2 SAMUELI 2 - Biblía Axweesantá Hhohho' ar Mungú 2004

Daudi kuwa waawutmoó múk Yuda wa qaás

¹ Alaá kaangwihe, Daudi Aakoó Mungú guri yaahaás, «Xáy, a daqáwa amór gixsár wák baraá gixsadaá Yudawo?» AAKOÓ MUNGÚ guri báy, «Daqáw.» Daudi guri yaahaás, «Gixsár ni kaw a gaalá?» AAKOÓ MUNGÚ guri mu/aywaáts, «Gixsár Hebroni na kaweek.»

² Gawaá adoorihe, Daudi iri daqáy gixsár Hebroni, nee tlaawaywós tsaraawo tina koné', Ahinoamu tidár ayaá Yesre'eli nee Abigaili, kwaalo'ór Nabali kuduú ayaá Karmeli.

³ Daudi mukós kudá' nee inós dinkwa guna huúw, umuúqo heewo nee múk do'ose, wa/amér hotangw'ín kari tleéhh iisapoó gixsár Hebroni.

⁴ Múk Yuda tari daqáy ay Hebroni, amór Daudi, kuri iimbalaáx ar di/i kuwa waawutmooín wa qaasi. Daudi ngiwa axaás adór Saulo kura foól nee múk Yabesh-gileadi,

⁵ muu guri ya/aáw amór Yabesh-gileadi, as ya/abtoorí kawa ooár ay, kiwa bay, «AAKOÓ MUNGÚ kuungá' nu tsuuqi, asma ilaiwa/amerhúng aga laqaandé' dír Saulo, aakoohúng, as kuwa folé'.

⁶ AAKOÓ MUNGÚ kuungá' nu sla'aarír warqawaaká i laqan nee inkihhimu. Nee aníng sleeme kuungá' nu hhooeemií tleéhh, as kangwdá' taa tlehhé'.

⁷ Ala gimsé', /atlé', miguuse tleehhité', Saulo aakoohúng aa kahhuút, nee múk Yuda aníng iga iimbalaáx ar di/i as tawa waawutmooín.»

Ishbosheti kuwa waawutmoó múk Israeli wa qaás.

⁸ Abneri garmoó Neri, geeraharusmoó slawtá slaqwara ar Saulo, Ishbosheti garmoó Saulo guna leéhh, guri huúw ay Mahanaimu.

⁹ Amoodae Abneri Ishbosheti guri waawutmoó yaamaá Gileadír wa qaás nee oo Ashuru, nee oo Yesre'eli, nee oo Efraimu nee oo Benyamini nee oo yaamaá Israeli sleémeero.

¹⁰ Ishbosheti garmoó Saulo a heé kureeraá mibeeraá tsiyáhh, qoomár múk Israeli nguwa sawaawuti'ín, inós baraá waawuti'iimaro kureeri ngaa /aáy tsár. Ala múk tlahhoó Yuda Daudi kuna eehár.

¹¹ Daudi múk tlahhoó Yuda guna sawaawuti'ín kureeri faanqw nee slahheraá lahhoó' bara Hebronír wa ale.

Slaqwarár múk Israeli nee múk Yuda

¹² Abneri garmoó Neri, dinkwa nee sagadiyuusér Ishbosheti, garmoó Saulo, tana Mahanaimúr wa tláy ay Gibeoni.

¹³ Yoabu sleeme, garmoó Seruya, nee sagadiyuusér Daudi tari tláy, tari doogiyé' nee Abneri nee mukdá' ti alkoomá' dír tlahhsadár ma'aay ar baraá Gibeoni. Slawtá wák ar múk slaqwara ina iwít bihhaá wák awa tlahhsa, nee ar hatlá' ina iwít bihhaáqaá hatlá'.

¹⁴ Abneri Yoabu guri báy, «Axáy, masoomba ádbaweek ta dír geeraarén waá neeti.» Yoabu guri mu/aywaáts, «Tisíng i qoón.»

¹⁵ Kár masoombár miberaá tsár nee tsiyáhh kingina geerakeés. Bartá múk tlahhoó Benyaminiwo nee oo Ishbosheti garmoó Saulowo masoomba mibaá nee tsár, nee bartá Daudiwo masoomba mibaá nee tsár.

¹⁶ Umuúqo heewo wakusmoowós guna saga óh, guri bihhi muút ar paánga, tsaraawo tari yaamií huuhu'ún, nari qatliyé'. Didá' kari báy, «Helkat-hasurimu.» Diirí i baraá Gibeoni.

¹⁷ Slaqwaradár baalaadá' ka hhamhhám. Abneri nee múk Israeli kina kángw kilá' wa baál nee múk Daudi.

¹⁸ Seruya daaqaay ngu kon tám, Yoabu, nee Abishai nee Asaheli. Inooín ta baraádá'. Asaheli i /akumamiit ti'iingo, a adór saaragi.

¹⁹ Asaheli Abneri guna al kón, aa bihhaá doó /iyáy qaytiiká laqaá tam awa doó basáy.

²⁰ Abneri iwa alií qaytsiít, Asaheli guna ár, guri báy, «Xáy Asahéli, hee a kuúnge?» Inós guri mu/aywaáts, «Eeít, a aníng.»

²¹ Abneri guri báy, «Warqáw dákw doó /iyáy laqaá dákw doó basáy, garmoó wák ooheek, xosluuwós haasaáng tiwa hup.» Ala Asaheli Abneri gwa mayká alkomtiro.

²² Abneri iri oó' dír Asaheli ki/imaá tsare, «Án mi alkoomaar, adoosíng maweek! Gár us gaas a milá? Daqaní adór nir qiitl nee hhiyaawók Yoabu tiwa araan?»

²³ Ala Asaheli ina sií'. Gawaá adoorihe Abneri guri gura' muút ar kaakaa/amoduú alaá lawaala, nee lawaalaarí iri amór daanduú Asahelír ti'ít. Asaheli iri yaamií huú', iri didár kilií gwaá'. Muu sleémeero didá' Asaheli i gwaá' kawa áy, tana sihhiít tari qartlamiít.

²⁴ Ala Yoabu nee Abishai Abneri kuri alkón. Tari hardáh tsiindowo ay dír tloomár Ama, tidá' bihhaá da/ií dirii' awa Gia, amór loohír xaanxoó Gibeonír kaw.

²⁵ Múk tlahhoó Benyamini tina dinkwárí burumburír, alaá Abneri kina áy, slawtidá' tari sihhiít gawaá tlooma.

²⁶ Kár Abneri Yoabu guri ateét, iri oó', «Xáy, paánga in /ayayiínda daqisleém? Xáy, alhhe'eesaaywós u ga/eerakáhe adór kur tlaákw? Xáy, ta xaslamaamit ay xaylá? Mukók kuwa beeraká, ‹Hhaeehúng mawaak eeharahaduwo?› »

²⁷ Yoabu guri báy, «Dír geeraá Munguú daadawa bar geera kangwsíng ngwa oiká, looeemawo muk'eé' geera aa kumiít hhaeeín ngiwa alkona' ay matlaatlér matlo.»

²⁸ Naagáy Yoabu tarumbeéta gari ufaáhh, nee muu mukduú Israeli guri máy alkomtiro, tam slaqwaraaro taa kumitiiká.

²⁹ Abneri nee mukós tana waaraáhh ar baraá xatstá Araba, xweera kina tlaatla/aangw tleéhh hi'iitanooro. Tari waaraáhh yaaér Yordaniro, tlaatla/aangw sleémeero tana hi'iimiít ay Mahanaimu.

³⁰ Yoabu niwa kií/ amór Abneri slaktuwo, mukós sleémeero guri burumbuúr. Guri ár, naxés sagadiyuusér mibaá nee gwaleél ar Daudi i káhh nee Asaheliwo.

³¹ Ala sagadiyuusér Daudi múk tsiirér tám nee mibeeraá lahhoó' oo bartá Abneri kuna tsuú/, oo tlahhoó Benyamini.

³² Yoabu nee mukós tuuár Asaheli kana leéhh, kari foól baraá /aantár baabuúwós tidá' amór Betilehemúrí dirii'. Yoabu nee mukós tana hi'iimamiít xweera sleémeero. Iimi iwa /awakukuur tari hardáh gixsár Hebroni.