2 SAMUELI 9 - Biblía Axweesantá Hhohho' ar Mungú 2004

Daudi nee Mefibosheti

¹ Baalarka wake Daudi ina yaahaás, «Xáy, heé aa meet i deéro baraá xwaylár Saulowo? Barnaxes i deer geeraawo a slaá, nguwa hhooeemáy tleehh as Yonatan.»

² Heeko wák i deer oo lawaalmoó doó Saulo umuuwós a Siba. Siba kuri ateét nee Daudi. Waawutmo Daudi guri yaahaás, «Xáy, kuúng a Síbáwo?» Inós guri mu/aywaáts, iri oó', «Eeít, aníng an lawaalmoowók.»

³ Waawutmo guri yaahaás, «Xáy, heé aa meet i deéro baraá xwaylár Saulowo? Bir deer geera a slaá' nguwa hhoeemaá Mungú i tleehh.» Siba guri mu/aywaáts, «Garmoó Yonatan i deer, ala inós aa sol'omiít ya'a' tsaraawo.»

⁴ Waawutmo guri yaahaás, «Inós i diimá?» Siba iri oó', «I amór doó Makiri garmoó Amieli, baraá yaamaá Lodebari.»

⁵ Naagáy waawutmo Daudi muu guri ya/aáw, inós kuri leéhh amór doó Makiri garmoó Amieli, baraá yaamaá Lodebari.

⁶ Naagáy, Mefibosheti garmoó Yonatan, nángw naangoó Saulo, iri amór waawutmo Daudi káy. Mefibosheti iri qaát ar gura' dír geeraá waawutmo Daudi, guri i tumbarara'aát. Daudi guri ateét, «Mefiboshéti.» Inós iri ooín, «Oóy! Anuú lawaalmoowók a diirí.»

⁷ Daudi guri báy, «Ma da'ayumiitaar. Aníng kuúng u hhoeemií tleéhh, as Yonatan baabuúwók. Yaamuudá' sleémeero awa aakoowók Saulo ngi amoorogí ki/ís. Aníng nee kuúng an dinkwár wa al/ayimaán daqisleém.»

⁸ Mefibosheti iri tumbarara'aát iri oó', «Aníng a slaqás nee seeoó aa gwaa', asma milá mis adoorír sagedaawimít?»

⁹ Waawutmo Daudi Siba sagadiyusmoó Saulo guri ateét guri báy, «Mura' sleémeero kuduú Saulo nee oo múk do'ose ugwa haniís dír nángw naangoó aakoowók.

¹⁰ Kuúng nee na/iiwoge nee lawaalér do'oge qamaá Mefibosheti in doslá', nee nángw naangoó aakoowók un balángwí huwahubá', as kahhó' muruú /ayma nguwa kon daqisleém. Ala inós nee aníng an al/ayimaán daqisleém.» Qoomaarihe Siba na/ii ngi kon mibaá nee kooán, awa daaqaay, nee lawaale a mibeeri tsár.

¹¹ Naagáy, Siba waawutmo guri báy, «Aníng a sagadiyusmoowók tidá' kuúng ta kat sleémeero a tleéhh.» Naagáy Mefibosheti muruú /aymarós gun slasláy dinkwa nee Daudi, adór na/oó doó waawutmoó wa ale.

¹² Mefibosheti na/oó niiná gu kón oo garma, umuuwós ku bay Mika. Muu sleémeero oo guruú doó Siba tari lawaalér Mefibosheti.

¹³ Mefibosheti kooaáng ya'aawós tsaraawo naa sol'omiitiye', iri hoót baraá gixsár Yerusalemu wa ale, nee inós nee waawutmo tan al/ayín daqisleém.