2 SAMUELI 22 - Biblía Axweesantá Hhohho' ar Mungú 2004

Daa'ángw Daudi oo arba/ati

¹ Daudi /aymi'iikaá daa'angwí giri oó' dír AAKOÓ MUNGÚ, baalaadá' AAKOÓ MUNGÚ nguwa ba/amís baraá dabaá wakuuseerós sleémeerowo, nee baraá dabaá Saulowo. Iri oó',

² «AAKOÓ MUNGÚ a tlaa/ar'eé', a koo/ir'eé' ar gawit nee a ba/amusmooeé'.

³ A Munguúeé' nee tlaa/ar'eé', nee an dír guway'eé' ar amoohhoo', a baqmór'eé', a /uuruú ba/amar'eé', a koo/ir'eé' ar gawit nee dír guway'eé', a ba/amusmooeé' in ba/amimis dír múk gurtleemu wasle.

⁴ AAKOÓ MUNGÚ un ateét, kudá' xirfayeesár wa hariím anií ale/iisi, aníng tin ba/amis dír wakuuser'eene.»

⁵ «Gwa'ara ina /amaatsék adór bambaaór wa ale, alwuór slaqwara iri de'ee tsát.

⁶ Him'ér baraá gi'i ina harwét, tsaaxweelír gwa'ara ina i qoón.

⁷ «Baraá slahh'amaayer'eene AAKOÓ MUNGÚ una ateét, una ateét Munguúeé'. Iimír baraá Do'ose afor'eé' gana iiárií qaás, /aa/e'eé' gina axaás ar iaawós.

⁸ «Yaamu niwa daaraxaatiyé' nee nari dingitiyé', iihhafirír doori iri taa/aán, iri /akút as Mungú iwa buúhh.

⁹ Quui nari baraá dungaawós wa ti'ít, asltá /ayiim niri baraá afkós wa ti'ít, gil'ór asla baraawós ngina wa ti'ít.

¹⁰ Doori gina yaamií tseeweés, nari yaamií aweér, huunkír boo/ i baraá hát dír ya'aawose.

¹¹ Iri tsa/án gawaá keruúbi, iri /akuút. Kuna ár gawaá hhampe'eeraá fur'a.

¹² Tina harweér ar giwti bihhe sleémeero, tuuntukmaarós a huunkoó iló' nee ma'aá naa burumburiitiye',

¹³ mankari ina geeraawós wa gwa/át, asltá gil'o nari ti'ít.

¹⁴ AAKOÓ MUNGÚ ina kududuhuút iimír gawaá doorí wa alé. Inoosuudá' gáwtí dirií' iri ilawaáts.

¹⁵ Wakuuseerós gana qoomeés ar maheeri, giri diyayaá/, mankari gana gwa/tís, giri tlatlahhaás.

¹⁶ AAKOÓ MUNGÚ ngiwa i gahhaát, ar hinsluú baraá dungaawós daáhh, iloodá' baraá tlabeemo nari geehhouyé', iihhafirír yaamu iri geehhouúr.

¹⁷ «Mungú dakose nina gáwtá wa taataáhh, iri óh ar dakós, iri duúx baraá ma'aá yaarír wá ale.

¹⁸ Ina tuú/ dír wakusmooeé' kudá' /uuruú kooma, ina /iís dír kudá' iga aahhi, asma /uuruú yaariír ngu koná' oo iwa ar ba/iya'.

¹⁹ Ina i haratlayé' qoomár niwa baraá slahh'amayeérí dirií', ala AAKOÓ MUNGÚ an baqamór'eé'.

²⁰ Ina huúw, iri qaás dír amohhoo', ina tuú/ asma aníng una sla'atís.

²¹ «AAKOÓ MUNGÚ ina qáy ar hariímár gan'amuueé', ina amohhe'eemiís as aníng tiwa daba' hhohhó'.

²² Asma loohír AAKOÓ MUNGÚ aga eehár sleeme taa paraatliiká dír Munguúeene ar tlakweema.

²³ Hara'ayaarós sleémeero aga óh, baraá tidá' naaqo ooi ar naa sií' i káhh.

²⁴ Dír geeraawose a dakuúsár koomaaká, taa harmagaáhh dakuús mawa tleéhh.

²⁵ AAKOÓ MUNGÚ iga amohhe'eemiís ar har qoomoó gan'amuueé', inós hhohhoaarir'eé' ga xuu'.

²⁶ «Kuúng tu inkihhím dír kudá' inkihhimuú kooma'a. Dír heé xaslxaansli wasle kuúng ti laqaán tuwa xaslxaansli wásl.

²⁷ Dír kudá' taa hheehhe'eesi tin laqaán tuwa hhoohhoó', dír kudaá tlakuuseero tin laqaán tuwa saga gawít.

²⁸ Kuúng kudaádá' tsaen i ba/amís, ala kudaá daara/uuse in íltií tlamá/, kiri /arara'ás.

²⁹ AAKOÓ MUNGÚ, kuúng a tsaa'aste'eé', Munguúeé', kudá' giwtir'eé' ga hingemiís.

³⁰ Ar alee/isaywoge, slaqwaruuse an i haratláw, ar /uuruú Munguúeene koo/i a aleesláw ngiwa waa/akuut.

³¹ Gár Mungú i tleehhi i xaslxanslír koondaaká! Al'axweesantá AAKOÓ MUNGÚ i warqaqeeraaká, inós a baqmoó dír kudá' sleémeero naa amoorósií guwi'i.

³² «A heemá oo adór Mungú, aqo har AAKOÓ MUNGUÚHEÉKE? A heemá oo adór tlaa/ár amohhooa, aqo har Munguúréneéke?

³³ Munguúwí an dír gawit ar guway'eé', loohir'eé' gaa amohhe'eés.

³⁴ Ya'aaeé' gina gawdeés adór kuqaá saaragi, iri qaás dír amoohhoo' ar gawa.

³⁵ In intsaahhatís slaqwaraaro, dabaaeé' ga/alér muqslír sirdaa/aat ngiri aleslayé' uuruuxaro.

³⁶ Gaamboórók ar i ba/amis ngina hanís, alee/isaywók aníng ina uráy haniís.

³⁷ Loohir'eé' aga gan'ás, tam ya'aa'eé' naa niktsitii'iiká.

³⁸ Wakuuser'eé' ana eehár nee ngari hhaamiís, aga alií ki/iiká ay qoomár kiwa hhamiís.

³⁹ Ina hhaamiís, ngiri yaamií daáhh, as mindiwa baloó sihhiitiyé', niri huuhu'uné' dír ya'aaeé'.

⁴⁰ Kuúng /uuruu nir slaaqw nguna hanís, wakuuser'eé' ana yaamií /arara'ás.

⁴¹ Kuúng wakuuser'eé' ana tlatlahhás, nee kudá' iga aahhiye' ina hhaamiís.

⁴² Alee/isaay nguna leelehhiitiyé', ala oo gi ba/amís ngwa arii'iiká. AAKOÓ MUNGÚ nguna i /aa/aminé', ala gaa mu/aywatsiiká.

⁴³ Ina muúx, ngiri teerúw adór hhape, ina muxaxiím, ngiri kal/aám adór baa/ír baraá loohi.

⁴⁴ «Kuúng aníng ina tú/ baraá slaqwaraadár muk'eene, ina waawutmoó xoorduú wa qás. Múk ni xuaaká iri sagadiyuús.

⁴⁵ Hooma nina amor'eé' keér ar tsaeema, kangw'eé' nguwa axaasiyé' tina ilaiwaá/.

⁴⁶ Hooma iri munesií', tindiri ti'iít baraá guruú koo/ir'ín tidá' gawít wa ale, ta hara daaraax.

⁴⁷ «AAKOÓ MUNGÚ i slaaf! I xirfuuti inoósuuduú tlaa/ar'eé'! I xirfuuti Munguúeé', tlaa/ár anií ba/amis.

⁴⁸ Inós aníng iga aleeslawtís, marmár'eé' ngiwa buu', nee xoordu ngiri baál.

⁴⁹ Kuúng iga ba/amís dír wakuuser'eene, iga iia tleerés dír kudá' iga kaángwí si'ii'i, iri amór saáwí amohhe'és dír kudá' sage gawdene.

⁵⁰ «Gawaá adoorihe u xirfayeés baraá tla/ángw xoorduwo, aá AAKOÓ MUNGÚ, umuuwók u xirfayeemiís ar daa'aangw.

⁵¹ Mungú waawutmo gwa arba/atír úrí haniís, sla'aarirós ar warqawaaká gan laqán dír kudá' taa iimbalaáx ar di/i, dír Daudi nee xwaylarós ay kureerisleém.»