2 SAMUELI 8 - Biblía Axweesantá Hhohho' ar Mungú 2004

Arba/atír slaqwara ar Daudi

¹ Alaá kaangwihe Daudi múk Filisti guri muúx, guri baál. Gixsár Meteg-ama, tidár múk Filisti, gari hayóh.

² Daudi múk Moabu guri malé baál, gurí yaamií qaatiís ar hhaay, guri tsaát baraá doqoro tám ar hima. Daqoroó tsár guri tsuú/, ala daqtá tám gari slafíngwí máy. Múk Moabu iri lawaalér Daudi tleehhiít, nguri koodíri hanmisiyé'.

³ Daudi Hadadeseri garmoó Rehobu, waawutmoó Soba, guri malé baál. Daudi ina baalín qoomár Hadadeseri iwa loohírí dirii'i, qoomár iwa yaamuudaá yaaér Eufratír ki/isár ay bartá waawuti'iimarós.

⁴ Daudi múk kumuú wák nee tsiire faanqw guna loohír wa hayóh, nee múk slaqwara oo ya'ár hi'iít kume mibeeri tsár. Daudi kanér ya'aá alu gana tlaáq ar farsuudá' sleémeero oo gaardaá koóm, ala farsuú gaardaá tsiiruwo bu'uút guna geexáy.

⁵ Múk Aramu oo Damasko Hadadeseri, waawutmoó Soba, kuwa ale/iisár áy, Daudi gina haraslaáhh, múk kumér mibeeri tsár nee tsár guri tsuú/.

⁶ Naagáy Daudi xafoó múk slaqwara guri tleéhh baraá gixsár Aramu ar Damasko. Múk Aramu tari lawaaleerós, kuna koódirí huwahuúw. AAKOÓ MUNGÚ Daudi guri baalirií haniís umuú dír aqo kayi.

⁷ Gaambuudaá mukduú slaqwara oo Hadadeseri awa ta tleéhh ar sahaábu Daudi gina hayóh, giri huúw ay Yerusalemu.

⁸ Sleeme muqslár siiraa/aten ar yaariir gari hayóh, tidár baraá gixsadaá Beta nee Berotaírí dirii'. Gixsadaá yaamaá Hadadeseri.

⁹ Qoomár Toi, waawutmoó Hamati ngiwa axaás adór Daudi Hadadeseri nee mukós kuduú slaqwaraaro ngira baál,

¹⁰ garmaawós Yoram guri ya/aáw nguwa taaqweesár ay, nee nguwa warahaasi asma adoodá' nee Hadadeseri tawa slaáqw nee guri baál. As ki/imaá yaariire Hadadeseri nee Toi ta slaqwaqún, Yoram qeemuú Daudi guri huúw, xosludá' taa tleéhh ar muqslár peésa, nee sahaábuwo nee muqsladá' sirdaa/atene.

¹¹ Qeemuuwí, dinkwa nee muqsladár peésa nee sahaábudá' na hayóh baraá slaqwarár xoordu sleémeero, kudá' nee inós naa slaqwiye', muruuwí guri amohhe'eés as nguwa AAKOÓ MUNGÚ i haniisi.

¹² Muruuwí nguna hayóh baraá ayeemooká' wa ale, Edomu, nee Moabu, nee Amoni, nee Filisti, nee Amaleki dinkwa nee haasaáng kudá' naa hayóh dír Hadadeseérí wa alé, garmoó Rehobu, waawutmoó Soba.

¹³ Alaá Daudi Hadadeseri nguwa baál iri ak iia tleerúy, qoomár múk Edomu nguwa tsuú/ oo kume mibaá nee dakaát, baraá Xatstá Diwtá wá ale.

¹⁴ Xafoó múk slaqwara guri tleéhh baraá yaamaá Edomu sleémeero. Múk Edomu sleémeero tari lawaaleerós. AAKOÓ MUNGÚ Daudi guri baalírií haniís umuú dír aa qo kayi.

¹⁵ Gawaá adoorihe Daudi iri waawuti'ín daanduú múk Israeli sleémeero, gari ara hhe'eés adór mukós sleémeero kur gan'amií tlehhiiti adoodá' kus hariím.

¹⁶ Yoabu garmoó Seruya a geeraharusmoó úr oo múk slaqwara. Yehoshafati garmoó Ahiludi, a heé gooír muruú inslaslángw wa hariím ga amohhe'eemiís.

¹⁷ Sadoki garmoó Ahitubu, nee Ahimeleki garmoó Abiatari, inooín a kaahamuuse. Seraya a sagesihhtusmoó gadiyeé.

¹⁸ Benaya garmoó Yehoyada a geeraharusmoó múk Kereti nee oo múk Peleti nee daaqoó Daudi inooín a kaahamuse.