2 WAAWITÁ 1 - Biblía Axweesantá Hhohho' ar Mungú 2004

Eliya nee waawutmo Ahasia

¹ Alaá gwa'arár Ahabuwo múk Moabu kuwa sawaawuti'in nee múk Israeli gana sií'.

² Ahasia iwa Samariár i dirii'i ina /eét gawaá daárír do'ós wa alé, tiri ló'wa hariiáy. Inós muu guri ya/aáw, guri báy, «Tlawsé' Ba'alsebubu yaahasare', munguú gixsár Ekroni, axáy a hunguú/a tiqtirihe.»

³ Ala malaykamoó AAKOÓ MUNGÚ aarusmo Eliya oo Tishbe guri báy, «Tláw ti doge' nee mukdaádá' taa ya/aáw nguwa yaahasi, ‹Ahaá waáy, gár tas Ba'alsebubu, munguú gixsár Ekroni yaahasár eera', asma Mungú in káhhi baraá yaamaá Israeliro?› »

⁴ Gawaá adoorihe tlawsé' waawutmo ku beera', «AAKOÓ MUNGÚ i kaahi, ‹Kuúng a awedká gawaá qatanisíng ti qati, looeemawo a gwá'.› » Eliya iri tláy.

⁵ Mukdaádá' ta ya/aáw iri kií/ amór waawutmo, inós giri yaahaás, «Ahaá wáy misinda ki/é'?»

⁶ Inooín tari oó', «Atén tina doogaán nee heeko tiri báy, ‹Ki/é' amór waawutmoohúng, kudá' kuungá' naa ya/aaw, ku beera', AAKOÓ MUNGÚ i kaahi, ahaá waáy gár muu kusa ya/áp amór Ba'alsebubu, munguú gixsár Ekroni? Asma Mungú in káhhi baraá yaamaá Israeliro? Gám a awedká gawaá qatanisíng ti qati, looeemawo kuúng a gwá'.› »

⁷ Waawutmo inooín giri báy, «Ahaá heesíng a heemá, nee a heé adoomá oo nee kuungá' taa doge' nuri kangwsíng báy?»

⁸ Inooín tari oó', «Heedaádá' hiyoó se'éngw koóm guna dahaás, nee himuú kaahari i gawaá afeetlaawós.» Waawutmo iri oó', «Heesíng xaa a Eliya kuduú Tishbe.»

⁹ Waawutmo geeraharusmoó slaqwaruuse guri ya/aáw nee múk mibeeri kooán as Eliya nguwa leehhiya'. Geeraharusmoowí oo slaqwaruuse iwa hardáh, Eliya aa iwiít gawaá tlooma, guri báy, «Xáy, kuúng heé Mungú, waawutmo ina oó', ‹Aweeráng.› »

¹⁰ Eliya geeraharusmooduú slaqwaruusér mibeeri kooán guri báy, «Aníng bar heé Mungú, alók asla nin gawaá doorí wa /ét, kuúng nee mukók kusuú mibeeraá kooane nuri /ák.» Hamtidár kilae asla niri gawaá doori wa /ét inósudá' dinkwa nee mukduú mibeeri kooán giri su'uunsú'.

¹¹ Waawutmo geeraharusmoó slaqwaruuseerós oo hatlá' nee múk hatlá' oo mibeeri kooán gay ya/aáw as Eliya nguwa huwiya'. Inós iri tsa/án gawaá tlooma amór Eliya, i kaahi, «Aá heé Mungú, waawutmo i kaahi, ‹Aweeráng gawaasinge ar gaanslaay.› »

¹² Eliya iri oó', «Aníng barnaxes a heé Mungú, alók asla nin gawaá doorí wa /ét, kuúng nee mukók kusuú mibeeraá kooane nuri /ák.» Hamtidár kilae asltá Mungú iri gawaá doori wa /ét, inós dinkwa nee mukduú mibeeri kooane giri su'uunsú'.

¹³ Wa'aá hatlae malé ale waawutmo geeraharusmoó hatlá' guna ya/aáw nee slaqwaruusér mibeeri kooán. Geeraharusmoowí oo tám iri tsa/án gawaá tloomadá', iri tumbarara'aát geeraá Eliya, nee guri firín iwa kaahi, «Aá heé Mungú, aníng kuúng u fiririím, slafingw'eé' nee slafíngw sagadiyuuseerók tír mibeeraá kooán gár slahhaa' tiwa tsahh.

¹⁴ Geeraharuusedá' tsár nee muk'ine kaa /aáy nee asltá gawaá dooraá daahh, ala hami daxta masók slafingw'eé' a gár slahhaa' diroge.»

¹⁵ Naagáy malaykamoó AAKOÓ MUNGÚ Eliya guri báy, «Inós mu da'ayumiitaar, al'aweeré' nee inós.» Eliya iri sihhiít tari al'aweér ay dír waawutmo

¹⁶ Eliya waawutmo guri báy, «AAKOÓ MUNGÚ i kaahi, ‹Gár muu kusa ya/áp amór Ba'alsebubu, munguú gixsár Ekroni, a Mungú in káhhi baraá yaamaá Israeliro, kuúng a awedká gawaá qatanisinge, looeemaawo kuúng a gwá'.› »

¹⁷ Aluuwo Ahasia iri gwaá' ar adór axweesantadár AAKOÓ MUNGÚ aarusmo Eliya aa oó'. Kurkú tsár oo waawuti'iimár Yehoramu garmoó Yehoshafati, waawutmoó Yuda Yoram hhiyoó Ahasia iri waawuti'ín kitaangós wa alé, asma Ahasia na/oó garma gu konká.

¹⁸ Tlehhma'aá hatlá' awa waawutmo Ahasia aa tleéhh kaa gooín baraá kitaábuú qom'i oo waawituú Israeli.