2 SAMUELI 4 - Biblía Axweesantá Hhohho' ar Mungú 2004

Gaasár Ishbosheti

¹ Ishbosheti garmoó Saulo kaangwí nguwa axaás, adór Abneri kura gaás baraá Hebroni, iri munesií', nee múk Israeli sleémeero iri amoqwaár.

² Garmaawuú Saulo ta bay Ishbosheti mukós oo tsár gu kón oo geeraharusér slawtá slaqwara. Mukwí umer'ín a Ba'ana nee Rekabu. Kuká' a daaqoó Rimoni, heé tlahhoó Benyamini. Ayaawós a Be'eroti, Be'eroti a yaamaá múk tlahhoó Benyamini.

³ Múk Be'erotír hoót aáng tana goów ay Gitaimu, tari amoodá' wa hoót adór /eetuuse tam ay laarí.

⁴ Yonatan garmoó Saulo, na/oó garma gu kón oo ya'aawós naa sol'omitiye'. Na/aywí ku bay Mefibosheti. Kureriwós a kooán qoomár kángw gwa'arár Saulo nee Yonatan kawa axaás baraá Yesre'eliro. Qoomaarihe umtuso'ór na/aywí ngiwa axás adór Saulo nee Yonatan kira tsuú/ amoodár Yesre'eliro, Mefibosheti guri taatáhh, guri ar góp. Ala qoomár iwa ti'ii'iin ar gaanslaay, na/aywí guri sláx, ya'aá na/aywí niri sol'omiitiyé'.

⁵ Rekabu nee Ba'ana, daaqoó Rimoni, heé yaamaá Be'eroti tana daqáy amór doó Ishbosheti. Tawa amoodií hardáh a /ameetlemu. Ishbosheti aa hungu/uús baraá do'ós.

⁶ Tana dáh baraá do' tina adór múk balángw angaánoó slaá' tleehhír, Ishbosheti nguri gura' mutiyé' ar lawaala. Kár Rekabu nee Ba'ana hhiyaawós tari goów.

⁷ Asma qoomár tawa dáh baraá do'dá', Ishbosheti kuri harati'iít aa qaát gawaá qatanirós baraá kutuwirós, nguna gaasiyé', nguri saga tsatiyé', sakós ngurir tlayé'. Loohír Araba kanar óh, tari kumiít aaiwo xweera sleémeero ay matlaatle.

⁸ Aluuwo ságw Ishbosheti nguna huwír Hebroni amór Daudi. Inooín Daudi kuri báy, «Gaarí a ságw Ishbosheti, garmoó Saulo kuduú wakusmowók, kudá' geeraá slafingók gu qwaareesár wa slaá'. AAKOÓ MUNGÚ laarí marmaarók tidá' gaa buú' gawaá daanduú Saulo nee xwaylarós.»

⁹ Ala Daudi Rekabu nee hhiyaawós Ba'ana, daaqoó Rimoni, heé yaamaá Be'eroti, giri mu/aywaáts, «Adoodá' AAKOÓ MUNGÚ ir daadeér, inós slafingw'eé' guna tuú/ dír umuú wakusmoowo.

¹⁰ Heedaádá' naa amor'eé' kay oo kángw Saulo ngwa ooár ay adór ira gwaá', ngiwa xui a kángw hhó' nguna huúw. Aníng una óh, nguri didií gaás. Tlehhmuuwí an qeemuú ngwi haniís as kangwdá' naa oó'.

¹¹ Xáy, hamí heé tlaákw bar heé gan'amuú koóm ngwa gaás gawaá qatnírí ale dír do'ós, xáy, i gana'káhe dír'eene marmaárí ngiwa buu'. Asma tseere gaa ku'uús as heedaadá' nguwa gaás, guri hingeés baraá yaamuwo.»

¹² Daudi masoombarós gari ádbáy, inooín mukdá' kuri tsuú/. Mukdá' kuri daba' tlaánq nee ya'aawo, kiri tareereín gawaá xa'ano, dír bihhaá tlahhsár ma'aay baraá Hebroni. Ala ságw Ishbosheti kuna ar tláy, kuri foól baraá /aantár Abneri baraá Hebroni.