2 SAMUELI 6 - Biblía Axweesantá Hhohho' ar Mungú 2004

Sandakmoó alqado kuwa huúw Yerusalemu

¹ Wa'aá hatlae Daudi slaqwaruusér kumér mibeeraá tám tidá' taa tsawaár baraá múk Israeliro gari burumbuúr.

² Daudi iri tláy dinkwa nee mukós sleémeero, múk aáng nee inós aldinkwa amoodár Ba'ala ar baraá Yuda, tindina amoodá' wa tláy as tawa sandakmoó Mungú leehhi, Munguúdá' umuuwós ta bay AAKOÓ MUNGÚ Aleesleemusmo, kudá' aa iwiit gawaá kitangwduú aleesleemu kudá' gáwtí dirií', dír keruúbi.

³ Naagáy sandakmoó Mungú kuri leéhh dír doó Abinadabu, kuduú gawaá tlooma, kuri gagaár gawaá gaárír /aben. Daaqoó Abinadabu, Usa nee Ahio, an múk gaáridá' /aben ga gan'aamiís.

⁴ Gaáridá' i sandakmooduú AAKOÓ MUNGÚ koón, Ahio i geeraá sandakmoó wa hi'iit.

⁵ Daudi nee múk Israeli sleémeero ta daa', tari faakamiís ni/imaro ar /uuremoín sleémeero dír geeraá AAKOÓ MUNGÚ. Xoslaá tar daai kina slaáhh kudá' taa tleéhh ar xaa'aá ta/eewi, adór gidaandori nee mariímba nee oowiro nee kayambaro nee mitingiraywo.

⁶ Tawa hardáh dír afeenarka ta balaángwí slahhahhan ar yaamaá Nakoni, Usa sandakmoó Mungú guna óh ar dakós, asma ya'aá hikwadá' kina gee/aásl.

⁷ AAKOÓ MUNGÚ iri buúhh, Usa guri didií slaáhh as meetagaasár aa tleéhh, Usa iri gwaá' didár kilár bihhaá sandakmoó Mungú.

⁸ Daudi iri buúhh kángw kilá' wa ale, as adoodá' AAKOÓ MUNGÚ Usa nguwa slaáhh. Didá' Usa kuwa slaáhh kari umií tsaát ka bay Peres-Usa tam ay laarí.

⁹ Baalaadae Daudi AAKOÓ MUNGÚ guri ló'wa da'ayuút, iri oó', «Sandakmoó AAKOÓ MUNGÚ adór nir amor'eé' kay?»

¹⁰ Gawaá adoorihe, Daudi sandakmoó AAKOÓ MUNGÚ nguwa huwi baraá gixsár Daudi gwa slaiiká, ala guri huúw amór doó Obed-edomu, heé xoorór Giti.

¹¹ Sandakmooduú AAKOÓ MUNGÚ ina hoót dír doó Obed-edomu wa ale, heé xoorór Giti har afiqoomár slehheeri tám, AAKOÓ MUNGÚ Obed-edomu guri tsuúq dinkwa nee múk do'ós sleémeero.

¹² Waawutmo Daudi ngiwa axaás adór AAKOÓ MUNGÚ múk doó Obed-edomu ngura tsuúq nee muruuwós sleémeero oo i kona, asma sandakmoó Mungú, Daudi sandakmoduú alqado guri leéhh dír do'duú Obed-edomu, guri huúw amór gixsár Daudi ar bara/.

¹³ Mukdaádá' sandakmoduú AAKOÓ MUNGÚ loohiís, digiruú lahhoó' bur kwaa hi'iít, Daudi awu nee damár wahhaar gin ilahhooár wa tsuu/.

¹⁴ Daudi iri faakamiís ni/imaro dír geeraá AAKOÓ MUNGÚ wa ale, tlawuduú kaahamusmoó Mungú oo taa tleéhh ar neewór kitaáni gwa afeetlií siinoót.

¹⁵ Gawaá adoorihe Daudi nee múk Israeli sleémeero sandakmooduú AAKOÓ MUNGÚ kuna huúw ar bara/ nee afór ur ar tarumbeéta ay baraá gixsár Daudi.

¹⁶ Sandakmoó AAKOÓ MUNGÚ kunguwa hardahaás baraá gixsár Daudi, Mikali dasír Saulo ina pa/ángwár qaytsít, waawutmo Daudi guri aán iwa ni/in geeraá sandakmoó AAKOÓ MUNGÚ wa ale. Inós Daudi guri waaqá' baraá muunaáwose.

¹⁷ Naagáy sandakmoó AAKOÓ MUNGÚ kuri dahaás baraá heéma tidá' Daudi aa siíhh. Daudi ilahhooár da/a nee ilahhooár wayda gari haniís dír geeraá AAKOÓ MUNGÚ.

¹⁸ Daudi ilahhooár da/a nee ar wayduwo ngiwa hhe'eés haniisaro, muu guri tsuúq ar umuú AAKOÓ MUNGÚ Aleesleemusmo.

¹⁹ Daudi múk Israeli sleémeero, hhawaate nee /ameenaaro, umuúqo heewo guna qáy ar mukaatmo, /aarmoó fu'uni nee mukaatmoó sabiíbu. Alaá tihe muu sleémeero iri tláy, umuú heewo iri waátl amór do'ós.

²⁰ Daudi niwa waátl amór múk do'ós, as nguwa tsuuqi, Mikali, dasír Saulo guri al'eér iri ó', «Waawutmoó múk Israeli kuwa xiríf a adoomá laarí, gár slaamá' gari tleéhh, /ankwetsuwós guri laqán geeraá sagadiyuusér waawutmoó wa ale, slaqás nee mukduú barawasluse, kudá' /ankwets gu gaárí xuaaká dír ilaá muko.»

²¹ Daudi Mikali gari báy, «Aníng a dír geeraá AAKOÓ MUNGÚ i dirií', kudá' aníng iga tsawaar kitángw baabuúwók wa ale, nee múk do'ose, as iwa qaasi tawa heé úr daanduú múk Israeli wa ale, múk AAKOÓ MUNGÚ. Gawaá adoorihe aníng an ni/iím dír geeraá AAKOÓ MUNGÚ wa ale.

²² Aníng tin niinaweés kángw kilá' wa ale adoorí ba/a. Kiíng aníng iqo aán tawa gaarooká, ala sagadiyuusedár /ameena, tidá' kiíng ta kat, aníng iqo ilaiwa/iyá'.»

²³ Naagáy Mikali dasír Saulo na/aay gwa sleeriiká garwa gwá'.