaáwós sleémeero, kitaangose inós loohidár Yeroboamu kudá' múk Israeli gwa qwaarees baraá tlakweema gana eehár.

Gwa'arár Yehu

³² Qoomaadae AAKOÓ MUNGÚ yaamaá Israeli giri iimu/ún /aareesaro. Waawutmo Hasaeli oo Aramu yaamaá Israeli sleémeero giri baál,

³³ iimír bihhaá da/aáw awa yaaér Yordanír wa tleemu nee yaamaá Gileadiwo, yaamaá aa baál a kuká': Gadi nee Reubeni nee Manase, nee iimír Aroeri tidár baraá xatstadár Arnoni, tidár baraá yaamaá Gileadi nee Bashani.

³⁴ Tlehhma'aá hatlá' awa Yehu nee migtose sleémeero kaa gooín baraá kitaábuú qom'aá waawituú Israeli.

³⁵ Yehu iri gwaá' kuri foól yaamaá Samaria. Garmaawós Yehoahasi iri waawuti'ín kitaangós wa aleeró.

³⁶ Yehu Israeli ngiwa sawaawuti'ín baraá Samariár wa ale a kureeri mibeeri tsár nee dakaát.