2 Timoteo 3 - Biblía Axweesantá Hhohho' ar Mungú 2004

De'emaá alhhe'eesaay

¹ Ala axweesanaywí xueek, bál deelór alhhe'eesaay binda naká/, qoomár slafíngw gawít i hardát.

² Asma qoomaadá' binda hardát, muu a múk ti kilooín slaá'. Slám muu a múk peésár slaá', nee a múk ti kilooín xirfayeemiís. Muu a múk daara/aám, nee a múk múk /ooslisliím, nee múk xwaylitér'ín ilaiwawa/aaká, nee múk sluufaay wásl. Nee slám a múk hhohhoeká.

³ Slám a múk múk maray'ín sla'aaká, a múk wayduú tlehhitaaká. Nee slám inooín a múk /ayseenuuse, múk slaqooín ila/aamaaká, múk xaraásl, múk hhooeemaá sla'aaká,

⁴ múk múk sakikií/, múk siduuse nee daar/uuse, múk muruú baraaká' yaamu gu ak slaá' ta Munguhe.

⁵ Inooín bir ga/eér a adór múk Mungú, ala /uuruú Mungú ku ya/a/anká. Kuúng ti paratl dír múk adór kwihe.

⁶ Asma baraá múk adór kwihe, hhawaate i dayá' awa ti dahamiisá' baraá maraá múk i alé, nee /ameenár daktana kawa afa /aslin, tidá' tlakweema naa al'iilouyé', nee kiwa uuruxun nee ilatleerír dimbadimbé.

⁷ /Ameenár adór tí daqisleém gár inooín ta slai a intsaahhasa. Ala xu'utír looeema i hardahamuwo ka baloó aleeslayká.

⁸ Adoodár aáng Yane nee Yambre tira tlaampa'aamisiyé' nee Mose, adoorí an adór hhawaateeká' sleeme tir tlaampa'aamisiya' nee looeema. Mukwí a múk aa fuqureemo hhitiruumiit, slám haratlintaaor'ín i qoondaaká.

⁹ Ala inooín geerií kumita ka aleeslayká ak alé. Asma daktu'uumar'ín i geehhoouúr dír muu sleémeerowo, adór daktu'uumadár Yane nee Yambre ira geehhoouúr.

Gurbu'úngw alhhe'eesaay

¹⁰ Ala kuúng aníng iga eehát baraá intsaahhasar'eene, nee digir wakeetingw'eene, nee adoodá' án ni slaa' baraá slafingw'eene. Nee slám haratlintaaor'eé' aga aán, nee daamaarangw'eé', nee sla'aarir'eé' nee qiqtlingw'eé'.

¹¹ Nee slám án kuúng ina eehát baraá gusisingw'eene nee baraá slahh'amaayer'eene, adór muruudá' naa sláw baraá yaamaá Antiokiár wa ale, nee baraá Ikonio, nee baraá Listra. Gusisíngw yaariír una sláw. Ala Aako aníng ina ba/amís baraá muruuwí sleémeerowo.

¹² Mukdá' sleémeero oo hotángw ilaiwa/ame gu slaá' nguwa ar hootiya' baraá Kristo Yesuwo aqo kin gusisín.

¹³ Ala múk tlákw nee al/aymuuse ta ak geerií kumiit baraá tlakweemaawo. Inooín in al/aginá', nee slám inooín awa kilá' kaa al/aáy.

¹⁴ Ala kuúng looeemaadá' tuwa intsaahhatimís na ló'wa haratlintieek, asma kuúng a xú' heé kuúng uga intsaahhatimis a heemá.

¹⁵ Asma iimír na/uumaroge kuúng Gooír hhohho' a xú', tidá' sagalooa ngi kuúng i hanmiis, as ba/ama kawa sleer ar loohír Kristo Yesu kuwa haratlintí'.

¹⁶ Gooi sleémeero i hiinsluú Mungú koón, nee i hariín muu nguwa looeemaá i intsaahhatimis, nee muu nguwa afa dukuun nee nguwa qwatsiin, nee slám muu nguwa geeraharahat as slafíngw ganaá' kuwa ar hooti.

¹⁷ As kahhó' heé Mungú iwa ganaai nee kuwa amohhoó' as umuúqo gadiyér hho' ngiwa tleehhi.