2 SAMUELI 5 - Biblía Axweesantá Hhohho' ar Mungú 2004

Daudi a waawutmoó múk Israeli nee múk Yuda

¹ Tlahhi'i sleémeero awa múk Israeli nari daqayé' Hebroni amór Daudi, kuri báy, «Qayteek, atén awa tlahhaywók

² Qoomaadá' aa waarahhi waawutmoorén tawa Saulo, kuúng múk Israeli una geerahát baraá slaqwaraaro, nee AAKOÓ MUNGÚ una báy, ‹Kuúng a de'eemusmoó muk'eé' oo Israeli, nee tari geeraharusmoó múk Israeli.› »

³ Naagáy bariise sleémeero ar múk Israeli iri daqeér Hebroni dír waawutmo Daudi. Inós al'axweesani gari oó' dir'íní ale, dír geeraá AAKOÓ MUNGÚ wa ale. Daudi kuri iimbalaáx ar di/i tawa waawutmoó Israeli.

⁴ Daudi kureriiwós tawa mibeeri tám waawuti'iima gana óh, nee inós ina waawuti'ii'ín kureeri mibeeri tsiyáhh.

⁵ Baraá Hebroniro inós múk Yuda guna sawaawuti'ii'ín kureeri faanqw nee slahheraá lahhoó'. Nee baraá Yerusalemuwo múk Israeli nee múk Yudawo gina sawawiti'ii'ín kureeri mibeeri tám nee tám.

⁶ Aluuwo Daudi nee mukós tana haratláy amór múk Yebusi, kudá' baraá Yerusalemúr hoót. Ala inooín kuri báy, «Kuúng ni datká baraá gixsarihe, taampu nee taqooráy un tlatlahhasiyá' amór saawí ale.» Kuna adoorí báy geeraawo kawa xui Daudi dahmuú baraá gixsadá' gu aleeslayká.

⁷ Tam adoorihe, waawutmo Daudi gixsár Siyoni gana hayóh tidá' taa harweér ar koo/ír gawit, tari gixsár Daudi.

⁸ Baalaadae Daudi iri oó', «Umuúqo heewo oo múk Yebusi gu tsu/utár áw, i maamaahhati ar baraá digeemikaá ma'aay, as taqooray nee taampu kiwa haraadahi tsu/taro, kuká' muunaáeene ni sla'aaká.» Gawaá adoorihe gaarí an gár muu tas aain, «Taampu nee taqooray ta dahiiká baraá do'o.»

⁹ Daudi ina hoót baraá gixsarí taa harweér koo/ír gawít, gari umií tsaát, gari báy, «Gixsár Daudi.» Daudi gixsadá' gari harweér tleehhamooro, iimír Milór waá tleemu ay baraá guruú gixsaa.

¹⁰ Daudi iri ak iia tleerúy, asma AAKOÓ MUNGÚ, Munguú Aleesleemusmo, nee inós a dinkwa.

¹¹ Naagáy waawutmo Hiramu oo Tiro, muu guna ya/aáw amór Daudi, xaa'aá mieresi kina huúw, nee múk gadiyér peehháy nee oo maraay tlehhit, as doó waawutmo kuwa tleehhi.

¹² Gawaá adoorihe, Daudi gari tsaáhh adór AAKOÓ MUNGÚ ngura waawutmoó wa qaás, nee adór waawuti'iimarós ngira gawdeés, nee adór ngira xirfayeés as mukós oo Israeli.

¹³ Daudi /ameena gana duxuút, nee tana alhoót nee /ameenár aa quturmií qaminká baraá gixsár Yerusalemuro, alaá tindiwa kií/ Hebronír wa ale. /Ameenaarí guna na/aá daaqáy laqwál nee awa dasuwo.

¹⁴ Umér na/iikaá daaqaay awa taa laqwaál baraá Yerusalemúr wa ale a tí: Shamua, nee Shobabu, nee Natani, nee Solomon,

¹⁵ nee Ibhari, nee Elishua, nee Nefegi, nee Yafia,

¹⁶ nee Elishama, nee Eliada nee Elifeleti.

Múk Filisti kuwa baál

¹⁷ Múk Filisti kawa axaás adór Daudi kura iimbalaáx ar di/i, as tawa waawutmoó Israeli, sleémeero tari tláy kuwa leelehhtuú ay. Ala inós kaangwí guna axaás, iri dáh baraá guruú doó taa koo/ír gawít ár harweér.

¹⁸ Múk Filisti iri hardáh, xatstá Refaimu gana al tsiyayaxaát.

¹⁹ Naagáy Daudi kaangwí guri yaahaás dír AAKOÓ MUNGÚ, «Xáy AAKOÓ MUNGÚ, múk Filisti u i haratláwa? Xáy, ngu dabaaeé qása?» AAKOÓ MUNGÚ, Daudi guri bay, «Daqáw, asma ar looeemawo múk Filisti ngu dabaawógi qaás.»

²⁰ Naagáy, Daudi iri hardáh dír ta bay Ba'al-perasimu, didae múk Filisti guri baál. Aluuwo iri oó', «AAKOÓ MUNGÚ wakuuser'eé' gana haraahuúw geeraaeé wá ale, adór alwuór ma'aay ar aa gaanslár waarahh.» Gawaá adoorihe didá' ka bay Ba'al-perasimu

²¹ Múk Filisti slaqsi'ii'ín kudá' mungui kiri didií geexáy, Daudi nee mukós kiri hingeés amór saaw.

²² Ki/imaá tsare, múk Filisti nina kií/ male ale, tana tsiyayaxaát baraá xatstá Refaimu.

²³ Daudi kaangwí nguwa ár AAKOÓ MUNGÚ guri firín. AAKOÓ MUNGÚ iri oó', «Muksíng mu diisír haradahaar, ala na harweeriím ki haradát ar amór geeraá xaa'aá ta bay miforosadi.

²⁴ Gimáy, afór bar/asár slawtá slaqwara bara axás gawaá tsitseená miforosadirí, daqaní ta píhh, asma anuú AAKOÓ MUNGÚ naa hardáh niwa geeraawók wa hi'iit, as slawtá múk Filisti ngiwa daasl tsu/taaro.»

²⁵ Daudi adoodá' AAKOÓ MUNGÚ ngwa báy gana tleéhh inós múk Filisti guna daásl tsu/taaro, iimír Gébár wá tleemu ay Geseri.