2 SAMUELI 21 - Biblía Axweesantá Hhohho' ar Mungú 2004

Tsu/utár xwaylár Saulo

¹ Qoomár Daudi tawa waawutmo, giyér ur nina tleér baraá yaamuwo. Giyeérí ina kumaamít baraá yaamuwo ay kureeri tám. Daudi AAKOÓ MUNGÚ guri firín gawaá daanduú kaangwihe. AAKOÓ MUNGÚ Daudi guri báy, «Saulo nee múk do'ose a tlakuuse, asma inooín tseerdaá muu ngaa ku'umaamisiyé', inós múk Gibeoni guna tsuú/.»

² Gawaá adoorihe waawutmo Daudi múk Gibeoni guna ateét. Múk Gibeoni inooín awa tlahhoó Israeliwooká. Inooín a múk naa meet baraá múk Amoriwo. Geera múk Israeli lo'o gana /aáy as kiwa tsu/iiká, ala Saulo sleémeero gina iiár tsu/taaro. Ina ilakaahareés, as múk Israeli nee múk Yuda ngiwa gurií baá/.

³ Daudi múk Gibeoni guri yaahaás, «Gár nuy tleehh a milá? Tlakweemaadá' tunduy tleéhh gár ngir buu'. As kahhó' yaamuuká' nee muk'ín kuduú AAKOÓ MUNGUHE kiwa tsuqa'.»

⁴ Múk Gibeoni tari oó', «Qaa/oó atén nee Saulo nee múk do'ose a daanduú peesaarooká, laqaá sahaábuwooká. Sleeme a daanduureneeká heé Israeli kuwa gaasaan.» Waawutmo giri male yaahaás, «Hamí ma katá' gár nuy tleehh a milá?»

⁵ Inooín waawutmo kuri báy, «Saulo ina tsabín atén tiwa tsu/i, tiri hhaamiis, tam heé wák oo bartarén iwa meeti baraá yaamaá múk Israeliro gwa slaiiká.

⁶ Gim daxta, múk faanqw baraá na/iiwós awa daaqaywo, amoorén i haniisang, atén i tsu/aán kiwa tareereiimaan dír geeraá AAKOÓ MUNGÚ wa ale, gawaá tloomár Gibeár Saulo, kudá' taa tsawaár nee AAKOÓ MUNGÚ.» Waawutmo iri oó', «Muksíng ngu haniís.»

⁷ Ala waawutmo Mefibosheti, garmoó Yonatan guri tuú/ asma lo'oodá' Daudi nee Yonatan garmoó Saulo taa /aáy as mulqi'iima. Inooínaaká' tsaraawo lo'oorí ngina /ayiyé' ar umuú AAKOÓ MUNGÚ.

⁸ Ala waawutmo Daudi daaqoó tsár oo Rispa, dasír Aia aa xwayluúr dír Saulo guna haniís. Umer'ín a Armoni nee Mefibosheti. Sleeme daaqoó kooán guri haniís oo Mikali, dasír Saulo aa xwayluúr. Baabuúín a Adrieli, garmoó Barsilai, heé xoorór Meholati.

⁹ Na/iiká' faanqw awa daaqaay Daudi gina haniís dír múk Gibeoni, inooín kiri tareereín gawaá tlooma, dír geeraá AAKOÓ MUNGÚ i ale. Sleémeero faanqwmaawo, nari qoomár wák qatliyé'. Na/iiká, kina tsuú/ qoomár bu'úngw geera oo shayiri.

¹⁰ Rispa, dasír Aia, tlabaá angamia gina taatáhh, giri hháf gawaá tlaa/a. Iri didá' wa hotaatiín iimír iimu/úngw bu'uungw, ay qoomár tluwaay i tlubaabin iri xeér, nee tu'u giri i tluúw. Qoomaarí sleémeero makaá sla/a nee gwarsuwo gin gusaasiín, xweera nee tlaatla/ango, as tu'uká, mikiwa kwatiít.

¹¹ Daudi kaangwí nguwa axaás, oo Rispa aa tléhh, dasír Aia, hareedá' quturmo wasl ar Saulo,

¹² Daudi fadaá Saulo nee Yonatan garmaawós gina leéhh amór yaamuloousér Yabesh-gileadi. Faduuká' ngina fiisiyé' baraá ayaá Beti-shanír wa ale, amoodá' múk Filisti Saulo nee Yonatan ki tareereín baalaadá' Saulo nguwa gaasiyé' gawaá tloomár Gilboár i ale.

¹³ Naagáy, Daudi fadaá Saulo nee Yonatan garmaawós ngina watlís. Aluuwo fadaá mukdá' faanqw taa tareereín kiri burumbuúr.

¹⁴ Aluuwo Daudi nee mukós fadaá Saulo nee garmaawós Yonatan kina foól baraá yaamaá Benyamini, amór Sela, baraá /aantár Kishi baabuú Saulo. Umuuqo gár waawutmo aa ooi kana tleéhh. Alaá kaangwihe, Mungú firór kángw yaamuuín gari iiári qaás.

Slaqwarár múk tledaadét, dirén oo Filisti

¹⁵ Aluuwo múk Filisti nee múk Israeli slaqwara kari inki/ís. Daudi nee mukós tana slaqwarár áy amór múk Filisti. Baalaarihe Daudi aa kángw kilá' wa slaaqaát.

¹⁶ Heeko wák ku bay, Ishbibenobu, inós a heé wák baraá mukdá' tledaadét direne. Inós lawaalarós ar muqslír sirdaa/aat ga kón, ilooeemawo a kílo tám nee tlaqi. Paángarós ar /aben ga kón, inós Daudi guna iiár gaasaro.

¹⁷ Ala Abishai garmoó Seruya, ina tláy as Daudi nguwa alee/iisi. Abishai heedaáduú múk Filisti guri slaáhh guri gaás. Muu lo'o gari geeraá Daudi wa /aáy, tari oó', «Atén nee kuúng ti alkoomanaaká baraá slaqwaraaro. Bar adooriheeká tsaa'astá waawuti'iima a gás baraá Israeliro.»

¹⁸ Alaá tihe, slaqwara nari male ti'ít nee múk Filisti amór yaamaá Gobur wa ale. Amoodae Sibekai heé xoorór Hushati oo ta bay Safu guri gaás, inós a heé xwaylár mukdá' tledaadét dirén.

¹⁹ Slaqwarár nee múk Filisti nari male ti'ít baraá yaamaá Gobúr wa ale. Elhanani, garmoó Ya'areo-regimu, heé yaamaá Betilehemu, Goliati oo xoorór Giti guna gaás. Harmahoó lawaalár Goliatiwí yangareemaawo a adór xa'anoó ta inqwarúr tlehhahhiti.

²⁰ Aluuwo slaqwara nari malé ti'ít baraá yaamaá Gatiro. Baraá ayaadae heeko wák i deer, ku xatl-hhoó'. Umuú dako ditsa' ngi kon lahhoó', nee ditsaá ya'aawós a lahhoó' umuúqo yaaeero, ditsaawós sleémeero a mibeeri tsár nee tsiyáhh. Heewí oo xwaylár mukdá' dirén, tledaadét.

²¹ Qoomár múk Israeli nguwa niqmisi, kuri gaás nee Yonatan garmoó Shimei, hhiyoó Daudi.

²² Mukwí tlahhay'ín a xwaylár mukdá' dirén, tledaadét yaamaá Gati, Daudi nee sagadiyuuseerós mukwí kuna tsuú/.