2 Tesalonike 2 - Biblía Axweesantá Hhohho' ar Mungú 2004

Heedá' Tlaákw

¹ Ala hám daxta, hháe, gár ni axwees a daanduú kángw hardahamuú Aakoorén Yesu Kristowo, nee adoodá' atén tar dír geeraawós i burumburiitaan, atén kuungá' nun firiimaán,

² mutunduwa amoqwaareés ar gaanslaay baraá munerhunge, laqaá mutunduwa dae tsaát ar axweesanoó káh, «deeloodár Aako naa qaroó hardát». Múk adoorír axweés, kwaáo' aaru'uuma kana sláy, laqaá axweesantá amoorén daahh kana axaás, laqaá kwaáo' barwár amoorén daahh kana sláy.

³ Umuúqo heewo munduwa al/aáy ar umuúqo loohiro. Asma deeloodá' i hardatká ay dír dee/aanuudá' Mungú kuwa si'i ii iimu/un, nee Heedá' Tlaákw, kudá' ta hhaamisi, ay dír i geehhoouy.

⁴ Inós a Wakaarusmo, inós tin oo úr tlehhiit dír muruudá' sleémeero muu i sluufmiisi adór munguii'ín wa ale. Slám ti ureemiis dír muruudá' sleémeero oo hhohhoe. Nee inós in baraá Doó Mungú i iwtanángw aa'áy, iwa kaahi, «Aníng a Mungú.»

⁵ Ahaá, kuungá' a insleera'akáhe? Baré muruuwí aníng nguna kuungá' báw qoomár án tawa dinkwa nee kuungá'.

⁶ Gár inós gu ila/aam i deer as mindiwa geehhooúy qoomaarihe. Ala gár gu ila/aam kuungá' a xuá'. Qoomaadá' taa qaás barnaxes aa bó/, inós iri geehhooúy.

⁷ Ala Heedá' Tlaákw i gadiyér qawti tleehh tam hamí, ay dír heedaádá' ga ila/aám kway hingeesi.

⁸ Qoomaadá' an qoomár Heedá' Tlaákw tiwa geehhooeesi ar gaanslaay. Qoomaadae Aako Yesu niri hardah, iri geehhooúy ar baraá gwa/aateema, nee Heedá' Tlaákw guri suqúy ar hiinsluú afkós.

⁹ Heedá' Tlaákw nin hardah ar /uuruú Neetlaangw, nee inós umuúqo waa/oo/amooro ga tleehh, nee layaá al/aymaaro.

¹⁰ Nee umuúqo loohír al/aymaaro gari tleehh as kudá' sleémeero awa baraá loohír qwanáy i diriiá' ngira qwaareesi. Inooín tan qwaar asma looeema kaa slaiiká ilaooharo, looeemaadá' geeraawo inooín ngi ba/amisá'.

¹¹ Gaarí an gár Mungú inooín ngisa ya/án kiwa qwaareesi, asma inooín lama kana haratlintií' hariímár looeemaá wa ale.

¹² Gawaá adoorihe kudá' sleémeero awa tlakweema ngaa sa qwalaala/iye' kin sakwasleemuut, asma looeema nga haratlinti'i'iiká.

Tunda tsawaár as ba/ama

¹³ Hháe, kuungá' Aako nu slaa', nee atén gár tiwa hariím a Mungú un sluufmisaán umuúqo daqto as kuungá'. Asma Mungú kuungá' nuna tsawaár iimír iimu/uungo as ba/ama kawa sleera' ar loohír Qeeruú hhoohhoó' oo Mungú, kudá' kuungá' nu hhoohhooeemiís, nee ar loohír looeema kiwa haratlintia'.

¹⁴ Mungú kuungá' nuna ateét as tí kawa sleera' ar loohír Ya/abtór hho' tidá' atén naa kuungá' i alki/iitaán, as kuungá' xirfuú Aakoorén Yesu Kristo kuwa sleera'.

¹⁵ Gawaá adoorihe, hháe, kuungá' gawduwé' baraá haratlintaaooro. Intsaahhasa sleémeero oohaak, tidá' atén naa kuungá' i intsaahhatimisaán baraá alki/ituurén nee baraá barwaárene.

¹⁶ Aakoorén Yesu Kristo inósuú kilá' nee Mungú Baabuúrén, kudá' atén ti slaa', nee slám gurkwa/asár alhhe'eesay wasl ngaa haniís ar baraá sla'aarirós, nee haraxu'utír hhooe,

¹⁷ inós munerhúng ngi gurkwa/asi, nee nuwa /uurií haniisi as umuúqo gár hhoo' kawa tlehhita' nee axweesanoó hhó' kuwa axwesa'.