2 SAMUELI 7 - Biblía Axweesantá Hhohho' ar Mungú 2004

Aaru'uumár Natani daanduú Daudiwo

¹ Qoomár waawutmo Daudi iwa baraá doó waawuti'iimár hooti, qoomaadae AAKOÓ MUNGÚ guri tsuúq iwa waydúr hooti nee wakuuserós umuúqo barto.

² Waawutmo Daudi iri oó' dír Natani, kuduú aarusmo, «Áx qayteek, aníng dír ni hoot a baraá doó taa tleéhh ar xaa'aá sahhta, ala sandakmoó Mungú dír i hooti a baraá heéma.»

³ Natani waawutmo guri báy, «Gimáy adoosíng taa insleér baraá muunaáwoge tleehheek, asma AAKOÓ MUNGÚ a dinkwa nee kuúng.»

⁴ Ala xweeraadaá kilae Natani axweesantá AAKOÓ MUNGÚ gari axaás i kat,

⁵ «Tláw, sagadiyusmooeé' Daudi kaangwí baweek, AAKOÓ MUNGÚ i kaahi, ‹Xáy kuúng doó aníng ni hoot uqo tléhha?

⁶ Iimír múk Israeli nguwa baraá yaamaá Misrír wa tuú/ ay laarí aga baraá dó'wa hootiiká. Ana hi'iimiít, umuú diiro hotangw'eé' a baraá heémár Mungú.

⁷ Xáy, umuú dír naqo kawi nee múk Israeli sleémeero, heé naa gaa báw i deéro baraá har'ohuusér múk Israeliwo, kudá' naa bawi, muk'eé' oo Israeli de'eemaak, niwa kah, waáy misa doó xa'aá sahhtaárí tlehhi'iiká?›

⁸ «Gawaá adoorihe sagadiyusmooeé' Daudi baweek, AAKOÓ MUNGÚ Aleesleemusmo i kaahi, ‹Una leéhh baraá qawtantá bee/aangw tawa de'een, as uwa uráy haniis daanduú muk'eé' oo Israeliwo.

⁹ Iimír qoomaadae aníng nee kuúng a dinkwa, amór taqo keera nee wakuuseerók ana geeraawógi hhaamiís, án kuúng u iia tleereés adór múk hatlá' oo urén baraá yaamuwo.

¹⁰ Aníng dír muk'eé' iwa hooti an tsawaár, inooín ngiri didií dahaás, as tawa didá' wa hooti inooín kilooín, mikiwa daawitamiís male ale, as kahhó' múk tlákw oo /uureemooínár slaáqw, mingiwa male slahh'eemiís adoodár bál geeraá wa ale.

¹¹ Iimír bál mukduú har'ohuuse nguwa tsawaár tawa daanduú muk'eé' oo Israeli, aníng kuúng u xuúm dír wakuserók sleémeeroe. Ar tí sleémeero ga baa/ a tí, AAKOÓ MUNGÚ kuúng un babay, aníng kuúng u dó' i tleéhh.

¹² Deeloorók ar tawa kahhut bira xeér tari haragwá' amór baabi'iiwók kudá' naa qatliye'. Daqaní na/aywók oo kilá' un waawutmoó wa qaás, aníng waawuti'iimarós ngari gawdeés.

¹³ Na/aywí an kudá' do' gu tleéhh as umuueé', nee kitaangós kuduú aleesleemu oo waawuti'iimarós un gawdeés ay kureerisleém.

¹⁴ Aníng tari baabuúwós, inós tari garmaaeé'. Tlaákw birnga tleéhh, un iigahhaát, adoodár muu i /imamisi na/ii'ín kiwa naanaqaqati ar hhara.

¹⁵ Ala sla'aarir'eé' ar warqawaaká a hingeesaaká dirose, adór ngira hingeés dír Saulowo, kudá' naa hiingeés geeraawók wá ale.

¹⁶ Do'ók nee waawuti'iimaroge i kumaamitiyá' dír geeraaeé' waá ale daqiisleém. Kitaangók oo waawuti'iima ku gawdees kureerisleém.› »

¹⁷ Natani umuú gaaro gana alki/iít dír Daudi, tidá' Mungú aa dirósí laqán ar baraá iigu'utu.

Daudi Mungú nguwa sluufiís

¹⁸ Naagáy waawutmo Daudi iri tláy, iri iwiít geeraá AAKOÓ MUNGÚ, iri firín, iri oó', «Aníng a heemá, xáy Aakoó MUNGÚ, nee múk dooeé' a gár milá tam ay diirí án niwa iia tleerúw laarí.

¹⁹ Aá Aakoó MUNGÚ! Slám gár adór tí a gár niina dír ilawoge, Aakoó MUNGÚ. Gár tí ga baa/ a al'axweesantidár muruú urén, ar taa ó' dír múk dooeé', ar kureeraá yaariir awa hi'iitá', nee adór muruú qari sleémeero ar aluú wá hi'iit ngura aníngí xu'utís.

²⁰ Aá Aakoó MUNGÚ, anuú Daudi lawaalmoowók, gár ni male dirógií oo' a milá? Asma kuúng anuúwí oo lawaalmoowók i xú'.

²¹ As al'axweesantoge nee as sla'aarír muunaáwoge, muruú urén ugwa tléhh sleémeero as iwa xu'utís, anuú lawaalmoowók.

²² Baraá muruudá' sleémeero taa axamamisani, kuúng Aakoó MUNGÚ tu úr, oo adór kuúng i kaahh, nee Munguú hatlá' i kaahh aqo har kuúng.

²³ Slám baraá yaamuwo muu a gaalá oo ta slaqasi nee mukók oo Israeli? Kudá' Munguúín aa ba/amisár áy as tawa mukós. Muruú urén oo waa/oo/amo guri tleéhh baraá yaamuuwose dír geeraá mukose, umuuwós iri xu'utiít. Giri ba/amisár áy baraá Misri as inós, xoordu giri geeraaín wa guús nee mungui'ine.

²⁴ Kuúng mukók oo Israeli ugwa kángw kilá' wa gawdés as tawa mukók kureerisleém, kuúng AAKOÓ MUNGÚ an Munguín.

²⁵ «Aá AAKOÓ MUNGÚ gimáy, hamí al'axweesantók boo/eseek adoodá' kara ó' dír anuú lawaalmoowók, nee adoodá' kara ó' dír xwaylar'eé'.

²⁶ Muu umuuwók ngu xirfayeemisi daqisleém, tawa kaahi, ‹AAKOÓ MUNGÚ Aleesleemusmo a Mungú daanduú múk Israeliwo.› Nee xwaylár lawaalmoowók Daudi ka gawdees dír geeraawoge.

²⁷ Aá AAKOÓ MUNGÚ Aleesleemusámo, Munguú múk Israeli, asma kuúng kaangwí ngwa geehhooés dír anuú lawaalmoowók, tari ó', ‹Án kuúng un dó' i tleéhh,› as adoorí an piíhh firor'eé' ngiwa oo' dír geeraawók.

²⁸ «Aakoó MUNGÚ, kuúng hamí a Mungú nee axweesantók a ló'. Nee lawaalmoowók ugwa al'axweesantá hhó' beér.

²⁹ Gawaá adoorihe án kuúng u firiím doó lawaalmoowók tsuuqeek, i hotaatin ay kureerisleém. Asma kuúng Aakoó MUNGÚ ana ó', ar tsuuqawoge, doó lawaalmoowók ku tsuuqi ay kureerisleém.»