2 SAMUELI 24 - Biblía Axweesantá Hhohho' ar Mungú 2004

Daudi i múk Israelír fadiit

¹ Ki/imaá hatlae AAKOÓ MUNGÚ iri buúhh as xoorór Israeli. Daudi guna /agís gawaá daanduú múk Israeli, guri báy, «Múk Israeli faareek, nee múk Yudawo.»

² Waawutmo Yoabu dinkwa nee geeraharuusér hatlá' ar slaqwara giri báy, «Tlawsé' amór tlahh'aá Israeli sleémeero iimír Danír wa tleemu ay Be'er-sheba, muu faarare' as aníng masók faaror'ín an xuú'.»

³ Ala Yoabu waawutmo guri báy, «AAKOÓ MUNGÚ, Munguúwók, múk Israeli ngu doogi adoorí ba/a sagaáwa tsiiru. Kuúng aakooeé' waawutámo, ilawók wa kilae areek adór faarorí ira doogiín. Ala asma waáy, aakooeé' waawútmo, kaangwí mus slá'?»

⁴ Ala ooadár waawutmo i /uuruú koón dír Yoabuwo, nee dír geeraharuusedár slaqwaraaro. Naagáy, Yoabu nee geeraharuuseedár slaqwara tari tláy dír geeraá waawutmoó wa alé, as múk Israeli kuwa faarár ay.

⁵ Yaaér Yordani kana waaraáhh, muu faaroro kuri iimu/ún iimír Aroerír wa ale, nee iimír yaaeedár baraá xatstá Gádír xu', ay yaamaá Yaseri.

⁶ Tari hardáh ay Gileadi, aluuwo ay Kadeshi baraá yaamaá múk Hiti, aluuwo tari hardáh ay Dani, didár Daniro tawa tláy tari harweerín ay Sidoni.

⁷ Tari hardáh ay dír koo/ír gawit ar gixsár Tiro, tari dáh baraá gixsadu sleémeero awa xoorór Hifi, nee awa xoorór Kana'ani. Tari tláy ay Negebu yaamaá Yuda amór Be'er-sheba.

⁸ Alaá slahheeraá gwaleél nee deelór mibeeraá tsare, yaamu sleémeero kinga aldáh, tari kií/ ay Yerusalemu.

⁹ Aluuwo Yoabu faarór muu gari ooár áy dír waawutmo. Baraá xoorór Israeliwo hhawaataá miguuse a kume tsiire tsiyáhh, awa slaqwarár paangadu ngi baalá', nee baraá Yudawo hhawaate a kume tsiire kooán.

¹⁰ Alaá Daudi muu faaroro nguwa hhe'eés iri slahhaá' baraá muunaáwose. Gawaá adoorihe, Daudi iri oó' dír AAKOÓ MUNGÚ, «Ar tlehhmuuwí naa tleehhi, tlakwemaá ur iga tleéhh. Ala hamí AAKOÓ MUNGÚ, án kuúng u harhheehhe'eés, aníng gurtlawáng, anuú sagadiyusmoowók daktu'uuma aga tleéhh.»

¹¹ Matloowose Daudi niwa tláy matlaatleero, qoomaarihe AAKOÓ MUNGÚ ina ya/abín ar afkú Gadi, kuduú iigu'utusmoó waawutmo Daudi. Gadi guri báy,

¹² «Tláw, kaangwí ooeek dír Daudi ku beer, ‹AAKOÓ MUNGÚ gár i kaahi a tí, muruú tám ngwa dirógií haniís, kuúng gár wák tsawaareek, daqaní aníng ngi tleéhh.› »

¹³ Gadi iri daqáy amór Daudi, kaangwí guri ooár áy, guri báy, «Xáy, gár ta sla' a giyér kureeraá faanqw nin tleéra baraá yaamuuwoge? Laqaá kuúng wakuuseerók an ilagwaagóp slahheeraá tame, iwa kuúng slakaatiya'? Laqaá baraá yaamuuwoge tiqtír tlakw nin ti'ít ar pu/i deelo tám? Kaangwí alqaytsiteek, daqaní ngu mu/aywáts kángw ni ooár aw amór kudá' aníng iga ya/aaw.»

¹⁴ Daudi iri oó' dír Gadi, «Hhaslór yaariir iga eér! Ala a tsiní tiwa slahhi nee AAKOÓ MUNGÚ, ta tiwa qaasi baraá dabaá muu, asma AAKOÓ MUNGÚ i gurtleemuú kón.»

¹⁵ Naagáy AAKOÓ MUNGÚ múk Israeli guri tiqtír tlaákwi huúw ar pu/i, iimír matlaatlér wa tleemu ay qoomaadá' taa oó'. Múk kumér mibeeraá faanqw iri qaátl baraá yaamuwo, iimír yaamaá Danír wa tleemu ay yaamaá Be'er-sheba.

¹⁶ Ala qoomár malaykamo dakós nguwa tleés amór gixsár Yerusalemúrí ale, as ngiwa hhaamisi, AAKOÓ MUNGÚ inslawaywós guna warqeés, malaykamoodá' múk tsuú/ guri báy, «A ido daxta.» Dakók har'ooheek. Qoomaadae malaykamoó AAKOÓ MUNGÚ aa sihhiít dír bihhaá afeenír balaangw muxta ar Arauna heé Yebusi.

¹⁷ Daudi malaykamoodá' múk tsuú/ nguwa ár, AAKOÓ MUNGÚ guri báy, «Qaytsiít aníng an tlakusmo! Anuú kilá' ana dakuús! Aníng aga dakuús! Mukwí tsaén aa gaa dakusiiká. Án kuúng u harhheehhe'eés kángw kilae, aníng na muxáng, nee múk guruú doó baabuúeene.»

¹⁸ Baalaarihe Gadi ina daqáy amór Daudi, guri báy, «Gawa i waatlaweek AAKOÓ MUNGÚ kitángw ilahhooa ti tlehh, baraá afeenidár balaangw muxtaa ar Arauna oo Yebusi.»

¹⁹ Naagáy, Daudi iri waatláy gawa, ar adoodá' Gadi kura ádbáy nee AAKOÓ MUNGÚ.

²⁰ Arauna iwa baráy qaytsiít naxés waawutmo guna ár, nee sagadiyuuseerose, naa dirósi nakaá/. Inós ina ti'iít, iri daqáy amór waawutmo, guri i tumbarara'aát, iri xupuú' ay yaamu.

²¹ Arauna waawutmo guri yaahaás, «Asma waáy, kuúng aakooeé' waawutámo, gár nisa amór anuú sagadiyuusmoowók keér?» Daudi guri mu/aywaáts, «Nina daqáw as afeenirók tidár balaangw muxta ngiwa tlaaxw, as kitángw ilahhooa hanmis oo AAKOÓ MUNGÚ nguwa tleehh, as tiqtirí tlaakw ar pu/i muu gwa uhiin, iwa buuru'us.»

²² Arauna Daudi guri báy, «Aakooeé' waawutámo, gár taaqo aandi ar hhoo' ar hariim ilahhooaroge ar tlaweek, haniseek ilahhooár wa ale. Aníng aweerí ngi haniís as tawa ilahhooár da/a. Difiitamaakaá balaangw muxta nee taaqwanaywuú aweero tari migír.

²³ Waawutámo, aníng muruuwí sleémeero ngu haniís. A harahhiíf AAKOÓ MUNGÚ, Munguúwók, ilahhooarók ga ilaoh ar hhooeema.»

²⁴ Ala waawutmo Daudi Arauna guri báy, «Aasla'áy, kuúng mindi gaa haniisaar. Aníng an tlaáxw ar hariímár tlaxoorós. AAKOÓ MUNGÚ, Munguúeé' u ilahhooár da/tií haniisaaká ar naa hamér wa xintsiiká.» Daudi kitangwduú balaangw muxta guri tlaáxw ar shekeéli mibeeri kooán.

²⁵ Daudi AAKOÓ MUNGÚ guri kitángw ilahhooárií tleéhh didár afeenidár balaangw muxta. Ilahhooár da/a gari haniís, nee ilahhooár wayduwo. Naagáy AAKOÓ MUNGÚ firoorí gari ya/án as yaamu, nee oohaseeyidár tiqtír pu/i ar múk Israeli gwa ot, gari har'óh.