2 Tesalonike 3 - Biblía Axweesantá Hhohho' ar Mungú 2004

Atén ti aleefiriiriinde'

¹ Alhhe'eesaywo, hháe, atén ti aleefiriiriinde'. Firiirimé' as axweesantá Aako iwa geerií hi'it ar gaanslaay, nee kawa ilaoohi ar ilaiwa/ame ar adoodá' kuungá' kara ilaoté'.

² Firiirimé' sleeme as atén tiwa ba/amisi dír múk muruú ganaa'aaká gu leelehhahhiít, mukdá' tlákw. Asma a muu sleémeerowooká oo haratlintaaór koóm.

³ Ala Aako i inkihhimuú kón. Kuungá' inós nu /uurií haniis, nee nu de'en dír kudá' tlaakwe.

⁴ Asma atén harahhifo a koomaán baraá Aakoowo daanduuhunge, tidá' atén ni hara'ayiyiimaan a tlehhitá' nee slám a kumitá' kawa tlehha'.

⁵ Masók Aako munerhúng gan gan'aás amór sla'aarír Mungú nee baraá qitluudá' Kristo ni hanmiisi.

Gadiyeé tleehhaak

⁶ Hháe, atén kuungá' nu hara'ayiimaán ar aleesleemuudá' taa atén i haniís nee Aako Yesu Kristo, ti paratle' nee hhae sleémeero awa tli/uuse, kudaádá' hara'ayaarén ngaa si'iye'.

⁷ Asma kuungá' kilá' a xuá' gídaabá gár kuungá' tunduwa hariím a an hotá' ar adoodá' atén tara hootaán. Qoomár tawa hootaán nee kuungá', atén aga tli/uutaniiká.

⁸ Asma atén umuúqo doó heé tawa /ayiimaani, heedaádá' bu'uto ugwa mawaaniiká. Ala atén ana ló'wa gadiyuusaán nee ana daawimitaán tlaatla/aangw nee xweeraawo as umuúqo heewo dirhunge muwa diitsakwaár ar awaán.

⁹ Geeraawo a gár hariim atén kuungá' tiwa /aymisa'. Ala atén adoorí aga sla'aaniiká, asma gár atén ta sla'aan a masók atén an slaqsaay tleehhitaán dirhunge, as kuungá' tiwa eehada'.

¹⁰ Qoomár atén tawa dinkwa nee kuungá' nuna bawaán, «Heé gadiyér sla'aaká, miwa /ayín.»

¹¹ Ala daxta hamí aga axaasaán adór baraá tla/angwhunge mukko ir deér oo tli/uuse. Inooín gadiyér i tleehhiya' i káhh, ala gár i tleehhiya' a gadiyeedaá muu ngin amoqwaaremisiyá'.

¹² Muksíng un hara'ayiimaán nee un naanaqaán ar baraá umuú Aako Yesu Kristo tawa kaahaan, ta hooti ar tsatsaa'areema, nee gadiyeé kawa tleehhi as muruú /aymar'ín kuwa slaslay.

¹³ Ala kuungá' hháe, ma baloó slaaqataara' tidá' ganaa' kawa tlehha'.

¹⁴ Heé axweesanoó baraá barwaárí gwa sii', heé adoorí ga/aawaak, ma aldinku'uusara' nee inós as dakuúsarós ngiwa tsaahhi.

¹⁵ Ala mu harafadiitara' tawa wakusmo, kuungá' naanaaqaak adór hhiyaahúng wa ale.

Axweesanoó alhhe'eesaay

¹⁶ Aako inósuú kilá' oo wayduú hanmiís, wayda ngu haniisi dirhunge daqisleém ar baraá umuúqo loohiro. Aako masók i dinkwa nee kuungá' sleémeero.

¹⁷ Anuú Paulo gooirír alhhe'eesaay ngina gooiím ar dakw'eé' oo kilá'. Gaarí an layar'eé' baraá umuúqo barwár ni gooiima adór amór i dahh tar amor'eé'. Adoorí an adór án nir gooaaiim ar dakw'eé'.

¹⁸ Tsuuqaá Aakoorén Yesu Kristo ta dinkwa nee kuungá' sleémeero.