2 SAMUELI 17 - Biblía Axweesantá Hhohho' ar Mungú 2004

Hushai i Absalomu saga qwaareemiis

¹ Alaá deelór niinawe Ahitofeli Absalomu guri báy, «Áx ya/aám, múk kumér mibaá nee tsár nguwa tsawaar, as tawa tlawaan, Daudi kuwa alkoomaan xweerá laarihe.

² Qoomár bira slaaqaát nee bira mune sií', aníng un de'ee tsaát, muu sleémeero kudá' dinkwárí dirií' nee inós tari goow. Aníng waawutmo kilós nguri slaáhh.

³ Nee mukduú hatlá' sleémeero nguri ki/ís amoorók, adór dasír taa duúx, ar waatl amór doó hhawaatuuwós. Asma kuúng slafíngw heé wák kilós un leelehhít, nee múk hatlá' tari hoot ar wayda.»

⁴ Axweesantír Ahitofeli Absalomu guri qwal/atís, nee bariisér Israeli sleémeero.

⁵ Absalomu iri oó', «Hushai, heé Arki, ateetare' sleeme u axaasaán gár i slai ooaro a milá.»

⁶ Hushai iwa hardáh dír Absalomu, Absalomu guri yaahaás, «Adoorí an adoodá' Ahitofeli aa oó'. Xáy a eeharaána adoodá' inós ngira oó'? Bar adooriheeká, gimáy tók ooang.»

⁷ Hushai Absalomu guri mu/aywaáts, «Qoomaarihe axweesantír Ahitofeli naa oó' i qoondaaká.»

⁸ Hushai iri kumiít axweesanto, «Kuúng a xú' adór baabuúwók nee mukose tar miguuse, nee adór tara qa/imiít buhhtaawo, adór makiito'oodá' ta bay dúbu ar qaa' ar taa na/ii hayóh baraá darmuú wa ale. Slám male ale kuúng baabuúwók un xú' adór tar miguusmoó slaqwarár baál. Inós xweeraawo i qaqtaatinká dinkwa nee mukós ay matlaatle.

⁹ Hamí aa nahhaát baraá mar'ír wák yaameerihe, laqaá tam amór hatlae. Daudi bira haratláy slaqwaraaro, bar muu kwaa tsuú/, umuúqo heé tsu/utaarí gaa geerií axaasi naxes in ooi ‹Múk yaariír oo taa tsuú/ oo bartá Absalomu.›

¹⁰ Mukók bar adoorí ngaa axaás, tam mukók kudá' gur'e gawdén adór direeri, tari hirqimiit de'eero. Asma múk Israeli sleémeero ga xuu' adór baabuúwók tar migusmo, nee mukdaádá' sleémeero oo dinkwa nee inós a múk ilakaaharén.

¹¹ Gár aníng ni oo' a tí, múk Israeli sleémeero amoorók ti burumbut, iimír Danír wa oohang ay Be'er-sheba, ayaá basa, masók ki yaariir adór hhasángw afaá tlawtá wa ale, nee kuúnguú kilá' ta daqeér baraá slaqwara.

¹² Atén Daudi un leelehhaán umuúqo dír i dirii'i, nguri i huuaán adór hara' ir yaamií huuhuaín. Heé meét i kaahh, inós nee mukós kudá' sleémeero dinkwárí diria'a.

¹³ Barnaxes aa goów amór gixsarka koo/ír gawít koom, naagáy múk Israeli sleémeero him'e kingin huuw, gixsarí kingari uuruux ay baraá xatsa, tam tla/anoó niiná oo gixsarí ku geexayká.»

¹⁴ Absalomu dinkwa nee múk Israeli sleémeero tari oó', «Kángw Hushai, heé Arki, i ganaa' ta oo Ahitofeliwo.» Axweesantá Ahitofeli kana sií', asma AAKOÓ MUNGÚ axweesantadá' hho' ar Ahitofeli gana sií', as kahhó' AAKOÓ MUNGÚ Absalomu nguwa tlaákwí tleehhi.

Daudi kuna gurbuú' iri tlatlaáhh

¹⁵ Hushai kaahamuusér Mungú, Sadoki nee Abiatari, giri kángw báy, adór inós nee Ahitofeli Absalomu kura i axweés, nee bariisér Israeliwo.

¹⁶ Giri báy, «Kaangwí huwaak amór Daudi ar gaanslaay, inós ló' miwa qaát xweeraawo dír waarahhamuduú amór xaanxaay, ala tam ado gaalá, i waaraahhi nee i tlay, as mukuwa óh nee mukuwa gaás dinkwa nee mukós sleémeero.»

¹⁷ Qoomaarihe, Yonatan nee Ahima'asi ta daamarán dír hhalángw Enrogelír wa ale, as hee mingiwa ár barta darah baraá gixsa. Umuú siiwaro sagadiyuso'orka kaangw gun ooár aaeér dir'ín. Inooín kaangwí kun ooár áy amór waawutmo Daudi.

¹⁸ Ala qoomaadae, garmaako wák Yonatan nee Ahima'asi gina ár. Kaangwí guri ooár áy dír Absalomu. Kár Yonatan nee Ahima'asi tari gaanslár tláy, ay Bahurimu, amór doó heeko hhalángw koóm baraá guruú slumtá do'ose. Tari nahhaát baraá hhalangwdá'.

¹⁹ /Ameenír do' loo' yukumáyduú tuuntukmár hhalaangw guri taatáhh, hhalaangwdá' guri tuuntúk, balaangós guri gawaá daanduú yukumáydií iintlát, kaangwí kuri xuiiká.

²⁰ Sagadiyuusér Absalomu tari hardáh dír doó /ameenirí, kari báy, «Ahima'asi nee Yonatan ta amá?» /Ameenidá' giri beér, «Taa waaraáhh amór gayuuquú yaae.» Kiwa leelehhiít kiri slayká, tari kií/ baraá gixsár Yerusalemu.

²¹ Alaá sagadiyuusér Absalomu iwa tleér, Yonatan nee Ahima'asi tindina ti'iít baraá hhalángw wa alé, tari tláy amór waawutmo Daudi, kuri kaangwí báy, tari oó', «Amór gayuuquú yaae i tlaweek, asma Ahitofeli Absalomu gwa i axweés daanduwoge.»

²² Gawaá adoorihe, Daudi iri tláy, nee mukós kudá' sleémeero ti alkooma'a, tari waaraáhh gayuú yaaér Yordani. Naxés matlaatleero hee i kaahh tam oo wák oo aa alií meet oo yaaér Yordani gaa waaraahhiiká.

²³ Ahitofeli ngiwa ár adór axweesantós kara kaángwí sií', iri tsa/án gawaá daqwaywós, iri waátl amór do', baraá gixsarós. Iwa hardáh muruú dír do'ós guri qoomeés. Tari tarereé', iri gwaá'. Kuri foól baraá /aantár baabuúwós.

²⁴ Naagáy, Daudi iri tláy ay Mahanaimu. Absalomu nee múk Israeli sleémeero yaaér Yordani kari waaraáhh.

²⁵ Qoomaarihe, Absalomu Amasa guna qaás tawa geeraharusmoó úr oo slaqwaruuse kitangw Yoabu wa ale. Amasa a garmoó Yitra, oo tlahhoó Ismaeli. Aayoorós ka bay Abigaili, dasír Nahashi. Inós a hho'ór Saruya, aayór Yoabu.

²⁶ Absalomu nee múk Israeli xafaay kuri siíhh baraá yaamaá Gileadi.

²⁷ Daudi iwa hardáh yaamaá Mahanaimu, Shobi garmoó Nahashi oo múk Amoni, kudá' gixsár Rabár daáhh, nee Makiri garmoó Amieli, kudá' gixsár Lo-debarír daáhh, dinkwa nee Barsilai heé Gileadi, kudá' gixsár Rogelímúr daáhh.

²⁸ Qateeno kiri huúw, nee xooslaá iimpu, nee xooslaá tleeiro, nee angaáno, nee angaánoó shayiíriro, nee puurú, nee marsaáu, nee deéngu nee maa/aará,

²⁹ nee daneero, nee di/aay, bee/aangw nee di/tá /awak. Adoorí kana tleéhh as Daudi nee mukós kudá' ti alkoomá', asma tana oó', «Mukwí i qwariit, nee i waxiit, nee taa slaaqamiít as tawa baraá xaanxáy dirii'i.»