2 Timoteo 1 - Biblía Axweesantá Hhohho' ar Mungú 2004

¹ Anuú Paulo barwaárí ngina gooiím. Aníng a ya/abusmoó Kristo Yesu, ar adoodá' Mungú aa slaá', as slafingwdá' taa geerií al'axweés nguwa alki/iit, kudá' baraá Kristo Yesu i dirií'.

² Barwaárí ngina gooiím amoorók Timoteo, garmaaeé' oo sla'aarusmo. Mungú Baabá nee Aakoorén Kristo Yesu kuúng u tsuuqi, nee u gurtlay, nee u waydií haniisi.

Sluufaay nee gurkwa/amis

³ Munguúwí ni sagadiyuus ar muunuú hhoohhoó' iimír taati'iieé' wa ale un ló'wa sluufmiís. Aníng kuúng u baloó gunqareesaaká aleefirooro tlaatla/aangw nee xweeraawo.

⁴ Hhirhheeriwók bira insláw, aníng gár ni ló'wa slaa' a kuúng un ár, as kahhó' muunaáeé' iwa hatsi qwal/uwo.

⁵ Asma aníng a xuú' adór kuúng Mungú kura haratlintí' ar haratlintaaór waaqooda wasl. Haratlintaaoorí geeraawo aamaarók Loisi gan koón, nee aayoorók Eunike. Slám aníng a xuú' adór kuúng kar koón sleeme.

⁶ Gawaá adoorihe aníng kuúng u inslawtís aleesleemuuduú Qeeru oo baraawók i dirií' dukeek i doogin, kudá' Mungú naa dirók i haniís qoomár aníng kuúng uwa dakw'eénií qaás.

⁷ Asma Mungú qeeruú dae ngwa atén i haniisiiká. Gár naa haniís a Qeeruú tawa /uurúr kumiitaan, nee oo sla'aari nee oo qoomoó koóm.

⁸ Aakoorén lamabu'uungo mu sa murumiitaar, tam anuúwí taa tseék as inós mi sa murumiitaar sleeme. Ala burtu slahh'eemiis asma Ya/abtór hho', kuúng qiítl adoorír aníng wa ale, ar /uuruú Mungú.

⁹ Inós atén tina ba/amís, tiri ateét ar ateetamór hhohho'. Adoorí gana tleéhh, ala as tleehhemi'iireneeká, ala gana tleéhh as adoodá' inós aa slaá', nee as gurtleemuuwós. Gurtleemuuwós kwí nguna haniís ar baraá Kristo Yesu iimír qoomaadá' gár taa iimu/ún iwa kahh.

¹⁰ Hamí gurtleemuuwí kunguna geehhooatís as hardahamuú Ba/amusmoorén Kristo Yesu. Inós gwa'ara gana baál, slafiingw nee hhituru'uuma wasle giri gwa/atís ar Ya/abtór hho'.

¹¹ Ya/abtoorí hho' an tidá' aníng tisa qaás tawa alki/itusmo nee ya/abusmo nee intsaahhatusmo.

¹² Gaarí an gár án nis adoorír slahhahhaa'. Ala aníng a murumiitaaká as slahha'amkwí, asma heedaádá' aníng naa haratlintií' u xuú'. Nee slám aníng a xuú' adór gadaádá' inós naa aníng i haniís, de'eengo ngir aleesláy ay bál alhhe'eesaay.

¹³ Intsaahhatimisuuduú ló', kudá' taa dir'eén wa axás ilaooheek, ku adoodár intsaahhatimís. Baraá slafiingoge hoót ar Yesu Kristo kuwa haratlintati' nee kuwa sla'.

¹⁴ Muruudá' hhó' tinda kuúng i saayín nee Mungú harmagahheek ar /uuruú Qeeruú hhoohhoó' oo Mungú, kudá' baraarén wa hoót.

¹⁵ Kuúng a xú' adór mukduú baraá yaamaá Asia sleémeero aníng ira geexáy, tam Figelo nee Hermogene sleeme.

¹⁶ Aako múk doó Onesiforo ngu gurtleemuú i haniisi. Asma daqtá yaariire inós aníng i gurkwa/mamis, tam tsegmueé' kwí aníng tiwa tseék gu sa murumiitiiká sleeme.

¹⁷ Qoomár inós iwa Romair i hardáh, ina leelehhahhiít, iri sláy.

¹⁸ Kuúng a ló'wa xú' adór inós aníng ira sagadiyuumaamiís baraá yaamaá Efesooro. Bál alhhe'eesaywo Aako inós ngu gurtleemií haniisi, gurtleemuudá' amór Aakoó daahh.