2 SAMUELI 19 - Biblía Axweesantá Hhohho' ar Mungú 2004

Yoabu i waawutmoó igahhamiit

¹ Yoabu kuri báy, «Waawutmo i /aa/amín nee i tsuunqumiis as gwa'arár Absalomu.»

² Gawaá adoorihe, baalir'ín tidá' baalaadae kari warqeés tawa tsuunqusmo dír muu sleémeerowo, as kawa axaás waawutmo iwa Absalomu sa tsuunqumisi.

³ Baalaarihe muu nina qawti dáh baraá gixsa, adór múk muruumiít oo naa slaqwarár wa goow.

⁴ Waawutmo gitsee/awós gina tuuntuúk, i /aa/amín ar afór ur i kaahi, «Ma /imamiís, garmaaeé' Absalomu! Ma /imamiís, Absalomu garmaaeé'! Garmaaeé'!»

⁵ Yoabu iri dáh baraá doó waawutmo, guri báy, «Laarí taa mureekés ataá sagadiyuuseerók sleémeero, ateeká' slafiingók ngwa tu/aan, nee slafíngw na/iiwók awa daaqaay, nee slafíngw na/iiwók awa dasu, nee slafíngw /ameenaarók, nee slafíngw /ameenaarók tidá' quturmo wasle.

⁶ Kuúng mukdá' u ahhiít un slá', nee kudá' u slaá' un ahhít. Laarí ngaa gwa/atís dirén adór geeraharuuseedár sagadiyuuseerók tar gaarooká diroge. Laarí ana tsaáhh bar geeraawo Absalomu i slafi, nee atén sleémeero bara qatlaani, kuúng an qwalá/.

⁷ Sihhiít, hamí axweés nee sagadiyuuseerók ar afór tsa'. Bar sla'aká tawa axwes nee inooín, aníng lo'o an /aáy geeraá AAKOÓ MUNGÚ wa ale, laarí tsiindo tam heé wák oo meét i kaahh dinkwa nee kuúng. Gaarí a gár tlaakw kángw kilá' wa ale, ta tlakweemaá hatlá' sleémeero ba/a, awa taa sleér baraá masoombi'iimaroge ay laarí.»

⁸ Naagáy waawutmo nari tláy, iri iwiít dirós tidár dír afkú gixsa. Muu sleémeero ngiwa axaás adór waawutmo ir dír afkú gixsa, inooín sleémeero tari amoorós káy. Qoomaarihe múk Israeli sleémeero taa qaroó goów, umuúqo heewo amór do'ós.

Daudi ti amohhe'eemiis iwa ki/i Yerusalemu

⁹ Tlahha'aá Israeli sleémeero tari kilooín alwarqayé' gilaawo iwa kaahiya', «Waawutmo Daudi atén tina tuú/ baraá dabaá wakuuseerén wa ale, tina ba/amís baraá dabaá múk Filistir wa ale. Ala hamí aa tlatlaáhh baraá ayko as Absalomu.

¹⁰ Slám Absalomu kudá' naa slikaán ar di/i as tawa waawutmoorén, hamí kwa gaás baraá slaqwarár wa ale. Asma waáy, hamí loohír Daudi kur ki/san tawa waawutmo mas axweesanaaká?»

¹¹ Waawutmo Daudi muu guri ya/aáw amór kaahamuusér Mungú, Sadoki nee Abiatari i kaahi, «Bariisér tlahhoó Yuda ka beera', ‹Asma waáy, kuungá' mas múk alhhe'eesaay waawutmo kuwa ki/isa' amór do'ós? Asma ya/abtór múk Israeli sleémeero naa hardát dír anuú waawutmo.

¹² Kuungá' a hhaee'eé', kuungá' a tseerer'eé', asma waáy, kuungá' mas wa alhhe'eesáy anuú waawutmo iwa ki/isa' amór do'?›

¹³ Amasa sleeme yaahasaak barnaxes inós a tseerer'eeneeká. Slám Mungú aníng i gaasi, barnaxes inós ugwa geeraharusmoó úr oo múk slaqwaruusereé' wa qaasiiká laarí kitángw Yoabu wa ale.»

¹⁴ Axweesantá Daudi munér múk Yuda sleémeero gari ya/aán adór heé wák ar ale, afo kari ya/aáw tari oó', «Ki/áng amór do', kuúng nee sagadiyuuseerók sleémeero.»

¹⁵ Naagáy, waawutmo nari hardáh dír yaaér Yordani, nee múk Yuda sleémeero tindina hardáh Gilgali, as waawutmo nguwa al'aya', kunguri waarahhaas yaaér Yordaniro.

¹⁶ Shimei garmoó Gera, oo tlahhoó Benyamini, oo yaamaá Bahurímúr daáhh, ina gaanslár tláy dinkwa nee múk Yuda as waawuutmo Daudi kuwa al'ay.

¹⁷ Shimei nee múk tlahhoó Benyamini oo kumuú wák tina alkoné'. Siba, lawaalmoó múk doó Saulo, dinkwa nee daaqaywós oo mibaá nee kooán, nee sagadiyuuseerós ar mibeeri tsár, tana gaanslár tláy ay yaaér Yordani as tawa geeraá waawutmo Daudi wa hi'iiti.

¹⁸ Naagáy, tari waaraáhh didár waarahhmuuwo as múk doó waawutmo kuwa haydohisi, nee adoodá' waawutmo i slai sleémeero kawa tleehhi. Shimei garmoó Gera niri hardáh, tina kwaáhh dír geeraá waawutmo, iri tumbarara'aát, qoomár waawutmo niwa nakaá/ waarahhamuú yaaér Yordaniro.

Shimei kwaa gurtláy nee Daudi

¹⁹ Shimei waawutmo guri báy, «Án kuúng u firiím, aakooeé' waawuutámo, mi harafaaraar baraá dakuúsí ale, tam dakuúsadá' naa tleéhh baalaadá' tawa gixsár Yerusalemúr wa tlatleer, ma inslawaar. Án kuúng u firiím, ti ma oohaar.

²⁰ Asma anuú sagadiyusmoowók a xuú' adór tlakweema ngira tleéhh. Gaarí an gár nisa daqáw laarí, tawa heé geera baraá tlahhoó Yosefuwo, niwa al'awerók áw, aakooeé' waawutámo.»

²¹ Kár, Abishai, garmoó Seruya, iri oó', «Xáy, i ganá'ke Shimei kuwa gaasi. Asma inós heé AAKOÓ MUNGÚ aa tsawaár guri sliík ar di/i, guna lu'ús?»

²² Ala Daudi iri oó', «Daaqoó Seruya, gár aníng nee kuungá' i káhh. Asma milá misti adór wakuuser'eé' tlehhá' laarí? Xáy, hee kun gaási baraá Israeliwo laarí? Ahaá, aníng ti xuaakáhe adór tar waawutmoó Israeli deelór laarihe?»

²³ Waawutmo Shimei guri báy, «Kuúng tu gaasiiká.» Waawutmo lo'o gari /aáy as Shimei.

Mefibosheti kwaa gurtláy nee Daudi

²⁴ Mefibosheti, garmoó nángw Saulo, ina daqáy baraá al'awér waawutmo Daudi. Iimír baalaadá' iwa Yerusalemúr wa tláy, ngar wa kií/ ar saxareema, iimidae Mefibosheti ya'aawós gaa baloó hamaatliiká, tam daamoórós gaa deeqwiiká, nee inqwaruwós gwa gaárií xuiiká hhuntsaro.

²⁵ Naagáy, qoomár iwa Yerusaleémú wa tláy, iwa waawutmoó al'áy, waawutmo guri yaahaás, «Xáy Mefibosheéti, asma milá mista alkoomaniiká nee kuúng?»

²⁶ Mefibosheti iri oó', «Aakooeé' waawutámo, sagadiyusmooeé' ina al/aáy. Asma aníng oo sagadiyusmoowók, una báw, ‹Daqway'eé' amohhe'eeseek as nguwa tsa/am as aníng nee waawutmo tiwa alkoomaan.› Kuúng a xú' anuú sagadiyusmoowók a taqoormo.

²⁷ Ala inós aníng ina kaantaatín dirógí ale, aakooeé' waawutámo. Ala kuúng, aakooeé' waawútmo, kuúng a adór malaykamoó Mungú. Umuúqo gár ta aán ar qoom dir'eé' tleehhang.

²⁸ Asma múk doó aakooeé' sleémeero gár niwa hariné' aqo tsu/uta dír geeraawoge, aakooeé' waawutámo. Ala anuú sagadiyusmoowók ina qás dinkwa nee mukdá' /ayiím gawaá meésarók wa ale. Xáy, gan'amuú ni koom i deéro tam oo niiná, tam oo uwa i /aa/amiim, waawutámo?»

²⁹ Waawutmo guri báy, «Gár muruuwók kwisíng kus alki/it i káhh. Aníng ana qaroó oó', kuúng nee Siba yaamaá Saulo in qasisá'.»

³⁰ Ala Mefibosheti waawutmo guri báy, «Siba ya/ameek, yaamu sleémeero kilós ngi oohi. Kuúng, aakooeé' waawutámo, niwa kí/ amór do' ar saxarema tí aninge aa bu'út.»

Daudi Barsilai nguwa hhooeemií tleehhiti

³¹ Barsilai, kuduú yaamaá Gileadi, nina hardáh amór Rogelimúr wa ale. Nee waawutmo tana al tláy ay yaaér Yordani, as kuwa haydoohisi ay gayuú yaae.

³² Barsilai, a aakoó aa uray, kureeriiwós a mibeeri dakaát. Inós waawutmo guna amohhe'eemiís, qoomár waawutmo iwa Mahanaimúr hooti, asma Barsilai inós tawa daqaarmo ló'wa ale.

³³ Naagáy, waawutmo Daudi Barsilai guri báy, «Góh, ti alkoomaán sleémeero ay Yerusalemu, án kuúng u amohhe'eemiís.»

³⁴ Ala Barsilai waawutmo guri báy, «Xáy, kureerieé' awa ni hoot kiqo úre, tam nee kuúng tiwa alkoomaan ay Yerusalemu?

³⁵ Aníng laarí kureerieé' a mibeeri dakaát. Xáy, gár hhoo' nee ar tlaakwe aqo alesláwa tsaahharo? Xáy, anuú sagadiyusmoowók, tsu'uú gár ni /aay nee ar ni wahama u tsaáhha? Xáy, afór hhohho' a alesláwa tsaahharo ar /ayluusér hhawaate nee ar /ameenaaro? Asma milá anuú sagadiyusmoowók gár kuúng us al'iiloouw aakooeé' waawutámo?

³⁶ Anuú sagadiyusmoowók nee kuúng ti alkoomaán diisíng tseew ar gayuú Yordani. Asma milá gár waawutmo aníng is qeemuú úri haniisi oo adór kwí.

³⁷ Aníng, kuúng u fiririím, ya/aám anuú sagadiyusmoowók ni gwaá' baraá gixsar'eé', dír bihhaá /aantár baabuúeé' nee aayor'eé'. Ala sagadiyusmoowók kwí ta bay Kimhamu, ya/aameek nee kuúng tiwa koonda', aakooeé' waawutmo! Gár hhoo' ar ta aán tleehhamooro tleehheek dirósií ale.»

³⁸ Waawutmo iri oó', «Kimhamu a altlawaán nee aníng, nee nguri gár hhoói tleéhh. Nee umuúqo gár ta sla'a ar ni dirógií tleehh, ngi tleéhh.»

³⁹ Kár, muu sleémeero iri waaraáhh yaaér Yordaniro. Waawutmo sleeme ina waaraáhh. Waawutmo Daudi Barsilai guri tsuúq, guri ma'aás, Barsilai iri kií/ amór do'ós.

Múk Yuda nee múk Israeli tawa tlaánk daanduú waawutmowo

⁴⁰ Waawutmo ina kumiít ay Gileadi. Kimhamu nee inós tina alkomkaakoné'. Muu sleémeero oo Yuda nee tlaqtá múk Israeli ta waawutmoó haydoohamiis.

⁴¹ Múk Israeli sleémeero tana daqáy amór waawutmo, kuri báy, «Asma milá, hhaeerén awa Yuda kuúng musa loohír wa fiisír, turi waarahhaás yaaér Yordaniro, kuúng nee múk do'oge, dinkwa nee mukók kuduú hatlae?»

⁴² Múk Yuda múk Israeli kuri báy, «Asma waawutmo a hhiyaarén oo tseéw. Ahaá waáy, masa buhhé as kaangwí? Xáy, muruuwós oo naa /ayaán i deéro, laqaá inós atén qeemuú tira qáy i deéro?»

⁴³ Múk Israeli múk Yuda guri mu/aywaáts, «Atén a gan'amuú koomaán sagaáwa mibaangw daanduú waawutmoowo, kuungá' ba/a, tam daanduú Daudiwo sleeme. Asma milá, mista waaqaé'? Xáy, a aténeéke múk aa geerií oo' waawutmo kungu ki/isi?» Ala axweesanoó múk Yuda i xaraasl ta axweesanoó múk Israeliwo.