2 SAMUELI 23 - Biblía Axweesantá Hhohho' ar Mungú 2004

Axweesantá Daudi ar alhhe'eesaay

¹ Gaarí an axweesantá Daudi ar alhhe'eesaay. A ya/abtór Daudi, garmoó Yese, ya/abtór heé taa uráy wa qaás nee Mungú. Munguú Yakobo, Daudi guna tsawaár guri waawutmoó wa qaás. Nee inós a daausmoó wara'amtá tsuu' baraá Israeliro.

² «Qeeruú AAKOÓ MUNGÚ i axwees ar loohír aníng, axweesantós ngina qaás baraá afkueé'.

³ Munguú múk Israeli iri oó', tlaa/ár múk Israeli ina beér, ‹Hee bar muu ngwa sawaawuti'ín ar gan'amu, baraá waawuti'iimarose bar Mungú ngwa ilaiwaá/,

⁴ Inós a adór gwa/aateemá matlaatlér iimi iwa /awakuúr, adór tsee/amuú dooraá huunkáy wasl birna tsiiriíhh, kár ee, a adór tluwoó gitso ngaa yaamuú wa titi'iis.›

⁵ Adoorí an adór dooeé' i dirii'i dír geeraá Munguhe Asma alqadór alhhe'eesay wasl ngaa dir'eéní oó' ar qoom, ar baloó warqawaaká. Inós muruú aníng ni slaa' sleémeero ngun slasláy.

⁶ Ala kudá' sleémeero Mungú ngwa ilaiwawa/ii'iiká, a adór laqayaá taa kwaáhh, asma taatahhár daba' ngi ya/ana'aaká.

⁷ Heé gi oohár wa slaá' aqo paánga gan kón laqaá magolmoó xa'ano. Mukwí kun qororo'oos ar asla.»

Faarór miguusér Daudi

⁸ Umerí sleémeero ar mukduú miguuse oo bartá Daudi. Yosheb-bashebeti oo múk Takmoni, geeraharusmoó «Kudaá tám.» Inós ina slaáqw ar lawaalarós, múk tsiire dakaát guna siwár wákií tsuú/.

⁹ Heé aluudá' gaa haar a Eliasari, garmoó Dodo, oo tlahhoó Ahohi. Inós a heé wák baraá tla/ángw mukdá' tám oo dinkwa nee Daudi, qoomár múk Filisti kuwa /ooslín, qoomár niwa burumburitiyé' as slaqwara. Múk Filisti kuri ilagoów nee múk Israeli.

¹⁰ Ala Eleasari ina /aátl tawa slaqwi nee múk Filisti. Dakós iri gan'aasárií xasliít as iwa slahhaá', slám amorqae i paángarós kón. Baalaarihe, AAKOÓ MUNGÚ baalír ur gari sláy. Alaá iwa baalín, múk Israeli iri kií/ ay dír aáng Eleasari i dirii'i, as haasaánguú tawo oo múk Filisti, kudá' taa tsuú/, nguwa leehhiyé'.

¹¹ Migusmoó tám a Shama, garmoó Age'e, oo xoorór Harari. Xoorór Filisti tana burumburiít amór yaamaá Lehi, dír yaamaá qamaá deénguú yaariír. Múk Israeli tari goów as múk Filisti.

¹² Ala Shama iri /aátl sihhtanooro baraá tla/ángw qaymo as ngiwa aleekalaa/i, inós múk Filisti guri tsuú/. AAKOÓ MUNGÚ baalír ur gari sláy.

¹³ Miguuseedá' tamaawo baraá tla/ángw mukdá' urén oo mibeeraá tame, tana aweér qoomár bu'uungo, tari hardáh amór mar'ír Adulama amór Daudi. Qoomaadae slaqwaruusér Filisti xafay'ín gwaa tléhh baraá xatstá Refaimu.

¹⁴ Daudi qoomaarihe i baraá guruú koo/ír gawit. Slawtá slaqwaruusér Filisti i baraá gixsár Betilehemu.

¹⁵ Daudi iri oó', «Aníng ma'aá wahaangw i kángw kilá' wa slaá' bir kingi hheeki baraá hhalangwduú Betilehemu kudá' tseéw dír afkú gixsa.»

¹⁶ Mukduú miguusér Daudi tamaawo tana ti'iít, tari tseegiís ar baraá tla/eeraá xafaaduú slaqwaruusér Filisti, ma'aay kiri hheék baraá hhalangwduú Betilehemu, kuduú dír afkú gixsa, kingiri huúw amór Daudi. Ala Daudi ma'aydá' gina sií' wahto. Giri yaamií ku'uús as tawa ilahhooár i haniisi dír AAKOÓ MUNGÚ.

¹⁷ Daudi iri oó', «Aníng a hariimaaká' ma'ayká ngiwa wah, AAKOÓ MUNGÚ. Xáy, ma'ayká' a adór tserér mukdá' slafingw'ín ngwa baraá tsaxwár uhisikáhe as ma'ayká' kiwa hheeki?» Gawaá adoorihe ma'ayká' Daudi gaa wahiiká. Adoorí an adór miguuseedá' tám aa tléhh.

¹⁸ Abishai, hhiyoó Yoabu, garmoó Seruya, inós a geeraharusmoó miguuseedá' mibeeraá tám, inós lawaala gana ar slaáqw, múk tsiire tám guri tsuú/, kuri harafaár amór bartá miguuseedá' tám.

¹⁹ Xáy, kwí aa iia tleeruykáhe ak alé baraá mukdá' tam oo miguuseero? Gawaá adoorihe kuri geeraharusmooín wa qaás, ala migito adór kudá' tám gaa ayká.

²⁰ Benaya, garmoó Yehoyada, oo Kabse'elír daáhh, a migusmoó slaqwara. Muruú yaariír guna tleéhh oo waa/oo/amo. Miguusér tsár gana tsuú/ ar yaamaá Moabu. Baalarka wake qoomár tsaaqwaro ina dáh baraá bohoongw, diraangw guri gaás.

²¹ Slám male alé migusmooko múk Misri guna gaás. Heewuú múk Misri i lawaalár kón, ala Benaya gár i kon a hhara kilós, guri harahi'iít, lawaalarós gari hayóh, heewuú múk Misri guri gaás ar lawaalarós ar kilá'.

²² Benaya, garmoó Yehoyada, adoorí gana tleéhh, umuuwós kuri harafaár tawa heé wák baraá miguuseedá' tame.

²³ Naagáy Benaya tari heé iia tleér baraá tla/ángw kudaá mibeeraá tám awa miguuseero. Ala tam adoodár miguuseedá' tám ngaa aykahe. Ala Daudi guna qaás tawa geeraharusmoó úr oo mukós kuduú xuumuuseerós.

²⁴ Asaheli, hhiyoó Yoabu, a heé wák baraá miguuseedár mibeeraá tame. Miguusér hatlá' ar Daudi a tí: Elhanani, garmoó Dodo oo Betilehemu,

²⁵ nee Shama, oo múk Harodi, nee Elika, oo múk Harodi,

²⁶ Nee Helesi, oo múk Palti, nee Ira, garmoó Ikeshi, oo múk Tekoa,

²⁷ nee Abieseri, heé yaamaá Anatoti, nee Mebunai, heé múk Hushati,

²⁸ nee Salmon, heé múk Ahohi, nee Maharai, heé múk Netofati.

²⁹ Nee Helebu garmoó Ba'ana, heé múk Netofati, nee Itai, garmoó Ribai, oo Gibear daáhh, oo tlahhoó Benyamini,

³⁰ nee Benaya, heé múk Piratoni, nee Hidai oo yaudaá Ga'ashír daáhh,

³¹ nee Abialboni, heé múk Arbati, nee Asmaweti, heé múk Bahurimu,

³² nee Eliaba, heé múk Sha'alboni, nee daaqoó Yasheni, nee Yonatan,

³³ nee Shama, heé Harari, nee Ahimu, garmoó Sharari, oo múk Harari,

³⁴ nee Elifeleti, garmoó Ahasbai, oo múk Ma'aka, nee Eliamu, garmoó Ahitofeli, oo múk Giloni,

³⁵ nee Hesrawi, heé yaamaá Karmelír daáhh, nee Pa'arai, oo múk Arabi,

³⁶ nee Igali, garmoó Natani, heé múk Soba, nee Bani, oo múk Gadi,

³⁷ nee Seleki, heé múk Amoni, nee Naharai, heé múk Be'eroti, kudá' xooslaá slaqwarár Yoabu, garmoó Seruya, gi lohamaamiís,

³⁸ nee Ira, nee Garebu, awa múk Aitiri,

³⁹ nee Uria, heé xoorór Hiti. Sleémeero dinkwaaro a miguuse mibeeri tám nee faanqw.