2 SAMUELI 3 - Biblía Axweesantá Hhohho' ar Mungú 2004

¹ Har afiqoomaadaá yaariire múk aa barta doó Saulo ay tana kumamiít slaqwaraaro nee múk aa barta doó Daudi ay, ala múk Daudi /uuru gun ak slasláy, Saulo nee múk bartós tan ak slaaqamiit.

Daaqoó Daudi

² Daaqoó Daudi oo tlaawaywós aa xwaylúy amór Hebronír wa ale a kwí: Oo baris a Amnoni, aayorós a Ahinoamu tidár ayaá Yesre'eli.

³ Oo tsár a Kileabu, aayorós a Abigaili kwaalo'ór Nabali kuduú ayaá Karmeli. Oo tám a Absalomu, aayorós a Ma'aka dasir Talmai, waawutmoó Geshuri.

⁴ Oo tsiyáhh a Adoniya, aayorós a Hagiti. Oo kooán a Shefatia, aayorós a Abitali.

⁵ Oo lahhoó' a Itreamu, aayorós a Egla, harér Daudi. Tlaawoó Daudi daaqaywí sleémeero guna xwaylúy qoomár tawa Hebrónírí dirii'i.

Abneri aa bartá Daudí áy

⁶ Múk aa bartá doó Saulo ay tana kumamiít slaqwaraaro nee múk aa barta doó Daudi ay, Abneri /uuru guna ak sláy bartá múk Saulowo.

⁷ Saulo /ameenirós tooka wák ar quturmo wasl ga kón, umuuwós a Rispa, dasír Aya. Qoomarkaro, Ishbosheti Abneri guri báy, «Asma milá masa qaté' nee /ameenidár baabuúeé'?»

⁸ Abneri ina kángw kilá' wa buúhh as axweesantá Ishbosheti, iri oó', «Xáy ka xu', aníng Saulo u sakí/a? Xáy ka xu', aníng múk Yuda un sagadiyuúsa? Qayteek, aníng ilaiwa/ame ana tleéhh bartá múk Saulo wa ale, baabuúwók, nee hhaeewós nee mulqerose. Slám kuúng ugwa haniisiiká dabaá Daudií alé ay laarí. Tam adoorihe, laarí án kuúng iwa ga/eer a tlakusmo as /ameeni.

⁹ Mungú aníng miwa gáwtí geexáy bar tidá' sleémeero aa dír Daudi bara boo/eesiiká,

¹⁰ lo'ór wa /aáy dír Daudi ar waawuti'iima ngiwa warqeesi bartá Saulo wa ale, gari haniis bartá Daudi. Inós múk Israeli guri sawaawuti'ín nee múk Yudawo, iimír Danír wa tleemu ay Be'er-sheba.»

¹¹ Ishbosheti /aymuú aa tlaáxw i kaahh, asma Abneri nguwa da'ayumiiti.

¹² Naagáy, Abneri ya/abuuseerós gana ya/aáw amór Daudi, baraá Hebroni, kuri báy, «Xáy yaamuuká' seebuúín a heemá? Al'axweesani dir'eé' ooang, án kuúng u ale/iís yaamaá Israeli sleémeero ngi dabaawógí qaás.»

¹³ Daudi guri mu/aywaáts iri oó', «Kahhoo', gimáy a al'axweesaán. Gím gár wák ar ni slaa' diroge dír án nee kuúng tira araniiká, gár geera ar slahhaa' a Mikali dasír Saulo ngin húp. Daqaní án kuúng iri aán.»

¹⁴ Daudi sleeme ya/abuse gana ya/aáw amór Ishbosheti, garmoó Saulo, iri oó', «Harer'eé' Mikali ki/isang, tidá' gwaduwós naa slaáhh oo tumboó tsiiru oo hhawataá Filisti.»

¹⁵ Naagáy, Ishbosheti muu guri ya/aáw as Mikali kawa tu/tá ay amór hhawaatuwós, Paltieli garmoó Laishi.

¹⁶ Ala Paltieli iri eeharín alaá hareerós wa ale. Tiwa alkona' loohiro ina /aa/amaamín ay amoodár Bahurimu. Abneri Paltieli guri báy, «Kií/ amór do'ók.» Inós iri kií/.

¹⁷ Abneri ina axweés nee bariisér Israeli, giri báy, «Afiqoomár aa waarahhi Daudi una slaé' tawa waawutmohúng.

¹⁸ Hamí kangwsíng huware' amór tsee/aá /awaákií ale. Asma AAKOÓ MUNGÚ Daudi ngwaa al'axweesantí báy, iwa kaahi, ‹Ar dákw sagadiyusmoeé' Daudiwo muk'eé' oo Israeli u tuú/ dír múk Filistiro, nee dír wakuuser'ín ar hatlae.› »

¹⁹ Abneri ina axweés sleeme nee múk Benyamini, iri tláy ay Hebroni as kangwdá' nguwa ooár ay dír Daudi, kudá' taa al'axweés nee múk Israeli sleémeero nee múk tlahhoó Benyaminiwo as kuwa tleehhi.

²⁰ Abneri iwa daqáy amór Daudi, tina koné' nee múk mibeeraá tsár, Daudi muruú /aymár hhó' guri tleéhh oo dahaasar'ín.

²¹ Abneri Daudi guri báy, «Kuúng waawutámo, aakooeé', aníng hamí a tláw, múk Israeli sleémeero ngu huúw. Tindi hardah nee al'axweesani kingiri oo' dirók as kahhó' kuúng tawa waawutmoín. Kuúng kiri sawawiti'iín sleémeero ar adoodá' ta sla'.» Daudi Abneri guri deelór báy, Abneri iri tláy ar wayda.

Gaasár Abneri

²² Aluudae Yoabu nee muu bahh'ale oo bartá Daudi tindina kií/ baraá slaqwarár wa ale, haasaánguú yaariír nguri huwír. Ala Abneri ta dinkwaarooká nee Daudi baraá Hebroniro, asma Daudi ngwa deelór báy iwa tlay, inós iri tláy ar wayda.

²³ Yoabu niwa kií/, ti alkoná' nee slawtós tidár slaqwara. Mukko Yoabu kuri báy, «Abneri, garmoó Neri, nina amór waawutmo Daudi káy. Waawutmo guri deelór báy, Abneri iri tláy ar wayda.»

²⁴ Yoabu iri daqáy amór waawutmo, guri báy, «Hám gaasaá milá taa tléhh? Qayteek, Abneri nina amoorók káy. Asma waáy, musa geemeér iri tláy?

²⁵ Xáy, u xúa Abneri garmoó Neri nina hardáh as kuúng uwa al/ayi? Nina hardáh as adór hotangók ngiwa xui, nee umuú gár taqo tlehhita.»

²⁶ Yoabu niwa kií/ amór axweesantadár nee Daudiwo, ya/abuuse gana ya/aáw Abneri kunguwa huwi. Inooín kuna harati'iít dír hhalángw Sira, kunguri ki/ís. Ala Daudi kaangwí gwa xuiiká.

²⁷ Abneri niwa kií/ Hebroni, Yoabu guna ar bihhií suruúk dír afkú do' kuwa áy adór kwaáo' axweesantá tar suufi in deer. Nee inós tawa didií sihhiít, Yoabu guruú Abneri guri muút. Abneri iri gwaá', asma Abneri Asaheli, hhiyoó Yoabu, guna gaás.

²⁸ Aluuwo Daudi kaangwí nguwa axaás, iri oó', «Aníng nee waawuti'imar'eene a tlakweésár koomanaká dír geeraá AAKOÓ MUNGUHE daanduú tseerér Abneriwo, garmoó Neri.

²⁹ Lo'ór gaasár Abneri Yoabu ngu /aa/ak, nee múk do'ós sleémeero! Tiqtír slaangeetamo baraá múk doó Yoabuwo miwa hee dakús, laqaá tiqtír tsatmit ngu sleer, laqaá heé tiqti aa hhitiín oo qadiisár hi'iimiít ngu slay, laqaá baraá do'ose oo taa gaasi ar paánga miwa kahhuút, laqaá oo muruú /ayma gu dakuús miwa kahhuút.»

³⁰ Yoabu nee hhiyaawós Abishai Abneri nguna gaasír, asma Abneri hhiyaaín Asaheli guna gaás baraá slaqwarár wa alé, qoomár slaqwara iwa baraá Gibeonírí diri'.

Foolár Abneri

³¹ Waawutmo Daudi Yoabu nee mukdá' sleémeero dinkwaárií diriiá', giri ádbáy, tlabaaín kiwa feehhamiisi, tlabaá guniyadu kiwa tsiiti, ta tsuunqumiisi as gwa'arár Abneri. Qoomár kuwa foolár ay, waawutmo ina alaá tuuaadá' wa eeharín.

³² Abneri kuna foól baraá Hebroni, nee waawutmo Daudi tsuunqusmo guri tseé' bihhaá /aantár wa ale. Muk hatlá' sleémeero adoodá' gana tleéhh.

³³ Waawutmo Daudi Abneri guri satsuunqumiís iwa kaahi, «Xáy, adoorí a adoomá, Abneri ira gwaá' ar adór daktani.

³⁴ Dabaawók kaa tseegiiká, tam ya'aawók kaa tseegiiká ar qutúr. Ana gwá' adór heé taa gaás nee tlakuuse.» Nee muu sleémeero guri male ale/aa/amín.

³⁵ Aluuwo muu sleémeero tari amór Daudi káy, as kuwa harakeesi mikaáte ngiwa /ayi qoomár iimi ir tlaatla/angwí kahh. Ala Daudi lo'o gari /aáy, iri oó', «Mungú aníng i gaasi bar mukaatmo ugwa tsaáq laqaá tam gár hatlá' ay dír looa i dat.»

³⁶ Muu sleémeero oo kaangwí gwa ar, adoodá' kari slaá' adór umuú gaaro ar waawutmo aa tleéhh ngira sla'atís.

³⁷ Gawaá adoorihe baalaadae múk Israeli sleémeero kari tsaáhh adór waawutmo Daudi adoodá' ngira slaiika Abneri garmoó Neri kuwa gaás.

³⁸ Waawutmo Daudi sagadiyuuseerós gari báy, «Xáy, kuungá' a xua'aakáhe laarí adór heé úr, oo iia tleér ira gwaá' baraá múk Israeliwo?

³⁹ Hám aníng iga mak iimbalaxé' ar di/i as tawa waawutmo, ala laarí aníng aga heé liitlaákw tleehhiít. Ala daaqaywú Seruya a múk aa harwaaraahh saga gawduwo dir'eene. Tlakuuseerí AAKOÓ MUNGÚ ngi slahhi ar adoodár hariímár tlakweemaaín i dirii'iya'.»