2 SAMUELI 16 - Biblía Axweesantá Hhohho' ar Mungú 2004

Siba nee waawutmo Daudi

¹ Daudi iwa waaraáhh gawaá tsitsantá tloomaro, Siba, sagadiyusmoó Mefibosheti, Daudi guri al'áy ar mikaáte tsiire tsár, ngaa tsa/aás gawaá daqwaayér tsár, nee /ar'aá tsiirú wák awa sabiíbuú taa kahaás, nee mamaá xaai awa qoomár age tsiiruú wák, nee tlakoó kaahari oo taa hatsiís difaaíro.

² Waawutmo Daudi Siba guri yaahaás, «Gár muruuwí ngusa húp?» Siba guri báy, «Daqwaaye ar múk do'ók ar ta ii tsa/aa/an, mikaáte nee mamaá xaai kukaá qoomár age awa masoomba sleémeero, difaái ar mukdaádá' /araraám waxeero baraá xaanxáy wa ale.»

³ Waawutmo guri yaahaás, «Garmoó aakoowók gaálay?» Siba waawutmo guri báy, «Inós i baraá gixsár Yerusalemu, asma ngiwa xui ku waawuti'iimár aakoowós Saúlówí ki/is nee múk Israeli.»

⁴ Waawutmo Daudi Siba guri báy, «Axáy, muruduú Mefibosheti hamí a kók.» Siba guri báy, «Na'amamís aakooeé' waawútmo, án kuúng u firiím, aníng hhooeemáy tleehháng umuúqo daqto.»

Shimei i waawutmo Daudi lu'umis

⁵ Qoomár Daudi iwa hardáh Bahurimu, heeko wák nina hardáh oo baraá gixsár daáh, oo tlahhoó Saulo. Umuuwós a Shimei garmoó Gera. Shimei iwa amór Daudi kay, guri loohi lu'umaamís.

⁶ Daudi nee sagadiyuuserose giri tlaquút ar tlaa/e. Múk hatlá' sleémeero nee miguuseero Daudi kuna harweér bihhaá doó /iiyáy nee bihhaá doó basayhe.

⁷ Shimei Daudi nguwa lu'umisi iri oó', «Tláw koroóq, tláw kororoqoót, kuúng a tsu/uutusmo, nee heé gaa wásl.

⁸ AAKOÓ MUNGÚ kuúng ugwa li/áy buú', as tseerduudá' taa ku'umaamís awa múk doó Saulo, kudaádá' hamí kuúng taa waawuti'iima ót. Hamí, AAKOÓ MUNGÚ waawuti'iima gaa haniís dír Absalomu, garmaawók. Qaytsiít kuúng tu hhaamiis, asma kuúng a tsu/uutusmo.»

⁹ Kár Abishai garmoó Seruya, waawutmo guri báy, «Aakooeé' waawutámo, a gár milá kuúng tuwa lu'umisi nee seeoó aa gwaa'? Áx, ya/aám, aníng a amoorós káw, sagós ngu tsaát.»

¹⁰ Ala waawutmo iri oó', «Xáy, gaarí a milá ar baraá tla/ángw aníng nee kuungá' daaqoó Serúya? Barnaxes AAKOÓ MUNGÚ inós gwa báy, ‹Daudi lu'usek, heé gu yaahaás a heemá oo gu báw, asma milá adoorí mara tléhh?› »

¹¹ Slám waawutmo Daudi Abishai nee sagadiyuuseerós sleémeero giri báy, «Barnaxes na/ay'eé' oo kilá' slafingw'eé' gun slakaat, xáy, heé tlahhoó Benyamini mi máy? Kuungá' mawaak, aníng i lu'usi, asma AAKOÓ MUNGÚ gwaa adoosíng báy, aníng iwa lu'usi.

¹² Hám wané', AAKOÓ MUNGÚ slahh'amueé' gwaa ár. Inós adoorí aníng tiwa lu'umisi laarí ngin buu' ar hhooeema.»

¹³ Waawutmo Daudi nee mukós tari kumiít aaiiwo, Shemei ina kumamiít nguwa eeharaahari, bartaqae gu tlaa/ér tlaquut, nee teeri ngiwa gáwtí kwakwaahhi as waawutmo Daudi. Shimei ina hi'iimiít ar gawaá tlaaqarmoó tlooma amoodá' waawutmo Daudi i kay.

¹⁴ Waawutmo nee mukós kudá' sleémeero dinkwárí diri'á' tari hardáh afaá yaae, taa slaaqamiít. Naagáy tari hungu/uús.

Absalomu i baraá gixsár Yerusalemu

¹⁵ Qoomaarihe, Absalomu nee muu sleémeero oo Israeli, tari tláy ay gixsár Yerusalemu dinkwa nee Ahitofeli.

¹⁶ Hushai kudá' Arkír daáhh, mulqumoó Daudi, iri daqáy amór Absalomu, guri báy, «Waawútmo, sagók fur'a ngu laaleer! Waawutmo, sagók fur'a ngu laalee!»

¹⁷ Absalomu Hushai guri yaahaás, «Xáy, adoorí an inkihhimuwoge dír mulqumoowók Daudiwo? Baré nee mulqumoowók taa koondi'iiká, ala?»

¹⁸ Hushai guri mu/aywaáts, «Aasla'áy! Ala kudaádá' taa tsawaár nee AAKOÓ MUNGÚ, nee muu sleémeero oo Israeli, aníng an kós, nari hootaán nee inós.

¹⁹ Heé ni sagadiyuus oo kwí ba/a a heemá? Xáy a garmoó mulqamoeeneekáhe? Gawaá adoorihe adoodá' baabuúwók ngura sagadiyuús, an adoodá' kuúng ur sagadiyuus.»

²⁰ Kár Absalomu Ahitofeli guna báy, «Ma oiín, adór ta laqaan.»

²¹ Ahitofeli Absalomu guri báy, «/Ameenadár baabuúwók ar quturmo wasl ar doó ga/aw, alwarqaweek. Aluuwo múk Israeli sleémeero bir ngaa axaás, adór kuúng tura buhhtís nee baabuúwók, daqaní muu sleémeero oo dinkwa nee kuúng /uuru gun sláy.»

²² Gawaá adoorihe muu Absalomu guri heémaárií siíhh gawaá daanduú do'. Absalomu iri qaqatín nee /ameenaadár baabuúwós dír ilaá múk Israeli sleémeero wa ale.

²³ Qoomaadae umuúqo /aymuú Ahitofeli aa ooi, a adór axweesantá taa oó' nee Mungú. Nee umuúqo axweesantá Ahitofeli aa ooi, Daudi nee Absalomu aqo kan iwaa/.